Deuteronomio 30 - Bible in Tzotzil de Chenalhó with Deuterocanon

C'usi tsc'an tspas israeletic sventa xu' tstaic yan velta li bendicione

¹ “C'alal me ic'ot ta pasel ta atojolic scotol li c'usitic laj calboxuc ava'yique, ja' li bendición xchi'uc li vocoletic ti laj xa cac'boxuc at'ujique, pero me chlic asutes avo'ntonic te ta yantic banamil yo' bu chaspucoxuc batel li Muc'ul Dios cu'untique,

² me chlic ach'unic ta scotol ajol avo'ntonic, xchi'uc c'alal ta avalab anich'nabic scotol li c'usitic chacalboxuc ava'yic li' ta orae,

³ li Muc'ul Diose ta xlic sjelboxuc li avocolique. Ta xlic yich'oxuc ta c'ux yan velta. Ta xlic stsoboxuc loq'uel tal yan velta te ta yantic banamil ti bu chaspucoxuc batele.

⁴ Ac'o me toj nom chavictaic comel li alumalic ti bu chapuc abaic batel ta yan to jujujot sti' banamile, pero te to chbat yic'oxuc tal li Muc'ul Diose. Te to chbat st'unoxuc tal acotolic.

⁵ Li Muc'ul Diose ta xlic yic'oxuc sutel tal yan velta te ta banamil ti bu laj to'ox yac'be li amoltotaquic ta vo'onee. Ja' chvul avich'ic yan velta ec li vo'oxuque. Scotol chlic ataic yan velta. Xchi'uc ech'em to chac' boluc anich'nabic, ja' mu sta jech ibolesbat xnich'nabic li amoltotaquic ta vo'onee.

⁶ Chascomtsanboxuc o ta avo'ntonic achi'uc anich'nabic xchi'uc amomnich'nabic li c'usi xchapanoj ono'oxe. Te chcom o jech chac c'u cha'al jun marca, yu'un jech xu' chlic ac'anic o ta scotol ajol avo'ntonic. Jech xu' chacuxiic.

⁷ Li Muc'ul Diose ja' ta xac' c'otuc ta stojol avajcontraic scotol li vocoletic laj calboxuc ava'yique xchi'uc ta stojol li boch'otic laj yilbajinoxuc ta sc'ac'al yo'ntonique.

⁸ Yan li vo'oxuque chasutic tal ta stojol li Muc'ul Diose. Chlic ach'unbeic li c'usitic chayalboxuc ava'yique, xchi'uc chlic anopes abaic batel ta xch'unel scotol li smantaltac li' chacalboxuc ava'yic ta orae.

^9-10 Me jech chapasique, li Muc'ul Diose chac' ayinuc scotol c'usitic oy avu'unic. Lec chbat scotol li c'usitic chapasique, xchi'uc lec chch'i avol anich'onic, xchi'uc lec chbol yol ats'unub avovolic, xchi'uc lec chac' sat scotol c'usitic chats'unic. Me chach'unbeic c'usitic yalojboxuc li Muc'ul Diose, xchi'uc me chapasic scotol li smantaltaque xchi'uc li c'usitic yaloj ti li' ts'ibabil ta vune, xchi'uc me chlic avich'ic ta muc' ta scotol ajol avo'ntonique, ta melel li Muc'ul Dios cu'untique xcuxet no'ox yo'nton chlic yac'boxuc c'usitic lec jech chac c'u cha'al xcuxet no'ox yo'nton laj yac'be c'usitic lec li amoltotaquic ta vo'onee.

¹¹ “Li mantaletic laj calboxuc ava'yic li' ta orae, ma'uc toj tsots ta ch'unel ta aventaic, ma'uc toj nom oy ta atojolic.

¹² Mu persauc jech chavalic: ‘¿Boch'o xu' chmuy batel ta vinajel cu'untic yu'un chbat yich'butic yalel tal li mantaletic sventa chcotquintic, xchi'uc sventa chlic jch'untic batel c'usi chale?’, mu xachiic.

¹³ Xchi'uc muc ta jotuc to nab chbat asa'ic tal yu'un jech ac'o avalic: ‘¿Boch'o xu' yu'un chjelov batel ta jot nab yu'un chbat yich'butic jelovel tal sventa xu' chcotquintic, xchi'uc sventa chlic jpastic batel li c'usi chale?’, mu xachiic.

¹⁴ Yu'un li sc'ope nopol oy ta atojolic, te oy ta aveic, te oy ta avo'ntonic sventa ac'o apasic scotol li c'usitic chale.

¹⁵ “A'yo ava'yic, li' ta orae chacac'boxuc at'ujic li c'usi chac'anique: ¿me ja' li cuxlejale xchi'uc lequilale, o me ja' li lajel, xchi'uc c'usitic chopole?

¹⁶ Me chach'unic scotol li c'usitic chacalboxuc ava'yic li' ta orae, xchi'uc me j'ech'el chac'anic o li Muc'ul Diose, me chapasic scotol li mantaletic yu'une xchi'uc li c'usitic yan yaloje, li Muc'ul Diose chac' cuxianic, xchi'uc chac' boluc ep avalab anich'nabic. Chayac'boxuc ep bendición te ta avosilic ti bu chayac'boxuque.

¹⁷ Pero me mu xavich'ic ta muc' li c'usitic laj xa calboxuc ava'yique, me ja' chavac' abaic ta stojol li c'usitic cuybilic ta diose, me ja' chlic avich'ic ta muq'ue, me ja' chlic aquejan abaic ta stojole,

¹⁸ chacalboxuc ta jamal li' ta ora ti ta persa chachamique. Mu jaluc chac'upinic li avosilic chavich'ic c'alal me lajelovic ta jot uc'um Jordane.

¹⁹ Li c'ac'al li'i, ta jva'an ta testigo ta atojolic li vinajel xchi'uc li banamile yu'un laj xa cac'boxuc at'ujic li c'usi chac'anique: ¿Me ja' chac'anic li cuxlejale, o me ja' chac'anic li lajele? ¿Me ja' chac'anic li bendicione, o me ja' chac'anic li stojol mulile? Ja' lec ja' c'anic li cuxlejale yu'un jech chacuxiic li vo'oxuque xchi'uc li anich'nabique xchi'uc li amomnich'nabique.

²⁰ Ja' me c'anic li Muc'ul Dios avu'unique. Ch'unbeic li c'usi chayalboxuque, xchi'uc junuc avo'ntonic o ta stojol yu'un ja' te oy li acuxlejalique, xchi'uc ja' ta sventa xu' chacuxiic ep jabil te ta banamil ti yalojbe ono'ox ta jamal amoltotaquic ta vo'onee, ja' li Abrahame, li Isaaque xchi'uc li Jacobe”, xut xchi'iltac li Moisese.