Biblia Todo Logo
Bìoball air-loidhne

- Sanasan -

Deuteronomio 28 - Bible in Tzotzil de Chenalhó with Deuterocanon


Bendición tsta boch'o chch'unbe smantal Dios
( Lv 26.3-13 ; Dt 7.12-24 )

1 “Me ta melel chach'unbeic scotol c'usitic chayalboxuc li Muc'ul Dios cu'untique, xchi'uc me chach'unic scotol li mantaletic li' chacalboxuc ava'yic ta orae, vo'oxuc muc' chac'otic yu'un scotol li yantic lum li' ta banamile.

2 Jech noxtoc ta xvul ta atojolic, ta xavich'ic scotol li bendición ta sventa ti chach'unbeic scotol li c'usitic yalojboxuc Muc'ul Dios cu'untique.

3 Chavich'ic bendición te ta alumalic xchi'uc ta avosilic.

4 Chich' bendición avalab anich'nabic xchi'uc scotol c'usitic chats'unic. Xchi'uc lec chch'i yalab sme' avacaxic, xchi'uc achijic, xchi'uc scotol li c'usitic yan oy avu'unique.

5 Chich' bendición li amochique xchi'uc li yavil bu chavots'ic arinae.

6 Chich' bendición scotol li c'usitic chapasique.

7 “Li Muc'ul Diose chayac'boxuc ta ac'obic avajcontraic ti c'alal tsc'an chastsacoxuc ta pleitoe. C'alal chtal scontrainoxuque, lec chapalic tal. Jmoj xcholoj sbaic tal scotolic, pero ta xjatovic batel ta anil avu'unic; tanpuc ta xbatic ta anil.

8 “Li Muc'ul Diose chac'be bendición li yavil c'usitic chloc' avu'unique xchi'uc scotol li avabtelique, xchi'uc chac' ti xcuxet no'ox avo'ntonic chacuxiic te ta avosilic yo' bu chayac'boxuque.

9 “Me scotol avo'nton chach'unbeic li smantaltaque xchi'uc me ja' chats'aclinic oe, li Muc'ul Diose staoj yav yo'nton o ti vo'oxuc no'ox ch'ul chayiloxuc jech chac c'u cha'al yalojboxuc ono'oxe.

10 Ja' yu'un scotol li lumetic li' ta banamile chilic ti ventainbiloxuc yu'un li Muc'ul Diose, jech ta xlic ochuc xi'el ta yo'ntonic.

11 Li Muc'ul Diose chac' ta ilel slequil yo'nton ta atojolic. Chac' boluc ep avalab anich'nabic, xchi'uc chac' alajuc ep avacaxic, xchi'uc chac' epajuc c'usitic chats'unic ta avosilic ti yalojbe ono'ox amoltotaquic ta vo'one chayac'boxuque.

12 Ta sjambe sti' li yav sc'ulejale, ja' li vinajele, jech ta xac' tal lec vo' ta avosilic ti c'alal yoraile, yu'un jech tsta bendición li ats'unub avovolique. Jech ch-epaj li c'usitic oy avu'unique. Jech chlic avac'beic xq'uex epal muc'tiquil lumetic, li vo'oxuque mu'yuc c'usi chaq'uexbeic.

13 Li Muc'ul Diose vo'oxuc chayac'oxuc ta sliqueb; muc vo'coxuc chac'otic ta slajeb. Persa vo'oxuc banquilaloxuc yu'un li yantique; mu xu' chac'otic ta its'inal. Ja' jech chc'ot ta pasel me chach'unbeic scotol smantal li Muc'ul Dios cu'untic li' laj calboxuc ava'yic ta orae xchi'uc me chachanic spasel scotole,

14 xchi'uc me mu xacomtsanic spasel oe, me mu ja'uc chbat ats'aclinic li c'usitic cuybilic ta diosetique, xchi'uc me mu ja'uc chbat avich'ic ta muq'ue.


Stojol mulil ta sventa boch'o mu xch'unbe smantal Dios
( Lv 26.14-46 )

15 “Pero me mu xach'unbeic c'usitic laj yalboxuc li Muc'ul Dios cu'untique, me mu xapasilanic batel li smantaltac laj calboxuc ava'yic li' ta orae, ta me xtal ta atojolic scotol li vocoletic li'i:

16 Chopol chabat te ta alumalic, xchi'uc mu'yuc c'usi lec chataic te ta avosilic.

17 Mu'yuc c'usi lec chc'ot ta pasel te ta amochic xchi'uc ta yavil yo' bu chavots'ic li arinae.

18 Mu'yuc lec chch'i avalab anich'nabic, xchi'uc c'usitic chats'unic, xchi'uc yol avacaxic, yol achijic, xchi'uc scotol ats'unub avovolic.

19 Scotol li c'usitic chapasique chopol chbat scotol.

20 “Li Muc'ul Diose ta stacboxuc tal tsots vocol ta atojolic me laj avictaic comel ta scoj ti chopol c'usitic chapasique. Scotol li c'usi chapasique, chopol chbat avu'unic scotol, xchi'uc ep chavat avo'ntonic ta sventa, yu'un tsoc scotol li avabtelique. Xchi'uc mu xa jaluc chbat; chavich'ic ulesel o acotolic.

21 Li Muc'ul Diose ta stacboxuc tal c'ac'al chamel ta atojolic; ja' chayulesoxuc acotolic te ta avosilalic ti bu chavich'ique.

22 Jech noxtoc ta stacboxuc tal chamel ti ta ora no'ox chch'amaje, jech chachamic yu'un. Xchi'uc chtal tsatsal c'ac'ubel, xchi'uc chamel ti chc'ac'uban abec'talic yu'une. Xchi'uc chtal ep q'uepelaltic, xchi'uc xchamel atrigoic, xchi'uc ep yantic tsatsal chameletic. Ja' chayuts'intaoxuc, ja' to ti me la'ulic o yu'un acotolique.

23 Li vinajel le' ta toyole mu xa xayac'boxuc tal vo'. Li banamil li' ta olone, mu xa xayac'boxuc sat scotol li c'usi chats'unique.

24 Li Muc'ul Diose ja' xa no'ox chastacboxuc yalel tal puru pucuc xchi'uc yi' ta xq'uexol li vo'e, ja' to me lalajic o acotolique.

25 Xchi'uc chac' j'ech'el chaxpech'oxuc o ta teq'uel li avajcontraique. C'alal ja' to cha'ochic batel yu'un chbat apasic pleito achi'uquique, lec chapaloxuc; lec acholoj abaic ochel. Pero chajatovic sutel tal ta ora yu'unic. Solel tanpuc chajatovic batel ta anil acotolic. Ta xavaq'uic xi'icuc yantic ajvaliletic li' ta banamil.

26 Li abec'talique ti'bil ta mutetic ta xlaj, xchi'uc ta jti'val bolometic. Mu'yuc boch'o ta sibtasic batel.

27 “Li Muc'ul Diose ta xac' avich' avocolic ta epal c'a'el chameletic jech chac c'u cha'al ic'ot ta pasel ta stojol li egiptoetique. Xchi'uc chastaoxuc ep ch'ieletic, ch'inin, tan-se'p xchi'uc spintoal ti mu stac' poxtael oe.

28 Jech noxtoc chac' pasanic ta chuvaj xchi'uc ta ma'sat, xchi'uc chapasic ta bol cristiano.

29 Jeche' xamachlajetic c'alal chaxanovic jech chac c'u cha'al li boch'o chanov ta ic' osile. Scotol li c'usitic chapasique mu'yuc lec chloc' avu'unic. Scotol c'ac'al abul no'ox aba o chava'yic. Yan boch'o tstunes li c'usitic oy avu'unique. Mu'yuc boch'o xu' chaxc'uxubinoxuc o.

30 Ac'o me chapal xa avu'unic chanupinic xchi'uc jun tseb, pero yan boch'o chaxchi'inboxuc ta vayel li tseb ti sc'oplal chaviq'uique. Ac'o me chapas lec anaic, pero mu'yuc chanainic. Ac'o me chats'un ep ats'usubic, pero mu'yuc chatulbeic sat.

31 Ta asat chasmilboxuc li avacaxique, pero mu'yuc chati'ic me jutebuc. Te aq'ueloj chasnitboxuc batel li aburoique, pero mu'yuc xa chasutesboxuc o. Scotol li achijique ta xich'ic batel li avajcontraique, pero mu'yuc boch'o chascoltaoxuc ta spojel sutel tal.

32 Scotol li aquerem atsebique te ta asatic ta xich'ic aq'uel batel ta sc'ob yanlum cristianoetic. Ac'o me chac to aq'uelbe ava'yic sat, pero mu xa c'u xavutic o.

33 Scotol li c'usi chats'un ta avosilique xchi'uc li c'usitic chloc' ta avabtelique ja' ta xtal sve'ic yan cristianoetic ti mu xavotquinique. Xchi'uc scotol c'ac'al oy avocolic ta uts'intael xchi'uc ta lo'lael yu'unic.

34 C'alal chavilic scotol ti jech chc'ot ta pasele, chapasic ta chuvaj yu'un.

35 Li Muc'ul Diose chac' stsacoxuc c'a'al chinetic ta sjoljol avacanic, xchi'uc ta sc'uniltac avacanic, xchi'uc ta scotol abec'talic, pero mu xu' avu'unic xpoxtael.

36 “Li Muc'ul Diose chac' ti ac'o avich'ic chuquel batel c'alal ta ajvalil avu'unic ta yantic banamil ti bu mu xavotquinic oe, me ja'uc li amoltot ayame'ic ta vo'onee muc xotquinic ec. Te chavich'ic sujel ti ac'o tunanic yu'un li c'usitic cuybilic ta dios ti pasbilic ta te' xchi'uc ta tone.

37 Toj i'lal abaic chayiloxuc ti c'alal te oyoxuc ta slumalique. Chaslabanoxuc, chasbolc'optaoxuc li cristianoetic ta scotol lumetic bu chaspucoxuc batel li Muc'ul Diose.

38 Ac'o me chats'unic ep li c'usitic chac'anique, pero jutuc no'ox chloc' avu'unic yu'un chlaj ta c'ulubetic scotol.

39 Chats'unic ep ts'usubetic avu'unic, xchi'uc chachabiic lec, pero me jutuc mu'yuc chavuch'beic ya'lel. Mu'yuc chatulbeic sat yu'un chlaj ta xchanul scotol.

40 Ac'o me oy ste'el olivaetic avu'unic ta scotol li avosilique, pero mu'yuc chatunesbeic sperfumeal yu'un mu'yuc chatulbeic li sate. Te chlilij yalel stuc scotol.

41 Ch-ayin ep aquerem atsebic, pero mu'yuc te chachi'inic. Mu'yuc chabalinic yu'un chucbil chbatic scotol ta yantic banamil.

42 Scotol li te'etic xchi'uc li jsatinom te'etic ta avosilalique chlaj ta c'ulub scotol.

43 Scotol li yanlum cristianoetic te nacajtic ta avosilalique ja' chlic ayinuc lec stsatsalic. Li vo'oxuque chlic lajuc atsatsalic.

44 Li stuquique ja' oy c'usi chlic yac'boxuc aq'uexic. Pero li vo'oxuque mu'yuc c'usi oy avu'unic ti xu' chavaq'uic ta q'uexele. Li stuquique ja' chc'ot ta ba'yucbe avu'unic; li vo'oxuque slajeb chac'otic.

45 “Scotol li vocoletic li'i ja' ta xtal ta atojolic scotol; acotolic ta staoxuc. Chavich' lec avocolic, ja' to me la'ulic yu'un acotolique. Ti jech chc'ot ta pasele, ja' ta scoj ti mu xach'unbeic smantal li Muc'ul Dios cu'untique, xchi'uc ti mu xac'an xapasic li c'usitic yalojboxuque.

46 Scotol li vocoletic le'e ja' jun tsots preva chtal ta atojolic sbatel osil xchi'uc anich'nabic xchi'uc amomnich'nabic,

47 ta scoj ti mu xavich'ic ta muc' ta xcuxetel avo'ntonic ti c'alal laj yac'boxuc ep c'usitic oy avu'unique.

48 Ta persa ja' chlic spasoxuc ta mantal li avajcontraic ti tstac tal ta atojolic Muc'ul Diose. Chavich' avocolic ta vi'nal, ta taqui-o'nal, xchi'uc mu'yuc bu chata ac'u' apoq'uic, ep yantic vocoletic chavich'ic. Li Muc'ul Diose chac' avich'ic vocol ta tsots mozoinel ja' to me la'ul acotolique.

49 Li Muc'ul Diose ta stacboxuc tal ta atojolic cristianoetic ta yan banamil ti bats'i nom nacalique, ti mu xava'ibeic sc'opique. Ja' jech ta ora no'ox ta xtal ta atojolic jech chac c'u cha'al chvil jcot xic.

50 Li cristianoetic ta xtal ta atojolique toj xi'balic sba; mu x'ich'vanic ta muc'. Mu xich' ta muc' li banquilaletic avu'unique, xchi'uc me jutuc mu'yuc chc'uxubinic li ololetique.

51 Ta xvul sti'ic scotol yalabtac li ats'unub avovolique xchi'uc scotol li c'usitic chloc' ta avosilique, ja' to me yav xa chcom yu'unique. Mu'yuc c'usi chascomtsanboxuc me jutuc, me trigo, me ya'lel ts'usub, me aceite, me yol sme' avacaxic, o me achijic. Scotol ta slajesic. Jech chachamic ta vi'nal acotolic.

52 “Ta sjoyibtaic scotol li lumetic avu'unique ja' to me ivuc' yu'unic li toyol coraltonetic ti amacoj o alumalique xchi'uc ti ja' apatoj o avo'ntonic yu'une. Ta sjoyibtaic scotol. Ta svuq'uesic scotol li lumetic ta avosilalic ti laj yac'boxuc Muc'ul Diose.

53 C'alal te setelic ta joyob li avajcontraique, te chalajic ta vi'nal, yu'un mu'yuc bu chata ave'elic. Ja' chlic ati' li aqueremic, atsebic ti laj yac'boxuc Muc'ul Dios cu'untique.

54 Li boch'o biq'uit yac'oj sba ta atojolique xchi'uc ti lec yo'ntone chlic socuc sjol. Chopol chlic yil li xchi'iltac ta voq'uele, xchi'uc li yajnil ti lec sc'anoje, xchi'uc li xnich'nabtac ti te to comen yu'une.

55 Mu'yuc bu chac'be sti' ec li sbec'tal xnich'on ta sti'e. Ti jayib c'ac'al te ta scontrainoxuc li avajcontraique, mu'yuc c'usi chatunic o. Puru vocol no'ox chavich'ic te ta scotol li lumetic avu'unique.

56 Ac'o me oy junuc ants te ta atojolic ti toj c'upil sba, xchi'uc ti lec tsmeltsan sbae, ti mu sc'an spic, mu sc'an stec' banamil c'alal mu'yuc xonobe, chopol chlic yil li smalal xchi'uc li yalab ti lec to'ox sc'anoje.

57 Jech mu'yuc chac'be sti'ic li yol chvoc' yu'une xchi'uc li sme' yole; ta snac' sba sventa ta sti' stuc. Jech mu'yuc c'usi chataic o ta ve'el ti c'alal ja'o te ta svuq'uesic scotol lumetic avu'unic li avajcontraique.

58 “Me mu xanopes abaic ta spasel scotol li chanubtaseletic ts'ibabil li' ta vune, xchi'uc me mu chavich'beic ta muc' smuc'ul, yutsil sbi li Muc'ul Diose,

59 ta stacboxuc tal tsots avocolic toj xi'balic sba. Xchi'uc ta stacboxuc tal tsots chameletic ti toj xi'balic sba ti mu stac' poxtael oe. Chc'ot ta atojolic li vo'oxuque xchi'uc li amomnich'nabtaquique.

60 Xchi'uc chac' licuc ta atojolic scotol li vocoletic, li chameletic ti laj yich'ic li egiptoetique. Toj ep chaxi'ic yu'un. Chac' avocolic scotol c'ac'al.

61 Jech noxtoc ta stacboxuc tal ta atojolic yantic vocoletic, xchi'uc yantic tsatsal chameletic ti mu xalbe sc'oplal li' ta svunal chanubtasele, ja' to me laj yulesoxuc o acotolique.

62 Vo'oxuc li israeloxuque, ti bats'i epoxuc, ti mu xalajic ta atel jech chac c'u cha'al c'analetic ta vinajele, chabic'tajic ta jyalel. Mu'yuc xa ep chacomic ta scoj ti mu xach'unbeic c'usitic laj yalboxuc li Muc'ul Dios cu'untique.

63 Ja' jech chac c'u cha'al toj xcuxet no'ox yo'nton laj yac'boxuc alequilalic, xchi'uc toj xcuxet no'ox yo'nton laj yac' epajanic li Muc'ul Diose; ja' jech xcuxet no'ox yo'nton chayulesoxuc, xchi'uc chasyavnaijesoxuc acotolic noxtoc. Chavich'ic bulel loq'uel acotolic te ta banamil yo' bu chayac'boxuc li Muc'ul Diose.

64 Li Muc'ul Diose chaspucoxuc batel acotolic ta yantic banamiletic; ta jot sti', c'alal to ta yan to jot sti' chaspucoxuc batel. Te chc'ot avich'ic ta muc' li c'usitic muc ja'uc Diose, ja' ti pasbilic ta te' xchi'uc ta tone, ti muc xotquinic li amoltot ayame'ic ta vo'onee.

65 Ti jayib c'ac'al te chanaquiic ta yantic banamile, mu'yuc bu jun avo'ntonic xchi'uc mu'yuc cux o'nton o avu'unic. Yu'un li Muc'ul Diose chac' ti puru xi'el chava'yic scotol c'ac'ale. Toj at-o'ntonoxuc, xchi'uc toj abul abaic ta asatic scotol c'ac'al.

66 Scotol c'ac'al toj chib sc'oplal chava'yic me cuxuloxuc, o me chalajic ta milel. Ta c'ac'al ta ac'ubal puru xi'el chava'yic. Me jutuc mu'yuc bu chava'yic ti bats'i lec jun avo'nton cuxuloxuc tee.

67 Bats'i toj tsots xi'el chava'yic scotol c'ac'al ta sventa li c'usitic chavil ta asatique. C'alal ja' to no'ox tsacub osile, jech chavalic: ‘¡Ee, oyuc la ca'tic c'uxi ic'ubuc osil ta anile!’, xachiic. Ta ac'ubaltique jech chavalic noxtoc: ‘¡Ee, oyuc la ca'tic c'uxi sacubuc osil ta anile!’, xachiic.

68 Ac'o me laj yalboxuc Muc'ul Dios ti mu'yuc chasutic yan velta ta sbelal li Egiptoe, pero chac' ti ta puru barco chasutic batel yan velta tee. Xchi'uc te chavich'ic chonel batel ta mozoil yu'un li avajcontraique, pero mu junuc boch'o tsc'an chasmanoxuc noxtoc”, xut xchi'iltac li Moisese.

Tzotzil Chenalhó DC Bible © Sociedad Bíblica de México, a. c., 2002.

Bible Society of Mexico
Lean sinn:



Sanasan