Deuteronomio 24 - Bible in Tzotzil de Chenalhó with Deuterocanon

Mantaletic ta sventa boch'o ta xicta sbaic

¹ “Me oy jun vinic ta xic' jun ants, ti ta xnupin lec xchi'uque, pero me ts'acal mu xa sc'an ta scoj ti oy c'usi chopol la stabee, ac'o yac'be svunal ta sventa ti muc xa yajniluque, ac'o stac loq'uel ta sna.

² C'alal loq'uem xa batel ta sna li antse, xu' chmalij ta yan.

³ Pero me co'ol chc'ot ta pasel xchi'uc li xchibal smalale, me mu xa xc'anat noxtoque, me i'ac'bat svunal bu chal ti yictaoj xa sbaique, xchi'uc me itacat xa loq'uel ta sna yu'un li vinique, o me yu'un icham li xchibal smalale,

⁴ mu xu' chlic smalin yan velta li sba smalal to'oxe, yu'un soquem o sc'oplal ta stojol li sba smalale. Me jech ta spase, toj chopol chil li Muc'ul Diose. Li vo'oxuque mu me xavaq'uic socuc sc'oplal li banamil yo' bu chayac'boxuc Muc'ul Dios cu'untique.

Sc'oplal yantic mantaletic

⁵ “Me oy jun vinic ti ja' to inupine, mu to xu' chbat ta paspleito xchi'uc mu to xu' chich' sujel ta spasel c'usiticuc yan abteletic junuc jabil. Te no'ox ac'o oyuc o ta sna sjunul jabil, yu'un jech xcuxet no'ox yo'nton li yajnile.

⁶ “Mu me boch'o sc'anbe sbaic ta prentail smulinoic, o me xcho'ic ti ja' sventa chjuch' o sve'elique. Yu'un me jech tspasique, xco'laj xchi'uc ja' tsc'anbe ta prentail xcuxlejal li xchi'ile.

⁷ “Me oy achi'ilic ta israelal sbats'il yelc'anel batel jun achi'ilic yu'un tsc'an tstic' ta mozoil, o tsc'an chchon batel ta taq'uine, le'e ac'o yich' chapanel ti ac'o chamuque yu'un jech ac'o uluc o li boch'o jech chopol tspas te ta atojolique.

⁸ “Me oy boch'o chtaat ta c'a'el chamel avu'unique, junuc me avo'ntonic ch'unic scotol c'usitic chayalboxuc li pale levietique. Tsc'an chapasic scotol jech chac c'u cha'al calojbeic ono'ox ya'yic li paleetic avu'unique.

⁹ Na'ic me c'usi ipasbat ta be yu'un Muc'ul Dios cu'untic li María ti c'alal laloq'uic tal ta Egiptoe.

¹⁰ “Me oy chq'uex ataq'uin achi'ilique, mu me xa'och ta sna yu'un chbat atsacbe tal ta prentail c'usi oy yu'un.

¹¹ Te no'ox oyanic ta amac'. Malao avilic me oy c'usi chayich'boxuc tal sventa chayac'boxuc ta prentail.

¹² Me me'on li vinique, mu me teuc avich'ojbeic o x'ic'um osil li prentail chayac'boxuque.

¹³ C'alal me mal xa c'ac'ale bat sutesbeic, yu'un bal to xa'ay chpix sba o c'alal chvay ti me ja' sc'u' chayac'boxuc ta prentaile. Me jech chapasique, lec chbat ac'oplalic yu'un, xchi'uc ja' chapasic c'usi lec chil li Muc'ul Dios cu'untique.

¹⁴ “Mu me xavuts'intaic li boch'o me'onique. Mu me jaluc xamacbeic li stojolique, ac'o me ja' achi'ilic ta israelal, o me yanlum ti te xa nacal ta alumalique.

¹⁵ Tojic ta ora no'ox ta yorail ti c'alal ch-abtej avu'unique. Mu me xamalaic x'ic'um osil yu'un mu'yuc c'usi oy yu'un, ja' yu'un chtun yu'un li stojole; bal to sman o c'usitic chtun yu'un. Me mu jechuc chapasique, xu' tsc'anic parteal ta stojol li Muc'ul Diose, jech vo'oxuc oy amulic chc'ot ta stojol Muc'ul Dios.

¹⁶ “Li totiletique mu xu' chchamic ta scoj smul xnich'nabic, jech ec li nich'naletique mu xu' chchamic ta scoj smul stotic. Ta scoj smul stuquic jujunic ta xchamic.

¹⁷ “Mu me xapasic c'usi mu tuc'uc ta stojol li yanlumetique xchi'uc ta stojol li me'onetic ti chamen xa stot sme'ique. Xchi'uc mu me xavich'beic ta prentail sc'u' spoc' li me'on antsetique.

¹⁸ Mu me xch'ay ta avo'ntonic ti jech to'ox abul abaic ec ti c'alal ochemoxuc ta mozoil te ta Egiptoe, xchi'uc ti ja' la sloq'uesoxuc tal li Muc'ul Dios cu'untique. Ja' yu'un chacalboxuc ti ac'o ach'unic scotol li mantaletic li' chacalboxuc ava'yique.

¹⁹ “C'alal me oy chch'ay ta avo'ntonic jchucuc atrigoic ti c'alal yorail chatuch'ique, mu xa me sut at'unic. Te ac'o comuc ta sventa li yanlum cristianoetic te nacal ta atojolique o me me'onetic ti mu'yuc xa stot sme'ique o me me'on antsetic. Me jech chapasique, li Muc'ul Dios cu'untique chayac'boxuc ep bendición yu'un lec li c'usitic chapasique.

²⁰ “C'alal chalilinbeic ta te' sat li oliva te'etic avu'unique, mu me sut atulic me oy to chcom ta sc'obc'obtaque. Te xa ac'o comuc ta sventa yanlumetic, ta sventa me'on ololetic, xchi'uc ta sventa me'on antsetic.

²¹ “Jech noxtoc c'alal chatulbeic sat li ts'usubetic avu'unique, mu me xbat acha'tulic me oy to chcom avu'unique. Te xa ac'o comuc ta sventa yanlumetic, ta sventa me'on ololetic, xchi'uc ta sventa me'on antsetic.

²² Na'ic me ti ja' to'ox jech abul abaic ec ti c'alal ochemoxuc ta mozoil ta Egiptoe, ja' yu'un chacalboxuc ti ac'o ach'unic scotol li c'usitic chacalboxuc ava'yic li'i.