Deuteronomio 31 - Bible in Tzotzil de Chenalhó with Deuterocanon

Li Josuee la stsacbe comel yabtel li Moisese

¹ Li Moisese la sc'opan yan velta li xchi'iltac ta israelale jech laj yalbe:

² “Vu'une quich'oj xa vacvinic (120) jabil. Mu xa xu' cu'un nat chixanov batel ta jujujot ta buyuc no'ox. Jech noxtoc li Muc'ul Diose yalojbun ti mu'yuc chijelov batel ta jot uc'um Jordán li vu'une.

³ Pero li Muc'ul Dios cu'untique ja' ba'yucbe chbat avu'unic. C'alal chajelovic batele, ja' ta stsalboxuc batel scotol yajvaltac li muc'tic lumetique yu'un jech chavich'beic scotol li slumalique xchi'uc li yosilalique. Ja' ba'yucbe ta xbat avu'unic li Josuee yu'un ja' banquilal ta xcom avu'unic jech chac c'u cha'al yaloj ono'ox li Muc'ul Diose.

⁴ Li Muc'ul Diose ja' jech ta spasbe li muc'tic lumetic bu chajelovic batel jech chac c'u cha'al la spasbe li ajvalil Sehón, xchi'uc li ajvalil Og yu'un amorretic ti la slajes scotol c'alal ta yosilalique.

⁵ C'alal me ic'ot ta pasel chayac'boxuc ta ac'obic scotol muc'tic lumetic li Diose, pasic me scotol jech chac c'u cha'al calojboxuc ono'oxe.

⁶ C'alal chatsac xa abaic ta pleito achi'uquique, mu me xaxi'ic. Oyuc me lec stsatsal avo'ntonic; me jutuc mu me xaniquic. Na'ic me ti te oy ta atojolic li Muc'ul Dios cu'untique; me jutuc mu'yuc chascomtsanoxuc atuquic”, xut xchi'iltac li Moisese.

⁷ Li Moisese laj yic' li Josuee. Te ta stojol scotol xchi'iltac jech laj yalbe: “Tsotsan me. Oyuc me stsatsal avo'nton. Yu'un vo'ot chavic' batel scotol li jchi'iltactic te ta banamil ti albilic ono'ox yu'un Muc'ul Dios jmoltotactic ta vo'one ch-ac'batique. Vo'ot chbat avac'be yich'ic scotol li osile.

⁸ Ja' ba'yucbe ta xbat avu'un stuc li Muc'ul Diose; ja' chaxchi'inot o scotol c'ac'al. Mu'yuc chayictaot; mu'yuc chascomtsanot. Ja' yu'un mu me xaxi'; mu me xastsalot li xi'ele”, xut.

Laj yal Moisés ti ac'o yich' aptael smantal Dios ta sjabilal xch'ayubil ilil

⁹ Li Moisese la sts'iba scotol li mantaletique, ja' laj yac'be ta sc'ob li pale levietique, xchi'uc scotol li banquilaletic yu'un israeletique. Yu'un li levietique ja' yich'ojbeic xcaxail li smantal Muc'ul Diose.

¹⁰ Laj yalbe noxtoc li c'usitic tsc'an ac'o spasique, jech laj yalbe: “Ta vucvuc jabil c'alal ja' sjabilal chich' ch'aybel yilic li j'iluviletique, ti c'alal ja'o chapasic q'uin Yaxnaetique,,

¹¹ xchi'uc ti c'alal ja'o yorail te tstsob sbaic scotol jchi'iltactic yo' bu st'ujoj stuc li Muc'ul Diose, ja' me yorail te xavaptaic scotol li mantaletique yu'un ac'o ya'yic scotolic.

¹² Tsobic scotol li jchi'iltactique c'alal ta vinic ta ants, ta ololetic xchi'uc c'alal ta yanlum cristianoetic ti te nacajtic ta avosilalique, yu'un ac'o tal ya'yic scotolic li smantal Muc'ul Dios chavaptaique. Yu'un jech ac'o xchanic yich'el ta muc' li Muc'ul Diose, xchi'uc jech ac'o spasic batel li c'usi cha'yique.

¹³ Ja' no'ox jech ec li avalab anich'nabic ti mu to sna'ic li mantaletique, xu' ta xa'yic ec, yu'un jech ac'o xchanic yich'el ta muc' Muc'ul Dios cu'untic ti jayib c'ac'al chcuxiic te ta avosilic chavich'ic c'alal me lajelovic batel ta jot uc'um Jordane”, xi li Moisese.

Slajeb mantal i'albat yu'un Dios li Moisese

¹⁴ Li Muc'ul Diose jech laj yalbe li Moisese: “Q'uelavil, li vo'ote po'ot xa tsta yorail chacham. Ja' yu'un ic'o batel achi'in li Josué te ta ch'ulna pasbil ta nucule yu'un te ta xcac'be yabtel”, xut. Li Moisés xchi'uc Josuee ibatic ta ch'ulna pasbil ta nucul.

¹⁵ Te ivinaj ta stojolic li Muc'ul Diose. Te laj yac' sba ta ilel ta toc. Li toque la svolan sba te ta sti' li ch'ulna pasbil ta nucule.

¹⁶ Li Muc'ul Diose jech lic yalbe li Moisese: “Li vo'ote po'ot xa chacham. Li achi'iltac li'i j'ech'el me chbolibic o yu'un li diosetic yu'un yanlum cristianoetic te nacajtic ta osil bu chbat yich'ique. Jech chiscomtsanicun o; ta soquesic o scotol li c'usi jchapanoj ta stojolique.

¹⁷ Tsots chlic ilincun yu'unic ta sventa ti jech tspasique. J'ech'el ta jcomtsanic o; j'ech'el ta jch'ayic o ta co'nton. Jech ep ta sta svocolic; ep c'usi chopol chc'ot ta stojolic. Ts'acal jech chlic yalic: ‘Ti vi x'elan toj ep jvocoltique, ¿me mu ja'uc ta scoj ti mu'yuc xa xchi'inojutic li Diose?’, xiic.

¹⁸ C'alal tsta yorail jech chc'ot ta pasel yu'unique, j'ech'el ta jcomtsanic o ta scoj ti chopol c'usitic ta spasique xchi'uc ta scoj ti ja' chich'ic ta muc' ti c'usi cuybil ta diosetique.

¹⁹ “Ja' yu'un li' ta orae, ts'ibao li q'ueoj li'i. Chanubtaso scotol li achi'iltaque yu'un ac'o sq'uejintaic, jech xu' chtun yu'unic sventa chisna'icun.

²⁰ Yu'un c'alal me laj xa'ox cac' ochicuc batel ta banamil ti bu calojbeic ono'ox ta jamal amoltotaquic ta vo'one chcac'beique, ja' ti bu chloc' ya'lel xchu' vacax, xchi'uc pom jech chac c'u cha'al chloc' vo'e, xchi'uc c'alal sve'ojic xa'ox, lec xa'ox noj xch'utic, lec xa'ox jubenic yu'un li c'usitic chloc' tee, ja'o chlic baticuc ta stojol li c'usitic cuybilic ta diose; ja' chlic yich'ic ta muc'. Yan li vu'une chopol chlic yilicun, ta soquesic o scotol li c'usi chapanbil cu'une.

²¹ Pero c'alal chtal ta stojolic li c'usitic chopole xchi'uc li vocoletique, li q'ueoj li'i ja' chtun yu'unic sventa chisna'icun. Li smomnich'nabique ja' chlic sna'ic, chlic sq'uejintaic. Yu'un c'alal mu'yuc to'ox chcac' ochicuc batel ta banamil ti caloj ono'ox chcac'beique, jna'oj xa ono'ox bu to c'alal chbat li snopel yu'unique”, xi li Muc'ul Diose.

²² Ta sc'ac'alil no'ox c'alal jech i'albat yu'un Dios li Moisese, lic sts'iba li q'ueoje. Laj yac'be xchan scotol li xchi'iltaque.

²³ Li Muc'ul Diose lic yalbe mantal noxtoc li Josué, ja' li xnich'on Nune, jech laj yalbe: “Tsotsan me, mu me xaxi'. Yu'un vo'ot chavic' ochel scotol achi'iltac ta israelal te ta banamil ti bu caloj ono'ox chcac'beique. Oyuc me stsatsal avo'nton, vu'un chajchi'inot”, xut.

²⁴ C'alal la sts'iba ta vun scotol mantaletic yu'un Dios li Moisese,

²⁵ jech laj yalbe li levietic ti sventainojbeic xcaxail smantaltac Diose:

²⁶ “Ich'ic li svunal mantaletic li'i. Aq'uic ta sc'al li xcaxail c'usi xchapanoj Muc'ul Diose yu'un jech te ac'o oyuc o. Ja' sventa chana'ic o c'usi chc'ot ta pasel ta atojolic.

²⁷ Yu'un jna'oj ti vo'oxuc mero jbajmantaloxuque, ti jtoybaoxuque. Yu'un c'alal li' to cuxulun ta atojolique, ep ono'ox laj atoy abaic ta stojol li Muc'ul Diose. Buuc xa me lichame, ¿c'u to x'elan chabatic?

²⁸ Iq'uic tal scotol li moletic xchi'uc li banquilaletic yu'un jujuchop jchi'iltactique yu'un ta xcalbe ya'yic scotol li c'usitic laj calboxuc ava'yic li'i, xchi'uc ac'o sva'anic ta testigo yu'unic li vinajele xchi'uc li banamile.

²⁹ Yu'un ti c'alal chamenun xa'oxe, jna'oj ti ta soquic o ta j'ech'ele. Chlic scomtsanic li lequil be ti laj calbeic ac'o stamic batele. Xchi'uc jna'oj noxtoc ti ta ono'ox xtal vocoletic ta stojolic ta yan c'ac'al ta scoj ti chlic sc'ac'al yo'nton Muc'ul Dios yu'unic ta sventa li c'usitic chopol tspasique”, xi li Moisese.

Li Moisese iq'uejin ta stojol xchi'iltac

³⁰ Li Moisese lic q'uejinuc ta stojol scotol xchi'iltac ta israelal ti c'alal ja'o te jmoj tsobolique. Lic sliques ta sliqueb c'alal to ta slajeb. Jech chal li q'ueoje: