Eclesiastés 1 - Bible in Tzotzil de Chenalhó with Deuterocanon

Li' ta banamile altic no'ox scotol

¹ Li'i ja' laj yal jun jchanubtasvanej, ja' li xnich'on David ti i'och ta ajvalilal ta Jerusalene.

² Jech laj yal li jchanubtasvaneje: Altic no'ox, solel mu'yuc stu o; jeche' no'ox scotol.

³ ¿C'usi lec tsta li boch'o smiloj no'ox sba ta abtel li' ta banamile?

⁴ Xvoc' jc'ol alab nich'nabetic, xcham yan jc'ol; te staoj yav o li banamile.

⁵ Chloc' tal li c'ac'ale, chch'ay batel; chbat sta ti bu ono'ox chloc' tale, te chloc' tal yan velta noxtoc.

⁶ Chlic tal ta sur li iq'ue, chjoybij batel c'alal ta norte; li iq'ue xvalc'uj sutbij no'ox, xtal xbat no'ox.

⁷ Li uc'umetique te chc'otic ta nab scotol, pero li nabe mu xnoj, yu'un chloc' batel noxtoc; chbat ti bu ono'ox sbe uc'umetique.

⁸ Puru lubel no'ox chac' ta scotol, mu xa stac' alel c'u x'elan; mu'yuc c'usi stac' q'uelel ti ta jta jun co'ntontic o yu'une; jech noxtoc mu'yuc c'usi stac' a'yel ti xcuxet co'ntontic yu'une.

⁹ Li c'usi c'otem xa ta pasele ja' chc'ot ta pasel noxtoc; li c'usi pasbil xae ja' chich' pasel noxtoc; mu'yuc c'usi yan ach' li' ta sba banamile.

¹⁰ Oy boch'o jech chalic: “Li'i ja' to no'ox ic'ot o ta pasel, ja' ach' to”, xiic, pero c'otem xa ono'ox ta pasel ta poco' vo'one ti c'alal mu'yucutic to'oxe.

¹¹ Chch'ay ta o'ntonal scotol li boch'otic jelovenic ta vo'onee, jech noxtoc li boch'o ts'acal to chtalique chlic ch'ayicuc ta o'ntonal ec.

Oy c'usi yiloj lec stuc li jcholc'ope

¹² Vu'un li jchanubtasvanejune, vu'un ajvalilun yu'un Israel te ta Jerusalén.

¹³ Solel la jloq'ues co'nton ta sjaq'uel, ta xchanel ta scotol jbijil ti stac' pasel, ti stac' chanel li' ta sba banamile. Li Diose toj ep c'usi yac'oj xu' tspas li cristianoetique yu'un jech te ac'o suj sbaic o ta abtel.

¹⁴ Laj cotquin scotol li c'usitic stac' pasel, stac' chanel li' ta banamile, pero altic no'ox, ch'ay c'ac'al no'ox. Ja' jech chac c'u cha'al me ta jc'an ta jnutstic iq'ue, mu'yuc c'usi ta jtatic o.

¹⁵ Li c'usi mu'yuc tuc' liqueme, mu xu' cu'untic stuq'uibtasel o, xchi'uc mu xa xu' ta jtsactic ta atel li c'usi ch'ayeme.

¹⁶ Jech la jnop ta co'nton: “Vu'un no'ox jtuc lec muc'un, lec bijun yu'un scotol li boch'otic jelovenic xa ta ajvalilal li' ta Jerusalene, yu'un ep la jsa' jbijil, ep c'usi laj cotquin.

¹⁷ Solel laj cac' co'nton ta yotquinel c'u x'elan li bijilile, xchi'uc laj cac' persa yotquinel c'u x'elan li bol talelale. Pero laj quil ti altic no'oxe; jech chac c'u cha'al me ta jc'an ta jnutstic iq'ue, mu'yuc c'usi ta jtatic o”, xichi.

¹⁸ Yu'un me ep c'usi chcotquintique, me ep c'usi jna'tique, ep ta jta jvocoltic noxtoc.