Deuteronomio 14 - Bible in Tzotzil de Chenalhó with Deuterocanon

¹ “Vo'oxuc li xnich'naboxuc Muc'ul Dios cu'untique, mu me xayayijes abec'talic, mu me xaloc' stsotsil ajolic ti c'alal oy boch'o chchame.

² Yu'un li vo'oxuque steclumaloxuc o li Muc'ul Dios cu'untique. Voc'biloxuc yu'un. Ja' la st'ujoxuc loq'uel ta scotol li lumetic li' ta banamile yu'un ac'o yu'uninoxuc o.

Sc'oplal chonbolometic stac' ti'el xchi'uc mu stac' ti'el

³ “Mu me xati'ic li c'usitic chopolique.

⁴ “Li' chacalboxuc sbi scotol li chonbolometic ti xu' chati'ique: ja' li vacaxe, li chije, li tentsune,

⁵ li vaxaq'uelume, li gacela chije, li gamo chije, li te'tical tentsune xchi'uc scotol li jaychop antílope chijetique.

⁶ Jech noxtoc xu' chati'ic scotol li chonbolometic ti chcha'xax sve'elique xchi'uc ti cha'xol svoyique.

⁷ Pero li yantic chonbolometic ti mu xu' chati'ique, ac'o me chcha'xax sve'elic o me cha'xol svoyic ja' li'i: “Camello, liebre ti xco'laj xchi'uc t'ule, xchi'uc cotom, le'e mu me xati'ic ac'o me sna' xcha'xax sve'elic, pero muc cha'xoluc svoyic.

⁸ “Li chitome cha'xol svoy pero mu sna' xcha'xax sve'el. Mu me xati'ic xchi'uc mu me xapicbeic sbec'tal ti c'alal chamen xae.

⁹ “Jech noxtoc li c'usitic ch'iemic ta vo'e, xu' chati'ic ti bu oy xic' xchi'uc smerioale.

¹⁰ Yan ti bu mu'yuc xic' xchi'uc smerioale, mu me xati'ic, yu'un mu stac' ti'el.

¹¹ “Jech noxtoc xu' chati'ic li mutetic ti stac' ti'ele.

¹² Pero oy yantic ti mu xu' chati'ique: ja' li xique, li muc'tic xique, li ic'al xique,

¹³ li milano mute xchi'uc scotol li jaychop xiquetic ti halcones sbiique,

¹⁴ xchi'uc scotol li jaychop jojetique,

¹⁵ xchi'uc li muc'ta mut avestruz sbie, xchi'uc li cuxcuxe, xchi'uc li saquil mutal nabe, xchi'uc li jaychop bic'tal xiquetique,

¹⁶ xchi'uc li curutsuque, li ibis mute, li saquil pech'al nabe,

¹⁷ li pelícano mute, li muc'ta xuleme, li sjojal nabe,

¹⁸ xchi'uc li cigueña mute, li abubilla mute, xchi'uc li sots'e.

¹⁹ “Scotol li bic'tal chonetic oy xiq'uique mu stac' ti'el. Mu me xati'ic.

²⁰ Yan li bic'tal mutetic ti lequique, xu' chati'ic.

²¹ “Me oy bu jech no'ox chcham stuc li chonbolometique, mu me xati'ic, yu'un vo'oxuc jun ta lum ti voc'biloxuc yu'un li Muc'ul Dios cu'untique. Yan li boch'otic te co'ol nacaloxuc achi'uquic ti yan slumalique, xu' chavac'beic sti', xchi'uc xu' chachonbeic batel li boch'otic te chjelovique. “Mu me xapanic ta ya'lel xchu' sme' li biq'uit tentsune.

Sc'oplal c'u x'elan ta aq'uel jujun ta lajlajuneb c'usitic chloc' cu'untic

²² “Scotol li c'usitic chloc' avu'unic ta jujun jabile, loq'uesic me li jujun ta lajlajunebe.

²³ Li jujun ta lajlajuneb chavaq'uique me ja' li atrigoic, ya'lel ats'usubic, aceite, sba yol achijic, xchi'uc sba yol avacaxique, xu' te chave'ic ta stojol Muc'ul Dios cu'untic ta yavil ti bu st'ujoj sventa chavich'ic ta muq'ue. Yu'un jech xu' chachanic yich'el ta muc' scotol c'ac'al li Muc'ul Diose.

²⁴ Pero me nom nacaloxuc yo' bu st'ujoj Muc'ul Dios sventa chavich'ic ta muq'ue, me mu xc'ot ta cuchel avu'unic li jujun ta lajlajuneb c'usi chloc' avu'unic ta sventa ti ep yac'ojboxuc bendición li Muc'ul Diose,

²⁵ xu' te no'ox xachonic comel. Li stojole ich'ic batel ta yavil ti bu t'ujbil yu'un Muc'ul Diose.

²⁶ Li taq'uine xu' chich' manel o li c'usitic lec jtunel chavilique, me vacax, me chij, me ya'lel ts'usub, o me ja' li c'usiuc stac' uch'el ti pajubtasbile, ja' li c'usi lec chava'yique. Xu' te xave'ic ta stojol li Muc'ul Dios cu'untique. Jech xcuxet no'ox avo'ntonic chapasic jun q'uin achi'uc avajnil anich'nabic.

²⁷ “Li levietic te nacalic ta alumalique me jutuc mu me xch'ay ta avo'ntonic, yu'un li stuquique mu'yuc yich'oj yosilic jech chac c'u cha'al avich'oj avosilic li vo'oxuque.

²⁸ “Jech noxtoc li c'usitic chloc' avu'unic ta jujun jabile, tsc'an chaloq'uesic jujun ta lajlajuneb ta ox-ox jabil. Xu' chatsobic te ta alumalic.

²⁹ C'alal me ital li levietic ti mu'yuc yich'oj yosilique, o me ja' li yanlum cristianoetic te achi'uquique, me me'on ololetic, o me me'on antsetic, xu' ja' tsve'ic, jech xcuxet yo'ntonic yu'un lec noj xch'utic. Me jech chapasique, li Muc'ul Dios cu'untique chayac'boxuc bendición ta sventa scotol li c'usi chapasique.