Deuteronomio 34 - Bible in Tzotzil de Chenalhó with Deuterocanon

Li Moisese icham xchi'uc laj yich' muquel

¹ Li Moisese ilic batel ta xocol banamil ta yosilal Moab, imuy ta vits Nebo. Te imuy ta mero jolvits Pisga ti te oy ta stuq'uil Jericoe. Li Muc'ul Diose te lic yac'be sc'upin batel ta nom scotol li yosilal Galaad c'alal to ta yosilal Dane,

² xchi'uc laj yac'be sq'uel batel scotol c'alal ta yosilal Neftalí, Efraín, Manasés, xchi'uc scotol yosilal Judá c'alal to ta muc'ta nab Mediterráneo,

³ xchi'uc Néguev, xchi'uc stenlejaltic ta ti'ti' uc'um Jordán, xchi'uc stenlejal ta Jericó, ja' li lum ti Xantic sbie, xchi'uc c'alal ta Zoar.

⁴ Li Moisese jech i'albat yu'un li Muc'ul Diose: “Le'e ja' li banamil ti calojbe ono'ox Abraham, Isaac, xchi'uc Jacob ti chcac'be li smomnich'nabique. Jech ta jc'an ti ac'o avil ta asat atuc scotol li banamile, ac'o me mu'yuc cha'och batel li vo'ote”, x'utat.

⁵ Li Moisese, ja' li yajtunel Diose, te icham ta Moab jech chac c'u cha'al albil ono'ox yu'un Muc'ul Diose.

⁶ Te laj yich' muquel ta jun stenlejal ta yosilal Moab ta stuq'uil Bet-peor. Me junuc mu'yuc boch'o sna' bu oy smuquinal c'alal to tana.

⁷ C'alal icham li Moisese, yich'oj vacvinic (120) jabil. Mu'yuc maquem sat, mu'yuc lajem stsatsal.

⁸ Li israeletique lajuneb xcha'vinic (30) c'ac'al laj yoc'taic te ta xocol banamil ta Moab li Moisese. Jech ts'acal lec sc'ac'alil laj yoc'taic, laj yat yo'ntonic ti c'alal ichame.

⁹ Li Josué xnich'on Nune, la sta ep sbijil ta stojol li Moisese. Yu'un li Moisese laj ono'ox yac' sc'ob ta sjol li Josuee. Jech li israeletique lic xch'unbeic smantal li Josuee, xchi'uc la spasic scotol li c'usi albil ono'ox yu'un Muc'ul Dios li Moisese.

¹⁰ Pero mu'yuc bu ilic yan j'alc'op te ta Israel jech chac c'u cha'al li Moisés ti la xchi'in sbaic lec ta lo'il xchi'uc li Muc'ul Diose.

¹¹ Xchi'uc mu'yuc yan jech j'alc'op ti i'ac'bat spas ep sq'uelubiltac stsatsal Muc'ul Dios te ta Egipto ta stojol faraón, xchi'uc ta stojol scotol xchi'iltac ta abtel, xchi'uc ta scotol li yosilale.

¹² Xchi'uc mu'yuc boch'o yan jech xco'laj yabtelic jech chac c'u cha'al ti toj muc'tic, ti toj tsotsic c'usi la spas ta stojol scotol li israeletique.