Deuteronomio 6 - Bible in Tzotzil de Chenalhó with Deuterocanon

Sc'oplal mantal ti tsots sc'oplale

¹ “Li'i ja' li mantaletic yu'un Muc'ul Diose xchi'uc li c'usitic yan yalojbun ti ta xcalboxuc ava'yique, yu'un ac'o apasic scotol c'ac'al te ta avosilalic ti bu chayac'boxuque.

² Jech chavich'ic o ta muc' li Muc'ul Dios cu'untique, xchi'uc jech chavich'ic o ta muc' li mantaletic ti laj calboxuc ac'o apasic achi'uc anich'nabic, xchi'uc amomnich'nabic ti jayib c'ac'al cuxuloxuque. Jech xu' chacuxiic ep jabil.

³ Ja' yu'un jchi'iltac, israeletic, pasilanic me batel scotol. Jech lec chabatic, xchi'uc jech xu' chac'otic ta jun muc'ul lum te ta banamil ti bu chloc' ya'lel xchu' vacax, xchi'uc pom jech chac c'u cha'al chloc' vo'e. Yu'un jech ono'ox albilic yu'un Muc'ul Dios li jmoltot jyame'tic ta vo'onee.

⁴ “A'yo ava'ay Israel: Li Muc'ul Dios cu'untique ja' no'ox Ajvalil stuc.

⁵ “C'ano me ta scotol avo'nton li Muc'ul Dios avu'une, ta scotol ach'ulel, xchi'uc ta scotol atsatsal.

⁶ “Ac'o ta avo'nton scotol li c'usitic laj calbot li' ta orae.

⁷ Chanubtaso scotol c'ac'al li anich'nabe. Alilanbo ya'yic scotol, buyuc no'ox oyot, me ta ana, me ta be, me ta avayab, o c'alal chalic.

⁸ Ich'-unuc me avu'un scotol c'ac'al li mantaletique. Chuco ta ac'ob xchi'uc ta ati'ba sventa cht'ab ta avo'nton.

⁹ Ts'ibao ta yoyal ana xchi'uc ta sti' ana.

Li Moisese laj yalbe ti ac'o xch'unbeic smantal Diose

¹⁰ “Li Muc'ul Dios cu'untique ta to xac' ochanic ta banamil ti bu yalojbe ono'ox ta jamal jmoltotic Abraham, Isaac, xchi'uc Jacob ta vo'one ti chac'bee. Ja' li jun banamil ti oy lec muc'tic lumetic toj c'upilic sba, ti muc vo'ocoxuc laj apasique.

¹¹ Li naetique puru lequic li sbel nojemic oe, pero muc vo'ocoxuc laj anojesic. Oy lec joq'uetic ti muc vo'ocoxuc laj ajoq'uique. Oy ep ts'usubetic xchi'uc oliva te'etic ti muc vo'ocoxuc laj ats'unique. Pero vo'oxuc chc'ot ave'ic, chc'ot avuch'ic, jech lec chnoj ach'utic yu'un.

¹² C'alal me ic'ot ta pasel jech chac c'u cha'al laj calboxuque, mu me xch'ay ta avo'ntonic li Muc'ul Dios ti ja' la sloq'uesoxuc tal ta Egipto ti bu to'ox oyoxuc ta mozoile.

¹³ Ja' no'ox xavich'ic ta muc' stuc li Muc'ul Dios cu'untique. Ja' no'ox xaquejan abaic ta stojol. C'alal me oy c'usi chavalic ti chava'anic testigoe, ja' me xavalbeic sbi li Diose.

¹⁴ Mu me ja'uc xbat avich'ic ta muc' li yan diosetique, ti ja' yich'ojic ta muc' li cristianoetic te ta lum yo' bu nopol nacaloxuc chac'ot achi'uquique.

¹⁵ Yu'un li Muc'ul Dios te oy ta atojolique, it'ix yo'nton me ja' chbat avich'ic ta muc' li yan diosetique. Jech xu' ch-ilin ta atojolic, xu' chayulesoxuc o acotolic.

¹⁶ “Mu me xaq'uelbeic yo'nton Muc'ul Dios cu'untic jech chac c'u cha'al la apasic ta Masahe.

¹⁷ Ja' lec junuc avo'nton ch'unbeic li smantaltaque xchi'uc li c'usitic yan yalojboxuc ti tsc'an chapasique.

¹⁸ Ja' me pasic li c'usitic tuq'ue xchi'uc li c'usitic lec chil Diose. Yu'un jech lec chabatic, xchi'uc jech chavich'ic li lequil osil ti yaloj ono'ox Muc'ul Dios chac'be jmoltotactic ta vo'onee.

¹⁹ Xchi'uc jech chac' jatovicuc batel scotol li avajcontraic chtal scontrainoxuc jech chac c'u cha'al yalojboxuc no'ox li Muc'ul Diose.

²⁰ “C'alal me oy chc'ot sc'ac'alil jech ta sjac'boxuc li anich'nabique: ‘¿C'usi sventa ti tsc'an ta jch'untic li mantaletic xchi'uc li c'usitic yan yaloj Muc'ul Dios cu'untique?’, me xiique,

²¹ li vo'oxuque jech xavalbeic: ‘Yu'un li vu'uncutique ochemuncutic to'ox ta mozoil yu'un li faraón te ta Egiptoe. Pero li Muc'ul Dios cu'untique ja' la sloq'uesuncutic tal ta svu'el ta stsatsal stuc.

²² Li vu'uncutique laj quilcutic li muc'tic sq'uelubiltac stsatsal, xchi'uc ti xi'balic sba senyail la spas Muc'ul Dios te ta Egipto ta stojol li faraone xchi'uc li xchi'iltac te ta snae.

²³ Ja' la sloq'uesuncutic tal. Laj yic'uncutic tal li' ta banamil ti yalojbe ono'ox jmoltotactic ta vo'onee. Jech laj yac'bun quich'cutic.

²⁴ Ja' yu'un li Muc'ul Dios cu'untique laj yal ti ac'o jch'untic scotol li mantaletic li'i. Xchi'uc ti ja' ac'o quich'tic ta muc' stuque yu'un jech lec chijbatutic, xchi'uc jech chixchabiutic scotol c'ac'al jech chac c'u cha'al xchabiojutic li' ta orae.

²⁵ Ja' yu'un li vu'utique toj lec ti me bijutic scotol c'ac'ale, yu'un jech ac'o c'otuc ta pasel cu'untic ta stojol Dios li mantaletic li'i, jech chac c'u cha'al yalojbutic ono'ox Muc'ul Dios ti ac'o jpastique’, utic li anich'nabique.