Deuteronomio 15 - Bible in Tzotzil de Chenalhó with Deuterocanon

Jabil sventa xch'ayubil ililetic

¹ “Ta vucvuc jabil xu' chach'ay ta avo'ntonic li boch'otic oy yil avu'unique.

² Ja' jech ta ch'ayel li ilile: Scotol li boch'otic oy c'usi chch'amanbat yu'un xchi'ile, te no'ox ac'o xch'ay ta yo'nton li c'usi chich' ch'amanbele. Mu me stsatsal c'anbe li xchi'il ti co'ol slumal xchi'uque, yu'un ja' xa yorail chich' alel ta scotol ti ja' xa sjabilal xch'ayubil ililetic sventa chquich'tic ta muc' li Muc'ul Dios cu'untique.

³ Pero li yanlum cristianoetique xu' chatsatsalc'anbeic, yu'un ac'o stoj me oy c'usi xch'amanojboxuque. Yan li boch'o co'ol alumal achi'uquique, xu' chach'ay ta avo'ntonic, me oy c'usi xch'amanojboxuque

⁴ Me jech chapasique, mu'yuc boch'o me'on avu'unic. Yu'un li Muc'ul Dios cu'untique chayac'boxuc ep bendición te ta avosilalic ti bu chayac'boxuc avu'uninique.

⁵ Ja' no'ox tsc'an chach'unic li c'usi chayalboxuque; tsc'an chapasilanic batel scotol li mantaletic chacalboxuc ava'yic li' ta orae.

⁶ Me laj yac'boxuc bendición Muc'ul Dios cu'untic jech chac c'u cha'al yalojboxuc ono'oxe, ep c'usi xu' chavac'beic xch'aman muc'tic lumetic. Yan li vo'oxuque mu'yuc c'usi chach'amanbeic. Vo'oxuc xu' chlic apasic ta mantal ep muc'tic lumetic. Li vo'oxuque mu'yuc c'usi ora xu' chaspasoxuc ta mantal.

⁷ “Me oy boch'o me'on avu'unic ta junuc lum te ta avosilalic bu chayac'boxuc li Muc'ul Dios cu'untique, mu me xapas ta tsots avo'ntonic ta stojol. Mu me xajalan li c'usi oy avu'unique. Coltaic li boch'o mu'yuc c'usi oy yu'unique.

⁸ Lecuc me avo'ntonic, ac'beic xch'aman li c'usi chtun yu'unique.

⁹ Mu me xavac' ochuc ta ajol ta avo'ntonic c'usitic chopol ta nopel jech chac li'i: ‘Jutuc xa sc'an sta li svucubal jabile, ja' li sjabilal sventa xch'ayubil ililetique’, me xachie, jech xu' chopol asat chlic aq'uelic li achi'ilic ti mu'yuc c'usi oy yu'unique, jech mu'yuc c'usi xu' chavac'beic xch'aman. Pero li stuque xu' xvocolet no'ox ta stojol Muc'ul Dios ta sventa ti jech chapasique, jech oy amulic chc'ot.

¹⁰ Ja' tsc'an ti chacoltaique. Mu me vocoluc xloc' ta avo'ntonic. Me jech chapasique, li Muc'ul Dios cu'untique chayac'boxuc ep bendición ta sventa scotol c'usitic chapasic xchi'uc ta sventa avabtelic.

¹¹ Yu'un scotol ora oy ono'ox boch'otic mu'yuc c'usi oy yu'unic te ta avosilalic, ja' yu'un chacalboxuc ti lecuc me avo'ntonic ta stojol li achi'ilic ti oy svocolic ta scoj mu'yuc c'usi oy yu'unique, ti abul sbaique.

Mantaletic ta sventa mozoetic

¹² “Me oy junuc achi'ilic ta hebreoal, me vinic o me ants, ti chchon sba ta mozoil ta atojolique, xu' chavaq'uic abtejuc vaquibuc jabil. Ta svucubal jabil xu' xa chacoltaic.

¹³ C'alal me laj xa avalbeic ti ac'o coluc batele, mu me jeche'uc xva'vun batel avu'unic.

¹⁴ Tsc'an chavac'beic batel li ats'unub avovolic ti oy avu'unique, xchi'uc atrigoic, xchi'uc ya'lel ats'usubic. Ja' tsc'an chavoc'beic batel ec li c'usitic yac'ojboxuc Muc'ul Dios cu'untique.

¹⁵ Mu me xch'ay ta avo'ntonic ti ja' to'ox jech mozoinbiloxuc te ta Egipto eq'ue, xchi'uc ti ja' la scoltaoxuc loq'uel tal li Muc'ul Dios cu'untique. Ja' yu'un jech mantal ta xcalboxuc ava'yic.

¹⁶ “Me oy amozoic chal ti mu sc'an xloc' batel yu'un jun yo'nton te ta atojolic xchi'uc avajnil anich'nabique, xchi'uc chil ti lec ac'anojique,

¹⁷ tsc'an jech chapas chac li'i: Tsaco jch'ixuc taq'uin ti lec jich'il sni'e. Va'ano ta smac ana li amozoe; vombo xchiquin. Me jech chapase, xu' te chcom o ta amozo. Ja' jech xapasbe noxtoc me ja' aquiarae.

¹⁸ Mu me chopoluc xava'ay ti chaloq'ues batel li amozoique, yu'un vaquib xa jabil i'abtej avu'unic, xjelov xa jech yepal tojem yu'un ti c'u yepal chatoj jun j'abtel avu'une. Jech chayac'boxuc bendición Muc'ul Dios cu'untic ta sventa scotol li c'usitic chapasique.

Ja' yu'un Dios li sba yol vacaxetic, xchi'uc sba yol chijetic ti me stote

¹⁹ “Scotol li sba yol avacaxic achijique, me stote voq'uic ta sventa smoton li Muc'ul Dios cu'untique. “Mu me xavaq'uic abtejuc li sba yol avacaxique. Mu me xaloc'beic stsotsil li sba yol achijique.

²⁰ Ta jujun jabil te xati'ic achi'uc avajnil anich'nabic ta stojol Muc'ul Dios cu'untic ti bu st'ujoje.

²¹ Yan me mu'yuc leque me coxo, me tuben sat, o me oy c'usi yan ip cha'ye, mu me xavac'beic smotonin li Muc'ul Diose.

²² Xu' te no'ox xati'ic ta alumalic yo' bu nacaloxuque. Boch'ouc no'ox xu' tsti', me yac'oj sba ta lecubtasel, o me mu'yuc yac'oj sba ta lecubtasel. C'alal chati'ique, ac'o jechuc no'ox chava'yic jech chac c'u cha'al te'tical chij, o muc'ta chij.

²³ Pero li xch'ich'ale mu xu' chati'ic. Malic batel jech chac c'u cha'al vo'.