Deuteronomio 32 - Bible in Tzotzil de Chenalhó with Deuterocanon

¹ “Vinajel, a'ibun li jc'ope; banamil, a'yo li c'usi chacalbote.

² “Li bijubtasel cu'une ja' jech ta xyal jech chac c'u cha'al chyal vo'. Li chanubtasel cu'une ja' jech ta xyal jech chac c'u cha'al chyal job osil, jech chac c'u cha'al xlilet vo' chc'ot ta ts'i'laltic, jech chac c'u cha'al xbajlajet vo' chc'ot ta jobeltic.

³ “Ta xcalbe slequilal sbi li Muc'ul Diose: Otquinbeic me smuc'ul li Dios cu'untique.

⁴ Ja' Jchabivanej cu'untic; li stuque lec yabtel. Tuc' c'usi tspas; lec scotol li yabtele. Ja' Dios ti mu sna' x'epalc'opoje. Mu'yuc c'usi chopol oy ta yo'nton. Tuc' yo'nton, melelic scotol c'usi chal.

⁵ “Chopol cristianoetic, bol cristianoetic, vo'oxuc ti laj avaq'uic ta na'leel li Diose, ‘mu snupin ti ja' xnich'nab Dios’, xi ac'oplalique.

⁶ ¿Me ja' stojol Muc'ul Dios chc'ot avu'unic ti jech chapasique? Bol cristianoetic, mu'yuc c'usi xana'ic snopel. ¿Me mu ja'uc Atotic? ¿Me mu ja'uc la spasoxuc? Ja' la spasoxuc, xchi'uc ja' laj yac' acuxlejalic.

⁷ “Q'uelo sutel ava'lupat; Nopo c'usi ic'ot ta pasel ta vo'one. Jac'bo atot yu'un ac'o yalbot; jac'bo moletic yu'un ac'o xcholbot:

⁸ Li Boch'o oy ta vinajele, oy jun velta jech la spas. Laj yac' nacluc ta jujun banamil li cristianoetique. Laj yac'be yil bu c'alal sts'aquil li yosilique; pero mu'yuc xch'ayoj ta yo'nton li israeletique.

⁹ Yu'un li c'usi ja' yu'un Muc'ul Dios ja' li boch'o t'ujbilic yu'une, ja' li smomnich'nabtac Jacobe.

¹⁰ Te la sta tal ta xocol banamil, ja' te ta taqui banamil ti t'ajemic ta tsatsal iq'ue. La spet tal ta sc'ob; la xchanubtas lec. La xchabi tal lec, jech chac c'u cha'al lec ta xchabi yuninal sat.

¹¹ Jech chac c'u cha'al xic ti ta sjoyibta ta vilel li stase, xchi'uc ti ta xchanubtas ta vilel li yalabtaque. Ja' jech li Muc'ul Diose la xlich'an xic' ya'yel. La scolta; laj yic' batel.

¹² “Ja' no'ox stuc Muc'ul Dios la stojobtas batel; mu'yuc yan dios boch'o icoltaatic yu'un.

¹³ Jech laj yic' batel ta stsalel yajcontratac; laj yic' muyel ta svitstical li banamile. Ja' la smac'lin o ta sat li te'etic te ch'iemique. Te ta ch'en la sloq'uesbe tal pom yuch'ic, xchi'uc te ta tsatsal tontic la sloq'uesbe tal aceite.

¹⁴ Ta sme' avacaxic laj ataic queso; ta sme' achijic laj ataic lech. Ta lequil bic'tal chijetic avu'unic la ataic ti'bol ati'ic, xchi'uc ta muc'tiquil chijetic ta Basán xchi'uc ta tot tentsunetic. Ja' laj ave'elinic ti bu toj lequic sat trigoe. Laj avuch'ic li ya'lel ts'usube, ja' li xch'ich'al sat ts'usube.

¹⁵ “Pero iju'p li Jesurune,, ipas ta simarón; solel lec xt'ajajet xchi'uc li sjubenale. Pero la scomtsan li Diose, ja' li boch'o ipasat yu'une; la sbaj comel li Jchabivanej yu'une, li Jcoltavanej yu'une.

¹⁶ Laj yaq'uic it'ixajuc yo'nton; laj yaq'uic ilinuc li Diose, yu'un laj yich'ic ta muc' sloc'obaltac li c'usi toj chopolique.

¹⁷ Ja' la smilbeic smoton li pucujetique, muc ja'uc laj yac'beic li Diose. Ja' laj yac'beic li c'usitic cuybilic ta diosetic ti mu ono'ox xotquinique, ti ach' to sliquele, ti ach' to svulele, ti mu'yuc ono'ox laj yich'ic ta muc' li stot sme'ic ta vo'onee.

¹⁸ “Israel, ich'ay xa ta avo'nton li atote, li boch'o xchabiojote. Ich'ay xa ta avo'nton li boch'o laj yac'bot acuxlejale.

¹⁹ C'alal laj yil li Muc'ul Diose, i'ilin. Jech lic yilinta li squeremetic stsebetique.

²⁰ Jech laj yal: ‘Ta jva'lupatin comel scotolic. Jq'ueltiquic c'uxi chut sbaic. Ta melel ja' chopol cristianoetic. Me jutuc mu jpat co'nton yu'un li jnich'nab le'e.

²¹ Laj yaq'uic it'ixajuc co'nton ta sventa ti laj yich'ic ta muc' li c'usi mu ja'uc diose. Laj yaq'uic ilincun yu'un li sloc'obaltac sdiosique. Jech ec li vu'une ta xcac' it'ixajuc yo'ntonic, yu'un ja' ta xlic quic' li boch'otic muc ja'uc jteclum cu'une. Ta xcac' ilinicuc, yu'un ja' ta xquic' li boch'otic bol cristianoetic ch-ilatique.

²² Li sc'ac'al co'ntone tsanem jech chac c'u cha'al c'oc'. Ta to stsan batel c'alal to ta yavil animaetic. Ta xchic' li banamile xchi'uc li sat c'usi ch'iemique. Ta xac'be sc'ac'al li snaclebtac vitsetique.

²³ Ta jipbe tal ta stojolic scotol li c'usitic chopole; ta jt'ilesbeic batel ta stojolic li flechaetic cu'une.

²⁴ Ta xcac' chamicuc ta vi'nal xchi'uc ta c'ac'al chameletic. Ta x'ulesatic yu'un tsatsal vocoletic. Ta jtac tal ta stojolic jti'val te'tical chon bolometic xchi'uc ora chonetic.

²⁵ Li yalab xnich'nabique ta xlajic ta milel ta espada te ta xoraltic. Puru xi'el cha'yic scotol c'ac'al ta jujun snaic. Ta xchamic li querem tsebetique li mol me'eletic xchi'uc li ololetic ti ta to xchu'unique.

²⁶ La jnop ox ti ta jpuquic batel ta buyuc no'oxe, xchi'uc ta jtu'pbe ox sc'oplalic ta banamil.

²⁷ Pero mu jc'an ti stse'inic xa li boch'o ch-ilinic cu'une; mu jc'an chlic stoy sbaic ta jtojol li cajcontrataque. Naca me jech chalic: ‘Mu ja'uc Muc'ul Dios la spas jech chac le'e; ja' vu'utic la jpastic ta jvu'eltic’, naca me xiic.

²⁸ “Li jun lum Israele ch'ayem yo'ntonic; mu xa xa'ibeic o smelol.

²⁹ Ti bijicuque cha'ibeic smelol; sna'ic c'usi chc'ot ta pasel ti jechuque.

³⁰ ¿C'uxi ivu' yu'un ti jun no'ox la snuts batel ta anil jmile? ¿C'uxi ivu' yu'un ti chib no'ox ijatov batel ta anil yu'unic lajunmile? Ja' no'ox ta sventa li Muc'ul Diose, ja' li Jchabivanej yu'unique. Ja' laj yac'be ta sc'obic li yajcontraique.

³¹ “Li cajcontratique lec sna'ic ti mu xco'laj xchi'uc Jchabivanej cu'untic li jchabivanej yu'unique.

³² Li stuquique ja' jechic jech chac c'u cha'al ts'usubetic ti c'a'emique. Ja' sts'unubal Sodoma xchi'uc Gomorra c'otemic, ja' no'ox tsloq'uesic ch'ail ts'usubetic xchi'uc venenoal ts'usubetic.

³³ Li ya'lel ts'usub yu'unique xco'laj xchi'uc svenenoal ye jti'val chon; ja' jmilvanej jech chac c'u cha'al svenenoal ye ts'inte'etic.

³⁴ “Pero jech laj yal li Muc'ul Diose: ‘Scotol le'e ta jchabi; ta jnac' lec scotol jech chac c'u cha'al taq'uin.

³⁵ Vu'un oy ta jventa ta xcac'be spacol, vu'un jtuc ta xcac'be stoj, ja'o ti c'alal tsta yorail chlaj stsatsalique. Nopol xa yorail ti ch-ulique; nopol xa yorail ti chlajique’, xi li Muc'ul Diose.

³⁶ “Li Muc'ul Diose ta xlic spoj li steclumal c'alal chil mu xa xu' yu'unique. Li Muc'ul Diose ta xc'uxubaj ta yo'nton li yajtuneltac c'alal chil ti chlaj xa li boch'o mu'yuc stsatsalique xchi'uc li boch'o oy stsatsalique.

³⁷ Jech chlic albatuc sc'oplalic: ‘¿Bu oy li diosetic yu'unique? ¿Bu oy li jchabivanejetic yu'unic ti ja' spatoj yo'ntonic yu'une,

³⁸ ti la sve'ic li milbil smoton laj yac'beic ti lec jubenique, xchi'uc ti laj yuch'ic li ya'lel ts'usub laj yac'beique? Ac'o totsicuc tal, ac'o tal coltaaticuc. Ac'o liquicuc tal, ac'o tal chabiaticuc.

³⁹ Vu'un no'ox jtuc Muc'ul Diosun, mu'yuc yan diosetic jech chac c'u cha'al vu'un. Vu'un ta xcac' acuxlejalic; vu'un ta jpoj sutel noxtoc. Vu'un ta xcac' yayijanic; vu'un ta jpoxta noxtoc. Mu'yuc boch'o xu' yu'un tspoj sba loq'uel ta jc'ob.

⁴⁰ Ta jtoy jc'ob ta vinajel; chcal ta jamal ti vu'un cuxulun o sbatel osile.

⁴¹ C'alal ta juxbe ye li espada cu'un ti lec to sts'ayayete, c'alal chichapanvan vu'un ti tuc' chichapanvane, ta jpacbe sutel scotol li cajcontrataque; ta xcac'be stojolic li boch'otic la sbajicune. Ti c'u x'elan yabtelique, ja' jech stojol tsc'anic.

⁴² Ta xatin ch'ich' li flechaetic cu'une; ta xve' ta sbec'talic li espada cu'une, ja' ta xch'ich'al li boch'o chtuch'ique xchi'uc li jchuqueletique, xchi'uc ta sjolic li cajcontratac ti natuben sjolique’, xi li Muc'ul Diose.

⁴³ “Cuxetuc me avo'ntonic cristianoetic ta banamil. Cuxetuc me avo'ntonic vo'oxuc ti steclumaloxuc Diose. Li Diose ta spacbe sutel li boch'o imilbunuc yajtuneltaque. Ta spacbe sutel scotol li yajcontrataque, xchi'uc ta xch'aybe ta yo'nton smul scotol li jteclum yu'une xchi'uc c'alal ta yosilalic”, xi li q'ueoj la sq'uejinta Moisese.

Slajeb chanubtasel laj yac' li Moisese

^44-45 Li Moisés ti la sva'an sba ta stojol scotol xchi'iltac ta israelal xchi'uc li Josué, xnich'on Nune, li q'ueoj la sq'uejintae, la sliques ta sliqueb c'alal ta slajeb.

⁴⁶ C'alal ilaj yo'ntone jech laj yalbe scotol li xchi'iltac ta israelale: “Nopo me lec ava'yic scotol li c'usitic li' laj calboxuc ava'yique. Albeic me anich'nabic ti ac'o spasic scotol c'usi chal li mantaletic laj calboxuque.

⁴⁷ Mu lecuc me mu'yuc tsots sc'oplal ta avo'ntonique yu'un li mantaletic li'i ja' sventa acuxlejalic. Ja' sventa xu' chacuxiic ep jabil te ta avosilic ti chbat avich'ic ta jot uc'um Jordane”, xi li Moisese.

Li Moisese i'ac'bat sq'uel batel yu'un Dios li osil te ta Canaán banamile

⁴⁸ Ta sc'ac'alil no'ox c'alal jech ic'ot ta pasele, jech i'albat yu'un Muc'ul Dios li Moisese:

⁴⁹ “Batan ta vits Abarim. Muyan te ta vits Nebo ta yosilal moabetic te ta stuq'uil Jericoe. Q'uelo batel scotol li osil te ta Canaane, ja' ti chcac'be yich'ic li achi'iltac ta israelale.

⁵⁰ Te ta vits ti bu chbat muyane, te chc'ot chaman, te chatsob abaic xchi'uc scotol li boch'otic oy avu'une jech chac c'u cha'al abanquil Aarón ti icham ta vits Hore; te ibat stsob sbaic scotol xchi'uc li boch'otic oy yu'une.

⁵¹ Yu'un li vo'oxuque achibalic muc tuc'uc xapas abaic ta stojol scotol li achi'iltaquique. Muc xavaq'uicun ta ich'el ta muc' ti c'alal te oyoxuc ta vo'etic ta Meriba-cades ta xocol banamil ta Zine.

⁵² Ja' yu'un ta nom xa no'ox xu' chac'upin batel li osil ti ta xcac'beic achi'iltaque, yu'un li vo'ote mu xu' cha'och batel”, x'utat.