Deuteronomio 25 - Bible in Tzotzil de Chenalhó with Deuterocanon

¹ “C'alal me oy boch'o tstsac sbaic ta c'ope, persa tsc'an chbatic ta stojol li jchapanvanejetique yu'un ac'o yich'ic chapanel. Li jchapanvanejetique ac'o yalic ta jamal li boch'o mu'yuc smule, xchi'uc ac'o yac'beic stoj li boch'o oy smule.

² Li boch'o oy smul chc'ote, me nucul tsc'an ta sventa stojol li smule, li jchapanvanejetique ac'o yalic mantal ti ac'o spatan sba ta banamile. Te ta satic ac'o yich' ac'bel nucul li boch'o oy smule. Ti c'u yepal nucul xu' chac'beique, ja' ti c'u yepal oy smule.

³ Ac'o me toj tsots li smule, pero mu me xjelov ta cha'vinic (40) ta moj xavac'beic li nucule, yu'un jech mu toj tsotsuc tstoj smul cha'ay. Xchi'uc jech mu bajbiluc cha'ay; jech mu snop ti mu'yuc xa stu ta asatique.

⁴ “Mu me xavac'beic svozal avacax ti c'alal chavac'be stec' trigo sventa chloc' sbeq'ue.

Mantal ta sventa ac'o smalin smu' c'alal me icham smalal li antse

⁵ “Me oy chib viniquetic xchi'il no'ox sbaic ta voq'uel ti co'ol nacalic ta jun nae, me ichamic junucale, me mu'yuc xnich'on chcom li boch'o chchame, li yajnile mu me smalin yan vinic. Ja' no'ox ac'o smalin li smu'e, yu'un jech xu' chc'ot ta pasel ti jech sc'oplal tsc'an chich' pasele.

⁶ C'alal me ivoc' sba yolique, ja' ac'o yac'be sbiinbe sbi li anima sbanquil, o me yits'ine, yu'un jech mu xch'ay o sbi te ta atojolic boch'o chcham, vo'oxuc li israeloxuque.

⁷ Pero me mu sc'an xic' smu' li vinique, li antse ac'o batuc ta stojol li jchapanvanejetique. Jech ac'o c'ot yalbe: ‘Li jmu'e mu sc'an ti te tsacaluc o sbi li' ta Israel li xchi'il ta voq'uele. Mu sc'an spas li c'usi sc'oplal tspas ta sventa ti ja' jmu'e’, ac'o xiuc.

⁸ Jech li banquilaletic te ta lume, ac'o yiq'uic tal li vinique. Ac'o xchi'inic ta lo'il. Me solel jech yo'nton o mu sc'an xic' li smu'e,

⁹ li antse ac'o nopajuc tal ta sts'el li smu'e. Te ta sat banquilaletic ac'o sloc'be xonob li smu'e, xchi'uc ac'o stubtabe sat. Jech ac'o yalbe: ‘Ja' jech tsc'an chich' pasbel li vinic ti mu sc'an ac'o ayinuc sts'unubal li xchi'il ta voq'uele’, ac'o yut.

¹⁰ Ta sjunul sna ja' jech sbi ta xc'otic o li' ta Israel: ‘Bix acan’, xi sbiic chc'otic.

Yantic mantaletic

¹¹ “Me oy chib viniquetic ta smaj sbaique, me oy boch'o junucal yu'unic chnopaj tal yajnil yu'un chtal spoj li smalale, me la stsacbe ta sc'unil li vinique,

¹² li vo'oxuque mu me xac'uxubinic, persa ac'o c'ocbatuc sc'ob li antse.

^13-14 “Mu me xatunesic sbisubil, xchi'uc skiloal c'usi chamanic c'usi chachonic ti me mu'yuc ts'acale.

¹⁵ Ja' xatunesic ti bu lec ts'acal sbisubile, yu'un jech jal chacuxiic te ta avosilic chayac'boxuc li Muc'ul Dios cu'untique.

¹⁶ Yu'un li boch'otic jech chlo'lavanique, ilinem Muc'ul Dios ta stojolic yu'un ja' tspasic li c'usi mu tuc'uc ta pasele.

I'albatic ti ac'o yulesbeic o sts'unubal li Amaleque

¹⁷ “Li vo'oxuque na'ic me c'usi la spasboxuc li Amalec ti c'alal ja'o chaxanovic tal ta be c'alal laloq'uic tal ta Egiptoe.

¹⁸ Na'ic me ti la stsacoxuc ta pleito ta bee. Lec xa'yic laj yuts'intaoxuc ti c'alal laj yilic lubenoxuc xae, ti mu'yuc xa atsatsalique. Laj yuts'intaic tal ta apatic li boch'otic alubenic xa ta xanubale, ti nom comenique. Me jutuc muc xi'ic yu'un li Dios avu'unique.

¹⁹ Ja' yu'un, c'alal me la sta yorail chayac'boxuc atsalic scotol avajcontraic te ta avosilic yo' bu chayac'boxuc li Muc'ul Dios cu'untique, tu'pbeic o sc'oplal ta banamil li amalequetique. Mu me xch'ay ta avo'ntonic.