Deuteronomio 20 - Bible in Tzotzil de Chenalhó with Deuterocanon

Mantaletic sventa pleito

¹ “C'alal me oy chaloq'uic batel ta pleito yu'un chbat atsal avajcontraique, me chavilic ti bats'i ep ca'etic yu'unic, xchi'uc caretaetic sventa pleito, xchi'uc bats'i ep yajsoldadoic ti ja' mu'yuc ep avu'unic li vo'oxuque, mu me xaxi'ic yu'un. Na'ic me c'u x'elan la sloq'uesoxuc tal ta Egipto banamil li Muc'ul Dios cu'untique.

² C'alal me la sta yorail chlic apasic pleitoe, li pale avu'unique ac'o xchanubtas lec li soldadoetic avu'unique.

³ Jech ac'o yalbe: ‘A'yo ava'yic, israeletic. Li' ta orae ta xa xlic acontrainic li cajcontratique. Mu me xchibaj avo'ntonic; mu me xaxi'ic; mu me xaniquic ta scoj xi'el.

⁴ Yu'un li Muc'ul Dios cu'untique te xchi'inojoxuc. Ja' stuc ta stsalboxuc li cajcontratique jech tsalbil chc'ot avu'unic ta sventa stuc li Muc'ul Diose’, ac'o yutic.

⁵ “Ts'acal ac'o lic c'opojicuc ec li banquilaletic avu'unique. Jech ac'o yalic: ‘Me oy boch'o junucal avu'unic spasoj ach' sna ti mu'yuc to snainoje ja' lec ac'o sutuc batel ta sna yu'un naca me te chamuc ta pleito; naca me yan xa boch'o chlic nacluc te ta sna.

⁶ Jech noxtoc me oy boch'o junucal sts'unoj sts'usub ti mu'yuc to stulojbe sat junuc veltae, ja' lec ac'o sutuc batel ta sna yu'un naca me te chamuc ta pleito, naca me yan xa boch'o chlic stulbe sat li sts'usube.

⁷ Jech noxtoc me oy boch'o chapal xa chnupin xchi'uc jun tsebe, me mu'yuc to yic'oj sbaique ja' lec ac'o sutuc batel ta sna, yu'un naca me te chamuc ta pleito, jech xu' chbat ta yan li yelube’, ac'o xiicuc.

⁸ “Li banquilaletique ts'acal jech ac'o yalbeic yan velta li soldadoetique: ‘Me oy boch'o junucal oy xi'el cha'ye, xchi'uc ti mu'yuc stsatsal yo'nton cha'ye, ja' lec ac'o sutuc batel ta sna yu'un jech mu xotesbe xi'el ta yo'ntonic li yantic xchi'iltaque’, ac'o yutic.

⁹ C'alal me laj xa yalic jech li banquilaletique, li banquilal soldadoetique ac'o yac' sbaic batel ta ba'yucbe yu'un li soldadoetique.

¹⁰ “C'alal me cha'ochic xa batel ta junuc lum sventa chbat apasic pleito achi'uquic li cristianoetique, ba'yuc xajac'beic me tsc'anic ti mu'yucuc pleitoe.

¹¹ Me la sc'anic ti mu'yucuc pleito li boch'otic te nacajtic ta lume, me chac' ochanic batel ta slumalic ta lec no'oxe, ac'o ochicuc ta amozoic. Ac'beic spas stsatsal abteletic avu'unic.

¹² Pero me mu sc'anic ti mu'yucuc pleitoe, me chayalboxuc ti ac'o apasic pleito achi'uquique, li vo'oxuque joyibtabeic li slumalique. Pasic pleito achi'uquic.

¹³ Li Muc'ul Diose ja' chac' atsalic scotol, jech xu' avu'un chamilic ta espada scotol li viniquetic te nacajtique.

¹⁴ Yan li antsetique, li ololetique, li vacaxetique, xchi'uc scotol li c'usitic oy yu'unic te ta lume ja' avu'unic chcom scotol. Xu' chatunesic scotol li c'usitic chayac'boxuc Muc'ul Dios ac'o avich'ique.

¹⁵ Ja' jech xapasbeic scotol li muc'tic lumetic ti nomtic to oyic bu chanaquiique, xchi'uc ti muc ja'uc ventainbil yu'un li jujun banamil bu chavich'ique.

¹⁶ Yan li yajvaltac lum te ta banamil bu chayac'boxuc Muc'ul Dios cu'untique, ulesic scotol. Me junuc mu me boch'o cuxul xcom avu'unic.

¹⁷ J'ech'el ulesic o scotol jech chac c'u cha'al yalojboxuc li Muc'ul Diose. Ja' li hetetique, li amorretique, li canaanetique, li ferezetique, li hevetique, xchi'uc li jebusetique. Me laj avulesic scotol le'e, xco'laj xchi'uc milbil smoton Dios chc'ot avu'unic.

¹⁸ Yu'un jech mu teuc chlic xchanubtasoxuc ta spasel c'usitic toj chopol tspasic sventa chich'ic ta muc' li diosetic yu'unique. Jech mu xata amulic ta stojol li Muc'ul Dios cu'untique.

¹⁹ “Me oy junuc lum ti ep c'ac'al tsc'an yo' xu' chbat atsalbeic scotol li yajvaltaque, mu me xats'etic ta eq'uel ta ora li te'etic yu'unique, yu'un li sate xu' chatunesic sventa chalo'ic, yu'un te'etic no'ox tec'ajtic ta banamil, muc ja'uc jech chac c'u cha'al cristianoetic ti xu' yu'un tspoj sbaic c'alal chats'etique.

²⁰ Pero li te'etic ti mu sna' satinique, xu' chats'etic. Ac'o tunuc avu'unic sventa chasetuic o li lume, ja' to me i'och o ta ac'obique.