Deuteronomio 19 - Bible in Tzotzil de Chenalhó with Deuterocanon

Lumetic sventa spojobbailic

¹ “C'alal me laj xa'ox slajes scotol muc'tic lumetic li Muc'ul Dios cu'untique, xchi'uc me laj xa'ox avich'beic li yosilique, li slumalique xchi'uc li snaique,

² voq'uic comel oxibuc lum te ta banamil yo' bu chayac'boxuc li Muc'ul Dios cu'untique.

³ Meltsanbeic lec sbelal li oxib lumetique. Oxvoc' ac'o comuc avu'unic ta scotol li avosilalic chayac'boxuc Muc'ul Dios cu'untique yu'un jech buyuc no'ox jotucal chbat snac' sba ta anil li boch'o chmilvane.

⁴ Li boch'o chmilvane xu' te ac'o bat snac' sba ta anil yu'un jech mu xmilat ec ti me chvinaj ti muc ta yutsiluc yo'nton imilvane, xchi'uc me mu yu'unuc scontra ono'ox sbaique.

⁵ Jech chac c'u cha'al me oy chib viniquetic chchi'in sbaic batel ta cutsi' ta toyolaltique, me oy boch'o junucal yu'unic chloc' ta sjol yeq'uel ti c'alal chac' jujumoj yeq'uelique me la sta li xchi'ile, me te icham o yu'une, ac'o jatovuc batel ta anil ta junuc li oxib lumetique yu'un jech mu me xich' milel ec.

⁶ Naca me oy yuts' yalal li boch'o ichame xu' tspacbe sutel sc'oplal li xchi'ile, xu' snuts batel ta anil, xu' tsta ta be ta scoj ti toj nat sbelale, jech xu' tsmil o comel. Pero mu'yuc sc'oplal xu' chcham yu'un mu scontrauc ono'ox sbaic xchi'uc li boch'o la smile.

⁷ Ja' yu'un chacalboxuc ti ac'o avoq'uic comel oxibuc lume.

⁸ C'alal me la smuq'uibtasboxuc lec avosilic li Muc'ul Dios cu'untique, me laj yac'boxuc scotol li banamil ti yalojbe ono'ox amoltotic ta vo'onee,

⁹ tsc'an chacomtsanic yan oxibuc lum noxtoc sventa anac'ubbailic, pero ja' to me la smuq'uibtasboxuc avosilic li Muc'ul Dios cu'untique, xchi'uc me chach'unic, me chapasic scotol li mantaletic li' laj calboxuc ava'yique, xchi'uc me jun avo'nton avich'ojic o ta muq'ue, me j'ech'el te oyoxuc o ta stojole.

¹⁰ Jech mu smal xch'ich'al te ta avosilalic yo' bu chayac'boxuc Muc'ul Dios cu'untic li boch'o mu'yuc smule, xchi'uc jech mu xcom ta avac'olic me oy boch'o chchame.

¹¹ “Pero me oy jun vinic ti oy scontrae, ti oy ono'ox ta yo'nton tsc'an tsmil li xchi'ile, me laj ono'ox sta ta milele, me te bat snac' sba ta anil ta junuc lum sventa anac'ubbailique,

¹² li banquilaletic te ta slumale ac'o yalic mantal ti ac'o bat stsaquic tale. Ac'o yac'beic ta sc'ob yuts' yalal li boch'o ichame yu'un ac'o smilic.

¹³ Mu me xc'uxubinic, yu'un jech mu x'epaj boch'o tsmil xchi'ilic ti mu'yuc smulique.

¹⁴ “Mu me xajelbe aba sts'aquil avosilic jujunoxuc te ta banamil ti bu chayac'boxuc li Muc'ul Dios cu'untique. Ich'ic me ta muc' li sts'aquil yosil achi'ilic ti yac'ojic comel li amoltotic ta vo'onee.

Mantal ta sventa j'epalc'op testigoetic

¹⁵ “Me jun no'ox testigo chal ti oy smul jun xchi'ile, mu xu' o, yu'un mu xvinaj lec me melel oy smul li boch'o tstic'be smule. Ja' to xu' chich' ch'unel me oy chib oxib testigo chtal yalique.

¹⁶ “C'alal me oy boch'o tsva'an sba ta testigo ta stic'bel smul xchi'il ta scoj ti chopol yo'nton ta stojole,

¹⁷ xchibalic ac'o bat sva'an sbaic ta stojol li Muc'ul Diose, xchi'uc ta stojol li paleetique, xchi'uc ta stojol li jchapanvanejetic ti yorail tiq'uilic ta yabtelique.

¹⁸ Li jchapanvanejetique ac'o sq'uelic lec. Ac'o ya'yic lec scotol li lo'iletique yu'un jech tsna'ic lec bu melel. Me ja' ic'ot ta j'epalc'op li boch'o tsva'an sba ta testigoal ta stic'bel smul xchi'ile,

¹⁹ ja' ac'o c'otuc ta stojol stuc li stojol mulil ti tsc'an ox chac'be li xchi'ile. Jech mu x'epaj boch'o tspasilan jech te ta atojolic.

²⁰ C'alal me laj ya'yic li yantique, ta xlic xi'icuc, jech mu spasic jech ec li c'usi toj chopol ta pasele.

²¹ Mu me boch'o abul sba xavilic. Li boch'o ta smil xchi'ile, ac'o yich' milel ec. Li boch'o tstu'pbe sat xchi'ile, ac'o yich' tu'pbel sat ec. Li boch'o tscolesbe stanal ye xchi'ile, ac'o yich' colesbel stanal ye ec. Me ta sc'ob chac'be xchi'ile, ac'o yich' ac'bel ta sc'ob ec. Me ta yacan chac'be xchi'ile, ac'o yich' ac'bel ta yacan ec.