Deuteronomio 17 - Bible in Tzotzil de Chenalhó with Deuterocanon

¹ “Mu me xamilbeic smotonin Muc'ul Dios cu'untic, achijic o me avacaxic ti oy xchamele, ti mu'yuc leque, yu'un le'e toj chopol chil li Diose.

^2-5 “Me oy junuc vinic, o me ants ta junuc lum yo' bu chayac'boxuc li Muc'ul Diose me mu xc'ot ta pasel yu'un li c'usi chale, me ja' chich' ta muc' li c'usitic cuybilic ta diose, me ja' tsquejan sba ta stojol, me c'ac'al, me u, me c'analetic ti mu jechuc yaloj li Muc'ul Diose q'uelic lec, yu'un tsc'an chana'ic me melel. Me laj ana'ic ti ta melel la spas c'usi toj chopol te ta atojolic vo'oxuc li israeloxuque, iq'uic batel ta stojol jchapanvanejetic ta lum. Ac'o yich' milel ta ton ta scoj ti la spas li c'usi toj chopol chil Diose.

⁶ “Ja' to xu' chich' milel ta ton jun cristiano me oy chib oxib testigoe. Yan me jun no'ox testigoe, mu xu' chich' aq'uel ta milel.

⁷ Li testigoetique ja' ba'yuc ac'o yaq'uic li tone. Ts'acal ac'o yaq'uic ec li yantic achi'iltaquique. Jech chlaj sc'oplal o li c'usi chopol te ta atojolique.

⁸ “Me oy chc'ot ta atojolic xchapanel li c'usi toj tsotsique, me sventa milbail, me pleito, me yayijemal ta majel, o c'usiuc no'ox chlic c'otuc ta pasel ta alumalique, batanic te ta yavil yo' bu t'ujbil yu'un li Muc'ul Dios cu'untique.

⁹ Albo ya'yic li pale levietique, xchi'uc li jchapanvanejetic ti yorail te chchapanvanique. Jech xu' chayalboxuc c'usi chich' pasel ta sventa li mulil pasbile.

¹⁰ Ja' me jech xapasic ti c'u x'elan chayalboxuque.

¹¹ Scotol ti c'u x'elan ta xchanubtasoxuque xchi'uc ti c'u x'elan chayalboxuc ac'o achapanique, ja' me jech xapasic. Mu me xajelic li c'usi cha'albatique.

¹² Li boch'o tspas no'ox ta stoyobbaile, ti mu ja'uc chch'un c'usi ch-albat yu'un li pale te ch-abtej ta stojol Muc'ul Diose, xchi'uc ti mu ja'uc chch'un c'usi ch-albat yu'un li jchapanvaneje, ac'o yich' milel. Jech chlaj sc'oplal c'usi chopol te ta atojolic vo'oxuc li israeloxuque.

¹³ C'alal cha'yic scotol li jteclume, ta xlic xi'icuc. Jech mu'yuc xa boch'o tspas ta stoyobbail li c'usi tspase.

Sc'oplal c'usi tsc'an tspas ajvaliletic ta Israel

¹⁴ “C'alal ochemoxuc xa'ox batel ta avosilic yo' bu chayac'boxuc li Muc'ul Dios cu'untique, me avu'uninojic xa'ox, me te xa'ox nacaloxuc, me jech chlic avalique: ‘Ta jc'antic oyuc jun ajvalil cu'untic sventa chispasutic ta mantal jech chac c'u cha'al oy ajvalil yu'unic scotol li yantic banamiletic li' ta jpat ta jxocontique’, me xachiique,

¹⁵ xu' chatiq'uic ta ajvalilal avu'unic junuc achi'ilic li boch'o cht'ujat yu'un Muc'ul Diose. Mu xu' chatiq'uic ta ajvalilal avu'unic yanlum cristiano.

¹⁶ Li ajvalil ch-oche mu xu' ta sa' ep sca', xchi'uc mu xu' tstac batel viniquetic ta Egipto yu'un te ac'o bat bolesbatuc li sca'e. Yu'un li Muc'ul Dios cu'untique jech yaloj: ‘Mu'yuc xa bu chtal ateq'uic yan velta li sbelal Egipto li'i’, xi.

¹⁷ Jech noxtoc mu xu' tsa' ep yajnil yu'un jech mu xch'ay ta be. Xchi'uc mu xu' ta stsob ep c'anal taq'uin xchi'uc saquil taq'uin.

¹⁸ “C'alal me yich'oj xa'ox yabtel li ajvalile, ac'o yal mantal ti ac'o yich' pasel yan jlicuc svunal li chanubtasel li'i. Ja' ac'o yich' loc'tael ti bu ba'yuc ono'ox pasbil ti te yich'oj li pale levietique.

¹⁹ Yu'un tsc'an ac'o oyuc ta sc'ob jlicuc ec li svunal chanubtasele. Xchi'uc tsc'an ac'o sq'uel scotol c'ac'al ti c'u sjalil cuxule, yu'un jech chchan yich'el ta muc' li Muc'ul Dios cu'untique, xchi'uc jech chich' ta muc' li chanubtasele, xchi'uc jech tspas batel c'usi chal li mantaletique.

²⁰ Jech mu xlic stoy sba ta stojol li achi'iltaquique. Jech mu scomtsan o spasel li mantaletic li'i. Jech xu' ja' ch-ochilanic o ta ajvalilal xchi'uc smomnich'nabtac te ta atojolic, vo'oxuc li israeloxuque.