Deuteronomio 18 - Bible in Tzotzil de Chenalhó with Deuterocanon

Sc'oplal c'usi oy ta sventaic chich'ic li pale levietique

¹ “Li pale levietique, ja' li smomnich'nabtac Leví ta vo'onee, mu'yuc c'usi chich'ic, mu'yuc c'usi xu' chu'uninic jech chac c'u cha'al li yantic xchi'iltaquic ta israelale. Ja' no'ox xu' te tsve'ic li milbil matanal chac'beic Muc'ul Diose xchi'uc li c'usi ja' sc'oplal chich'ique.

² Li stuquique mu'yuc chich' yosilic jech chac c'u cha'al li yantique. Li c'usi yu'unic chc'ote ja' li Muc'ul Diose jech chac c'u cha'al yaloj ono'oxe.

³ “Li paleetique ja' oy ta sventa chich'ic li snecub, li yolon ye, xchi'uc stsucut li vacax, li ch'ium chij chaq'uic ta smoton Dios israeletique.

⁴ Xchi'uc ja' chich'ic noxtoc li sba sat trigoe li sba ya'lel ts'usube, li aceitee, xchi'uc li sba loq'uelal stsotsil chije.

⁵ Yu'un li jchop t'ujbilic ta scotol jaychop israeletique, ja' st'ujoj stuc li Muc'ul Diose yu'un ja' tsventainic yabtel Muc'ul Dios xchi'uc xnich'nabic xchi'uc c'alal ta smomnich'nabtaquic.

⁶ “Me oy junuc leví ti te oy batel ta junuc lum ta avosilalique, me tsc'an tspas yabtel ta paleal te yo' bu st'ujoj li Muc'ul Diose,

⁷ xu' tspas yabtel ta sventa Muc'ul Dios jech chac c'u cha'al li yantic levietic te chtunic yu'un Muc'ul Diose.

⁸ Xchi'uc ja' jech yepal ac'o yich' sve'el ec jech chac c'u cha'al chich'ic li yantique, ac'o me oy c'usi ch-ac'bat yu'un stot.

I'albatic ti mu me xchanbeic stalel li boch'otic mu xich'ic ta muc' Diose

⁹ “C'alal me la'ochic batel ta avosilic ti bu chayac'boxuc Muc'ul Dios cu'untique, mu me xachanbeic sbol talelic li cristianoetic te nacajtique.

¹⁰ Mu me oyuc boch'o chac' ta milel xnich'on avu'unic sventa chchic' ta c'oc'. Xchi'uc mu me xachanic t'unul jech chac c'u cha'al tspasique, xchi'uc mu me xanopic ti xu' avu'unic sna'el c'usi chc'ot ta pasel ta ts'acale, xchi'uc mu me xachanic ac'chamel.

¹¹ Mu me xachanic tuch' ora. Mu me c'usi xbat avaq'uic ta t'unel ta stojol li jt'unuletique, xchi'uc li boch'otic sna'ic sc'opanel ch'ulelale, xchi'uc mu me c'usi xajaq'uic ta stojol li boch'otic chamenic xae.

¹² Yu'un li boch'otic jech tspasique, ilinem ta stojolic li Muc'ul Diose. Ta sventa ti jech toj chopol sbol talelic li muc'tic lumetic te ta osil bu chavich'ique, ja' yu'un li Muc'ul Dios avu'unique ta snutsboxuc loq'uel scotol.

¹³ Li vo'oxuque tuc'uc me avo'ntonic ta stojol li Muc'ul Diose.

¹⁴ Li muc'tic lumetic te nacajtic ta banamil bu chbat avich'ique, ja' yich'ojic ta muc' li boch'otic chalic ti sna'ic c'usi chc'ot ta pasel ta ts'acale, xchi'uc li boch'otic sna'ic t'unule. Pero li Muc'ul Dios cu'untique mu xac' ach'unic, mu xac' avich'ic ta muc' li vo'oxuque.

Sc'oplal jun j'alc'op ti ta to xtale

¹⁵ “Li Muc'ul Dios cu'untique ta to st'ujboxuc jun j'alc'op avu'unic jech chac c'u cha'al vu'un, pero ch'unbeic me li c'usi chayalboxuque.

¹⁶ Yu'un jech ono'ox laj ac'anbeic Muc'ul Dios ti c'alal te tsoboloxuc acotolic ta vits Horebe. Jech laj avalic: ‘Mu xa jc'an xca'ibecutic yan velta sc'opojel li Diose. Mu jc'an jq'uelcutic yan velta li muc'ta c'oq'ue yu'un naca me chamcuncutic’, xachiic.

¹⁷ Ja' yu'un jech laj yalbun li Muc'ul Diose: ‘Lec li c'usi laj yalique.

¹⁸ Ta xlic jt'ujbeic loq'uel ta stojolic jun j'alc'op jech chac c'u cha'al vo'ot. Ja' jun mero xchi'ilic ta jt'ujbeic. Ja' ta x'albatic yu'un li c'usi ta jc'an ta xcalbeique, xchi'uc ja' ta svulesbat ta sjolic li c'usi calojbeique.

¹⁹ Pero me oy boch'o mu xich' ta muc' c'usi chcalbeic ta sventa li j'alc'ope, ta xquich'be sc'op c'u yu'un.

²⁰ Me ja' j'alc'op ta stoyobbail chc'opoj ta jventae, o me oy c'usi chal ti tscuy ti vu'un calojbee, o me chalbe sc'oplal yantic diosetique, le'e ac'o yich' milel’, xiyutun li Muc'ul Diose.

²¹ Me jech chlic ajaq'uic li vo'oxuque: ‘¿C'u x'elan xu' ta jna'tic me mu ja'uc yaloj Muc'ul Dios c'usi chijyalbutic li j'alc'ope?’, me xachiique, tsc'an chaq'uelic lec jech chac li'i:

²² Me oy jun j'alc'op oy c'usi chal ta sventa li Muc'ul Diose, pero me mu xc'ot ta pasele, ja' senyail ti mu ja'uc yaloj li Muc'ul Diose. Stuc no'ox jech tsnop, jech chal sventa tstoy sba. Ja' yu'un mu me xaxi'ic yu'un.