Deuteronomio 26 - Bible in Tzotzil de Chenalhó with Deuterocanon

Tsc'an chich' aq'uel ta smoton Dios li sba sat c'usi chloc' ta banamile

¹ “C'alal me la'ochic xa ta banamil yo' bu chayac'boxuc li Muc'ul Dios cu'untique, me te xa nacaloxuc oe,

² scotol li sba sat c'usitic ats'unojic ta avosilique, tulic scotol. Ich'ic batel ta jun moch. Bat aq'uic te yo' bu st'ujoj Muc'ul Dios cu'untic sventa chich' ich'el ta muq'ue.

³ Te xac'otic ta stojol li pale ti oy ta sventa li abtele. Jech xc'ot avalbeic: ‘Li' ta xcal ta jamal ta stojol Muc'ul Dios cu'untic ti ochemun xa ta banamil ti bu yalojbe ono'ox jmoltotactic ta vo'one ta xac'bee’, uto.

⁴ Li palee ac'o stsac li moche. Ac'o bat yac' ta stuq'uil scajleb smoton li Muc'ul Dios cu'untique.

⁵ Ts'acal jech xavalic ta stojol li Muc'ul Dios cu'untique: ‘Li jmoltot jyame' ta vo'onee, unin juteb to'ox tsobolic, mu'yuc to'ox epic. Ja' arametic ti puru xanubal tspasique. Ibatic ta Egipto, te c'ot naquiicuc. Pero ts'acal ipasic ta jun muc'ta lum. I'epajic, itsatsubic ta jyalel.

⁶ Pero li egiptoetique laj yuts'intauncutic. Laj yac'buncutic ep jvocolcutic ta mozoil. Solel la xchucuncutic o ta ven tsatsal abtel.

⁷ Ja' yu'un lic jc'anbotcutic vocol, vo'ot li Muc'ul Diosot yu'un jmoltot jyame'cutic ta vo'onee. Laj ava'ibun li jc'opcutique, xchi'uc laj avil ti toj ep jvocolcutique, ti toj abul jbacutic ta uts'intael ta tsatsal abtele.

⁸ Jech laj aloq'uesuncutic tal ta Egipto ta avu'el ta atsatsal, xchi'uc ta sventa ti toj tsots c'usitic laj avac' c'otuc ta pasele xchi'uc ti toj xi'balic sbae.

⁹ Laj avic'uncutic tal li' to c'alale, laj avac'bun quich'cutic li banamil ti bu chloc' ep ya'lel xchu' vacax xchi'uc pom jech chac c'u cha'al chloc' vo'e.

¹⁰ Ja' yu'un laj quich' tal sba sat scotol li c'usitic iloc' cu'un ta cosil ti bu laj avac'bun, vo'ot li Muc'ul Diosot cu'une’, xachiic ta stojol li Muc'ul Diose. “Ta ora xavaq'uic ta stojol Muc'ul Dios cu'untic li moche, te xaquejan abaic ta stojol.

¹¹ Ts'acal xlic apasic lec jun muc'ta q'uin ta sventa scotol li c'usitic oy avu'un achi'uc avajnil anich'nabic ti laj yac'boxuc li Muc'ul Dios cu'untique. Te ac'o xchi'inoxuc li levietique xchi'uc li yanlum cristianoetic ti te nacal ta atojolique yu'un jech co'ol ac'o cuxetuc avo'nton achi'uquic.

Tsc'an chcac'betic Dios li jujun ta lajlajuneb scotol c'usi ta jtatique

¹² “C'alal me iloc' xa oxib jabil ti ja' xa yorail chavaq'uic li jujun ta lajlajuneb scotol c'usitic oy avu'unique, xchi'uc me avoc'ojic xa li jujun ta lajlajuneb sat c'usitic ats'unojique, me avac'ojbeic xa scotol li levietique, xchi'uc li yanlum cristianoetic te nacal ta avosilalique, li me'on ololetique, xchi'uc li me'on antsetic yu'un ac'o sve'ic scotol ec li c'usitic tsc'anic te yo' bu nacaloxuque,

¹³ jech xlic avalic ta stojol li Muc'ul Dios cu'untique: ‘Laj xa jvoc' loq'uel te ta jna scotol li c'usitic sc'oplal ja' avu'une. Xchi'uc laj xa jvoc'be li levietique, xchi'uc li yanlum cristianoetic li' nacalic ta cosilalcutique, xchi'uc li me'on ololetique, xchi'uc li me'on antsetique. La jch'un scotol li c'usitic laj avalbune. Mu'yuc bu la jbaj jchopuc li mantaletic avu'une.

¹⁴ Xchi'uc me jutuc mu'yuc la jve' ti c'alal ja'o chcat co'nton ta sventa oy boch'o icham cu'une, xchi'uc ti c'alal ja'o chcac' jba ta lecubtasele, xchi'uc mu'yuc bu laj cac'be smotonin li animaetique. Muc'ul Dios cu'un, la jch'un, xchi'uc la jpas scotol li c'usitic laj avalbune.

¹⁵ Q'uelo tal avil c'alal to ta vinajel, c'alal to te yo' bu ach'ulna atuque. Ac'buncutic bendición vu'uncutic li israeluncutique, ti t'ujbiluncutic avu'une. Xchi'uc ac'o tal ep bendición li' ta cosilcutic laj avac'buncutique, ja' ti bu chloc' ep ya'lel xchu' vacax xchi'uc pom jech chac c'u cha'al chloc' vo'e. Yu'un jech ono'ox avalojbe li jmoltot jyame'cutic ta vo'onee’, chianic ta stojol li Muc'ul Diose.

Li israeletique ja' jun lum ti ac'bilic bendición yu'un Diose

¹⁶ “Li Muc'ul Dios cu'untique chayalboxuc li' ta ora ti ac'o me apasic li mantaletic li' laj yalboxuque xchi'uc li chanubtaseletique. Pasic me ta scotol ajol avo'ntonic.

¹⁷ Li' ta orae laj xa avalic ta jamal ti ja' no'ox Dios avu'unic o li Muc'ul Diose. Xchi'uc laj avalic ta jamal ti j'ech'el te oyoxuc o ta stojole, ti chach'unbeic scotol li smantaltaque xchi'uc scotol li c'usitic yan yalojboxuque.

¹⁸ Ja' no'ox jech ec li Muc'ul Diose laj xa yal ta jamal li' ta atojolic, vo'oxuc li israeloxuque, ti vo'oxuc mero steclumaloxuc oe, ti lec chayiloxuc o jech chac c'u cha'al yaloj ono'ox ta vo'onee, jech tsc'an ac'o ach'unbeic scotol li smantaltaque.

¹⁹ Xchi'uc chac' c'otanic ta jun muc'ta lum ti puquem sc'oplale, ti ich'bil ta muq'ue, ti mu'yuc boch'o yan jech lec sc'oplal ta scotol li muc'tiquil banamiletic spasoj Muc'ul Diose. Xchi'uc ta xc'ot ta pasel ti vo'oxuc no'ox jun lum voc'biloxuc yu'un li Muc'ul Diose yu'un jech ono'ox yaloj”, xi li Moisese.