Deuteronomio 9 - Bible in Tzotzil de Chenalhó with Deuterocanon

Ja' Muc'ul Dios ta spas stuc scotol, mu ja'uc li israeletique

¹ “A'yo me ava'yic, israeletic: ista xa yorail xu' chajelovic batel ta jot uc'um Jordán, xchi'uc yorail xa xu' chbat atsalic li muc'tic banamil ti toj tsotsic jech chac c'u cha'aloxuque, xchi'uc li muc'tic lumetic ti lec setbilic ta coraltonetic ti bats'i toyolique.

² Li boch'otic te nacalique toj muc'tic, toj natic jech chac c'u cha'al li smomnich'nabtac Anaque. Li vo'oxuque ava'yojbeic sc'oplal ti mu'yuc boch'o xu' yu'un tstsal li smomnich'nabtac Anac ti toj muc'tic xchi'uc ti toj natique.

³ “Ja' yu'un li' ta orae, tsc'an chana'ic ti ja' ba'yucbe ta xbat avu'unic stuc li Muc'ul Diose, yu'un ja' jech chac c'u cha'al c'oc' ti xu' yu'un chchic' scotole. Ta asatic tslajes scotol, tsbic'tajes scotol li muc'tic banamile. Ja' yu'un li vo'oxuque jmaq'uel no'ox ta satil chanutsic loq'uel, chalajesic scotol jech chac c'u cha'al yaloj li Diose.

⁴ C'alal me laj xa snuts loq'uel ta atojolic scotol li Muc'ul Dios avu'unique, mu me jechuc xlic avalic: ‘Ta sventa ti toj lec c'usi la jpastique, ja' yu'un li Muc'ul Diose laj yac'butic quich'tic li banamil li'i’, mu me xachiic. Ti jech chasnutsboxuc loq'uel scotol li Muc'ul Diose, ja' ta scoj ti toj chopol c'usitic tspasic li stuquique.

⁵ Ma'uc ta sventa avabtelic, xchi'uc ma'uc ta sventa alequilic ti chavich'ic li banamile. Ja' ta scoj smulic ti chich'ic nutsel loq'uel yu'un li Muc'ul Diose, xchi'uc ja' chc'ot ta pasel ti jech ono'ox yalojbe li jmoltotactic ta vo'onee, ja' li Abrahame, li Isaaque, xchi'uc li Jacobe.

⁶ Tsc'an chana'ic ti ma'uc ta sventa yu'un lec c'usi chapasic ti jech chayac'boxuc lequil osil li Muc'ul Diose. Li vo'oxuque ja' jun lumoxuc ti toj toybaoxuque, ti toj tsots avo'ntonique.

La sbajbeic smantal Dios israeletic te ta vits Horeb

⁷ “Mu me xch'ay ta avo'ntonic ti ep laj avaq'uic ilinuc te ta xocol banamil li Muc'ul Diose. C'alal laloq'uic tal ta Egiptoe, xchi'uc c'alal to lavulic li'i, scotol ora laj abajilanbeic li smantale.

⁸ Laj asa'beic sc'ac'al yo'nton te ta vits Horeb, jech i'ilin ta atojolic. Jutuc xa muc xayulesoxuc o.

⁹ Li vu'une ja'o muyemun batel ta jolvits yu'un bat quich' tal li pech'ajtic ton yo' bu ts'ibabil li c'usitic xchapanoj Dios tspas ta atojolique. Te lijalij cha'vinic (40) c'ac'al xchi'uc cha'vinic (40) ac'ubal. Mu'yuc c'usi la jve'; mu'yuc c'usi laj cuch'.

¹⁰ Li Muc'ul Diose laj yac'bun li cha'pech ton ti ja' sts'ibaoj stuque. Ja' te ts'ibabil scotol li sc'op ti laj yalboxuc te ta yoc vits c'alal ic'opoj ta o'lol yat c'oc' c'alal te jmoj tsobolutic jcotoltique.

¹¹ C'alal ista li cha'vinic (40) c'ac'al xchi'uc cha'vinic (40) ac'ubale, li Muc'ul Diose ja'o laj yac'bun li cha'pech ton yo' bu ts'ibabil scotol li c'usitic xchapanoje.

¹² Jech laj yalbun: ‘Yalan batel ta ora, yu'un li achi'iltac ti laj aloq'ues tal ta mozoil ta Egiptoe, ich'ayic xa ta be. Ta ora no'ox la scomtsanic spasel li c'usitic laj calbeic ac'o spasique, yu'un laj xa spasic jun sloc'obal sdiosic ta unijesbil taq'uinetic’, xiyutun.

¹³ “Jech laj yalbun noxtoc: ‘Laj xa quil ti toj toybaic li achi'iltaque. Solel toj tsots yo'ntonic.

¹⁴ Q'uejo aba loq'uel li vo'ote yu'un ta xcules scotolic. J'ech'el ta jch'aybe o sts'unubalic li' ta banamil. Yan li vo'ote ta jboles ep anich'nab. Jun muc'ta lum ta xbat cu'un. Xjelov to jech yepal ta jboles jech chac c'u cha'al li achi'iltac li'i. Ta xcac'be ep stsatsalic noxtoc’, xiyutun.

¹⁵ “C'alal liyal tal ta vits ti bu tsaneme, te quich'oj yalel tal li cha'pech ton ti bu ts'ibabil scotol li c'usi xchapanoj Muc'ul Diose.

¹⁶ Pero c'alal laj quil ti ataoj xa ep amulic ta stojol li Muc'ul Diose, ti apasojbeic xa sloc'obal jcot unin vacax ta unijesbil taq'uinetique, la jna' ti yu'un xa laj acomtsanic li lequil be yu'un Muc'ul Diose.

¹⁷ Jech la jip ta banamil li cha'pech ton quich'oj yalel tale. Biq'uitic la jlilin ta asatic.

¹⁸ Ts'acal lic jquejan jba ta stojol Muc'ul Dios jech chac c'u cha'al ta jpas ono'oxe. Cha'vinic (40) c'ac'al xchi'uc cha'vinic (40) ac'ubal te oyun. Mu'yuc c'usi la jve'; mu'yuc c'usi laj cuch'. Pero vo'oxuc ta scoj amulic ti jech la jpase, yu'un laj apasic c'usi chopol ta sat li Muc'ul Diose; laj asa'beic sc'ac'al yo'nton.

¹⁹ Li vu'une lixi', yu'un ivinaj ti bats'i tsots ilinem ta atojolic li Muc'ul Diose yu'un jutuc xa mu laj yulesoxuc o acotolic. Pero li Muc'ul Diose laj to ya'ibun yan velta li jc'ope.

²⁰ Jech noxtoc bats'i tsots i'ilin ta stojol li Aarone; jutuc xa mu la smil o. Pero li vu'une laj to jpoj.

²¹ Jech lic jtsac li sloc'obal tot vacax apasojic, ti ja' ta scoj laj ata amulic oe. La jip ochel ta c'oc'. Ts'acal biq'uitic la jlilin, ja' to ti c'alal xco'laj xchi'uc pucuc icom cu'une. Jech bat jip ochel ta uc'um ti te chyal tal ta vitse.

²² “Jech noxtoc c'alal te oyutic ta Tabera, ta Masah, xchi'uc ta Kibrot-hataavae, laj ono'ox asa'beic sc'ac'al yo'nton noxtoc li Muc'ul Diose.

²³ Xchi'uc c'alal laj yalboxuc ti ac'o xa loc'anic tal ta Cades-barnea yu'un ac'o bat avich'ic li banamil ti bu sc'oplal chayac'boxuque, muc xach'unic noxtoc. Laxi'ic; muc xach'unic ti xu' yu'un chascoltaoxuque.

²⁴ Ta sliqueb c'alal lic jchi'inoxuc tale, mu'yuc ono'ox xquil ti lec jch'unej mantaloxuque. ¡Puru jbajmantaloxuc ono'ox ta stojol li Muc'ul Diose!

²⁵ C'alal la sibtasoxuc Muc'ul Dios ti ta ox xayulesoxuc acotolique, li vu'une te quejelun o cha'vinic (40) c'ac'al xchi'uc cha'vinic (40) ac'ubal.

²⁶ Ep la jc'anbe vocol li Muc'ul Diose. Jech laj calbe: ‘Cajval, Muc'ul Dios, mu me xavules li jchi'iltaque yu'un vo'ot laj aloq'ues tal ta mozoil te ta Egipto ta avu'el ta atsatsal.

²⁷ Mu me xch'ay ta avo'nton li avajtuneltaque, ja' li Abrahame, li Isaaque, xchi'uc li Jacobe. Mu xavac' ta avo'nton smulic li jchi'iltac, ti toj toybaique xchi'uc ti toj jbajmantaletique.

²⁸ Yu'un jech mu xliquic ta lo'il li egiptoetic ti bu laj aloq'uesic tale: Li Muc'ul Dios yu'unique muc xu' yu'un laj yac' ochuc ta banamil ti bu sc'oplal chac'bee. Yu'un chopol yo'nton ta stojolic, jech yu'un la sloq'ues batel li' ta Egipto sventa bat yac' chamicuc te ta xocol banamil, mu xiicuc.

²⁹ Yu'un li stuquique ja' lum avu'un. Ja' ateclumal yu'un vo'ot laj aloq'ues tal ta Egipto ta avu'el ta atsatsal’, xichi ta stojol li Muc'ul Diose.