Deuteronomio 8 - Bible in Tzotzil de Chenalhó with Deuterocanon

Muc ta vajuc no'ox chijcuxiutic

¹ “Aq'uic me persa spasel scotol li mantaletic li' laj calboxuc ava'yique, yu'un jech xu' chacuxiic, xchi'uc jech cha'epajic. Jech chac'otic ta jun muc'ta lum, xchi'uc jech xu' avu'unic chavu'uninic li banamil ti yalojbe ono'ox Muc'ul Dios jmoltotactic ta vo'one chayac'boxuque.

² Vuleso me ta avo'ntonic scotol c'u x'elan li be bu laj yic'oxuc tal cha'vinic (40) jabil ta xocol banamil li Muc'ul Dios cu'untique. Le'e ja' sventa la sbic'tajesoxuc, xchi'uc la sq'uelboxuc avo'ntonic, yu'un tsc'an tsna' me chac'an chach'unbeic, o me mu xac'an xach'unbeic li smantaltaque.

³ Ac'o me laj yac'boxuc ep avocolic, me la stsacoxuc vi'nal, pero ts'acal laj yac'boxuc yalel tal manavaj ave'ic ti mu xavotquinique, me ja'uc amoltotaquic ta vo'one muc xotquinic ec, yu'un chac' avilic ti muc ta vajuc no'ox ta xcuxi li cristianoe. Ja' ta xcuxi ta sventa scotol li sc'op chloc' ta ye li Muc'ul Diose.

⁴ Ti butic laxanovic tal cha'vinic (40) jabile, mu'yuc bu xlaj ac'u' apoq'uic xchi'uc mu'yuc bu isitub avacanic.

⁵ Na'ic me, li Muc'ul Dios cu'untique lec la stojobtasoxuc tal ta be jech chac c'u cha'al jun totil ti lec ta stojobtas xnich'one.

⁶ Ja' yu'un tsc'an chach'unbeic scotol li smantaltaque. Ich'ic me ta muc'. Pasic me scotol ti c'u x'elan la xchanubtasoxuc stuque.

⁷ Yu'un ja' chayic'oxuc batel ti bu mero lequil osile, ja' li jun lequil banamil ti oy ep lequil bevo'etic, lequil vo'etic, xchi'uc lequil nio'etic chloc'an ta stenlejaltic xchi'uc ta vitsetique.

⁸ Ja' jun banamil ti lec xac' trigo, cebada, ts'usub, higo, caranato, oliva, xchi'uc pome.

⁹ Te ta osile, mu xlo'ilaj avo'ntonic yu'un bu chata ave'elic xchi'uc c'usitic yan sc'an avu'unic, yu'un te no'ox chataic scotol. Te no'ox chataic tsatsal taq'uinetic ta tonetic, xchi'uc te no'ox chaloq'uesic cobre taq'uinetic ta vitsetic avu'unic.

¹⁰ C'alal me laj avo'ntonic ta ve'ele, lec noj ach'utic chava'yic. Pero ja' tsc'an chavalbeic slequilal, tsc'an chavich'ic ta muc' li Muc'ul Dios cu'untique yu'un toj lec li osil laj yac'boxuque.

Taq'uiel ta sventa ti mu me xch'ay ta yo'ntonic Diose

¹¹ “Q'uelo me abaic. Mu me xch'ay ta avo'ntonic li Muc'ul Dios avu'unique. Mu me xacomtsanic spasel li mantaletic yu'une xchi'uc li c'usitic yan yaloj ac'o apasique, ja' ti laj xa calboxuc ava'yic li' ta orae.

¹² C'alal chlaj avo'ntonic ta ve'ele, lec noj ach'utic chavayic, xchi'uc jun avo'ntonic te nacaloxuc ta anaic ti bu chlic ameltsanique.

¹³ Xchi'uc chavilic ti ep chbol li avacaxique li achijique, xchi'uc li saquil taq'uin, li c'anal taq'uin avu'unique, xchi'uc scotol li c'usitic yan oy avu'unique,

¹⁴ Pero mu me teuc xlic atoy abaic o, xchi'uc mu me teuc xlic ch'ayuc o ta avo'ntonic li Muc'ul Dios cu'untic ti la sloq'uesoxuc tal ta Egipto bu to'ox tiq'uiloxuc ta mozoile.

¹⁵ Xchi'uc ti laj yac' jelovanic tal ta muc'ta xocol banamil ti toj xi'bal sbae, ti oy ep jti'val chonetic xchi'uc stsequetique, xchi'uc ti mu'yuc vo' tee. Pero laj yac' loc'uc ep vo' ta tsatsal ch'en, jech laj avuch'ic.

¹⁶ Xchi'uc ja' laj yac' manavaj ave'ic te ta xocol banamil ti mu xavotquinique, me ja'uc li amoltotaquic ta vo'onee mu xotquinic ec. Yu'un tsc'an ti ac'o bic'tajanique xchi'uc tsc'an tsq'uelboxuc c'u x'elan avo'ntonic ta stojol, pero ja' sventa alequilalic ic'ot ta ts'acal.

¹⁷ “Mu me jechuc xlic aval ta avo'ntonic: ‘Scotol li jc'ulejaltic li'i, la jtatic ta sventa yu'un toj lec xcac'tic’, mu me xachiic.

¹⁸ Tsc'an chana'ic ti ja' Muc'ul Dios cu'untic laj yac'boxuc atsatsalic ti jech laj ataic scotole. Yu'un ja' ic'ot ta pasel ta atojolic li c'usi xchapanoj ono'ox xchi'uc li amoltotaquic ta vo'onee.

¹⁹ “Pero me chlic ch'ayuc ta avo'ntonic li Muc'ul Dios cu'untique, me ja' chlic avich'ic ta muc' li c'usitic yan cuybilic ta diosetique, vu'un chacalboxuc li' ora ti ta jbel sc'oplal chavich'ic ulesel acotolique.

²⁰ Jech chac c'u cha'al laj yulesan Muc'ul Dios cu'untic li muc'tic lum butic lajelovic tale, ja' no'ox jech chavich'ic ulesel acotolic ec me mu xach'unbeic c'usitic yalojboxuque.