Deuteronomio 23 - Bible in Tzotzil de Chenalhó with Deuterocanon

Sc'oplal boch'otic mu xu' chchi'inic c'alal tstsob sbaic li israeletique

¹ “Li boch'otic t'usem sc'unilic, o me c'ocbil loq'uel ste'ele, mu xu' chatsob abaic ta yich'el ta muc' Dios achi'uquic.

² “Li yol xnich'onic boch'otic jech no'ox tsc'opan sbaique, mu xu' co'ol chatsob aba achi'uquic noxtoc, me ja'uc c'alal ta slajunc'olal yol xnich'onic.

³ “Li amonetic xchi'uc moabetique mu me xavac' ochicuc tal ti c'alal chatsob abaic chavich'ic ta muc' Diose, me ja'uc c'alal ta slajunc'olal yol xnich'onic.

⁴ Yu'un c'alal lajelovic tal ta yosilalic ti c'alal laloq'uic tal ta Egiptoe, me jutuc muc chayac'boxuc vo' avuch'ic, xchi'uc ave'elic. Ja' no'ox la stojic li Balaam, xnich'on Beor, ti liquem tal ta Petor ta Mesopotamia banamile, yu'un ac'o yuts'intaoxuc.

⁵ Pero li Muc'ul Dios cu'untique muc xich'be ta muc' sc'op li Balaame. Ja' no'ox la sc'atajes ta bendición avu'unic li uts'intael chayac'boxuc oxe, yu'un toj ep sc'anojoxuc.

⁶ Mu me xasa'ic c'u x'elan xu' chlecub avo'nton achi'uquic. Chopoluc me xavilic o ti jayib c'ac'al cuxulique.

⁷ “Yan li edometique mu me chopoluc xavilic, yu'un ja' avuts' avalalic. Ja' no'ox jech ec li egiptoetique mu me chopoluc xavilic, yu'un te to'ox ay naclanic ta yosilalic.

⁸ Ta yoxc'olal yalab xnich'nabique, xu' xa jmoj chatsob aba achi'uquic chavich'ic ta muc' Dios.

Mantaletic ta sventa c'u cha'al mu xistautic chamel

⁹ “C'alal te chapasic pleito achi'uquic li avajcontraique, xchi'uc c'alal te nacaloxuc ta acarpanaique, mu me c'usi chopol xapasic te.

¹⁰ Me oy boch'o junucal avu'unic chopol, yu'un oy c'usi la sjelubtas c'alal ja'o vayeme, ac'o loc'uc batel ta spat to ti bu apasoj acarpanaique. Sbejel c'ac'al te loq'uemuc o.

¹¹ C'alal chbat c'ac'ale, ac'o spoc sba lec ta vo'. C'alal me ich'ay xa li c'ac'ale, xu' xa ac'o ochuc tal yan velta ti bu oy acarpanaique.

¹² “Jech noxtoc tsc'an chasa'beic junuc yavil ach'ayubbailic ta spat to li acarpanaique.

¹³ C'alal chabatic ta ch'aybaile, tsc'an chavich'ic batel jch'ixuc te' yu'un chavomic jutebuc li banamile. Me laj avo'ntonique, butic comel ta banamil li avic'ubalique.

¹⁴ Yu'un li Muc'ul Dios cu'untique te chanov ta o'lol li acarpanaique yu'un chaxchabioxuc, xchi'uc te chascoltaoxuc ta stsalel li avajcontraique. Jech tsc'an ti voc'bil avu'unic sventa Dios ti bu chapas acarpanaique, yu'un jech mu'yuc c'usi chopol chil li Diose. Me mu xapasic jeche, ta me xascomtsanoxuc li Diose.

Mantaletic ta sventa xc'uxubinel jun mozo

¹⁵ “Me oy jun mozo chjatov loq'uel ta sna yajvale, me tsc'an tsnac' sba ta anaique, mu me xbat avaq'uic ta sna li yajvale.

¹⁶ Xu' chavaq'uic nacluc te ta alumalic ti bu lec cha'ye xchi'uc ti bu tst'uj stuque, pero mu me boch'o xuts'inta avu'unic.

Mantal ta sventa ti mu me xbat stsob sbaic ta spasel mulile

¹⁷ “Me junuc vinic, o me ants avu'unic vo'oxuc li israeloxuque, mu me xbat yac' sba ta spasel muliletic te ta snail yo' bu tstsob sbaic ta spasel muliletic li boch'otic mu'yuc yich'ojic ta muc' Muc'ul Diose.

¹⁸ Li taq'uin tstaic tal ta sventa muliletique, mu me xavaq'uic ti ja' tstojic te ta xch'ulna Muc'ul Dios li c'usi avalojic xa chatojique, yu'un li c'usi tspasique toj chopol chil li Diose.

¹⁹ “Mu me xatsatsal c'anbeic sjol me oy c'usi chq'uexboxuc achi'ilique, me taq'uin, me ve'lil, o me oy c'usitic yan chaxq'uexboxuc ti sc'oplal chastojboxuc sjole.

²⁰ Pero li yanlum cristianoetique xu' chac'anbeic sjol li c'usi chaxq'uexboxuque. Ja' no'ox mu xu' chac'anbeic li achi'iltaquique. Jech li Muc'ul Diose ta xac'boxuc ep bendición ta sventa scotol c'usi chapasic te ta avosilalic ti bu chavich'ique.

²¹ “C'alal me oy c'usi avaloj chapasic ta stojol Muc'ul Dios cu'untique, mu me teuc no'ox xch'ay ta avo'ntonic. Pasic me ta ora. Na'ic me ti ta ono'ox xich'boxuc ac'opic li Muc'ul Diose. Yu'un me mu xapasic li c'usi avalojique, ja' amulic chc'ot.

²² Me mu'yuc c'usi chavalic ta stojol Dios chapasique, mu xata amulic.

²³ Pero me yutsil avo'nton chavalic c'usi chapasic ta stojol Muc'ul Dios cu'untique, tsc'an chc'ot ta pasel avu'unic.

²⁴ “C'alal cha'ochic ta yut ts'usubaltic yu'un achi'ilique, xu' chatul alo'ic ti c'u yepal chac'anique, pero mu me xavich'ic batel ta junuc moch.

²⁵ Me oy cha'ochic ta trigoaltic yu'une, xu' chac'asic jaylicuc li trigoe, pero mu me xatuch'ic ta joz.