Deuteronomio 21 - Bible in Tzotzil de Chenalhó with Deuterocanon

Sc'oplal boch'o chlaj ta milel ti muc xvinaj boch'o imilvane

¹ “Me oy boch'o chlaj ta milel ti te telel chatabeic sbec'tal ta avosilalic yo' bu chayac'boxuc li Muc'ul Dios cu'untique, me mu xana'ic boch'o la smile,

² li banquilaletic xchi'uc li jchapanvanejetique ac'o sq'uelic lec c'u snamal xil sba xchi'uc li lumetic yo' bu telel sbec'tal li animae.

³ Li banquilaletic te ta lum ti toj nopole, ac'o stsaquic jcotuc unin tsebal vacax ti mu'yuc to yich'oj chucbel abtejebal sventa slocubil banamile.

⁴ Ac'o yiq'uic yalel ta bevo' ti scotol c'ac'al oy ya'lele, xchi'uc ti mu baq'uin xich' bojele; ti mu baq'uin c'usi xich' ts'unel tee. Te ac'o sc'asbeic comel snuc' li unin me' vacaxe.

⁵ “Ts'acal ac'o noch'ajicuc batel li pale levietique, yu'un ja' t'ujbilic yu'un Muc'ul Dios chtunic yu'un, xchi'uc chaq'uic bendición ta sventa li Diose. Me oy c'opetic mu'yuc chapajeme, ja' chalic c'u x'elan chcom.

⁶ Scotol li banquilaletic te ta lume ac'o spoc sc'obic te ta sba li unin chamen me' vacaxe.

⁷ Xchi'uc jech ac'o yalic: ‘Muc vu'uncuticuc la jmilcutic li vinic le'e, me jutuc muc xquilcutic c'u x'elan la smilic.

⁸ Muc'ul Dios, pasbo perdón li jchi'iltaque yu'un ja' ateclumal. Vo'ot laj acolta tal. Mu me xavac'be smulinic ti icham li jun vinic ti mu'yuc smule’, ac'o xiicuc. Jech mu xich'ic ich'bel sc'opic ta sventa ti icham li jun vinique.

⁹ Li vo'oxuque ja' me pasic c'usi lec chil li Muc'ul Diose, jech chavulesic te ta atojolic li mulil ta sventa ti icham li boch'o mu'yuc smule.

Mantal ta sventa boch'o antsil xu' chiq'uic tal ta scoj pleito

¹⁰ “C'alal chapasic pleito achi'uc avajcontraique, me laj yac'boxuc ta ac'obic li Muc'ul Dios cu'untique,

¹¹ me oy boch'o junucal avu'unic chil jun ants ti toj c'upil sbae, me ta sc'opane, xu' ac'o yic'.

¹² Ac'o yic' batel ta sna. Ac'o yac'be ta juxbel stsotsil sjol, xchi'uc ac'o sloc' sni'ni' yic'ach.

¹³ Ac'o sloc' li sc'u' slapoj c'alal laj yich' chuquel tale, te ac'o naquiuc ta sna li vinique. Ac'o yoc'ta sjunul u li stot sme'e. C'alal me laj xa spas jeche, ac'o yic', ac'o xchi'in sbaic. Ja' xa yajnil smalal sba chc'otic o.

¹⁴ Me ts'acal mu xa sc'an lec li yajnile, xu' tscolta batel, pero mu me xchon batel ta taq'uin, xchi'uc mu me scuy jech chac c'u cha'al smozo, yu'un soquesoj xa.

Sc'oplal c'usitic xu' chich' ba nich'onil

¹⁵ “Me oy jun vinic chib yajnile, me jun lec sc'anoj, jun mu'yuc lec chile, pero me i'alaj yu'un xchibale, me ja' ba olol ic'ot yol li ants ti mu'yuc c'anbil leque,

¹⁶ c'alal tsta yorail tsvoc'be xnich'nab c'usitic oy yu'un li vinique, mu xu' ja' tscuybe ta ba olol yol li yajnil ti lec sc'anoje. Me jech tspase, ja' chuts'intabe yol li yajnil ti mu'yuc lec chile yu'un ta melel ja' ba olol.

¹⁷ Persa tsc'an chc'ot lec ta yo'nton ti ta melel ja' sba xnich'one, xchi'uc ti tsc'an jech yepal jeloven chich' jech chac c'u cha'al sc'oplal chich'ic li yantique yu'un ja' sba sat sts'unub c'otem. Jech oy ta sventa xu' chich' scotol yu'un ja' ba olol.

Stojol mulil ta sventa alab nich'nabetic ti mu xch'unic mantale

¹⁸ “Me oy boch'o oy jun xnich'on ti solel tsots yo'nton ti jbajmantal oe, ti mu xich' ta muc' c'usi ch-albat yu'un li stot sme'e, ac'o me chich' nucul ti mu xch'un oe,

¹⁹ li totil me'ile ac'o yiq'uic batel ta stojol j'abteletic yu'unic te ta slumalic.

²⁰ Jech ac'o c'ot yalbeic: ‘Li col jnich'oncutic li'i toj tsots yo'nton. Solel mu xch'un jmantalcutic, toj chopol yo'nton, toj ech'em xyacub’, ac'o yutic c'otel.

²¹ Scotol li viniquetic te ta alumalique ac'o smilic ta ton. Jech ta x'ul o li c'usi chopol te ta atojolique. C'alal ta xa'yic scotol achi'iltaquic jech chc'ot ta pasele, ta xlic xi'icuc scotolic.

Sc'oplal yantic mantaletic

²² “Me oy jun vinic la sta tsots smul ti chapanbil xa ti joc'ol ta te' chchame,

²³ pero li sbec'tale mu me teuc joc'ol chcom sjunul ac'ubal. Ac'o yich' muquel ta sc'ac'alil no'ox ti c'alal chchame. Yu'un li boch'o joc'ol ta te' chchame ja' ac'bil stoj smul yu'un Dios, jech mu me xasoquesbeic sc'oplal li avosilalic chayac'boxuc Muc'ul Diose.