Deuteronomio 13 - Bible in Tzotzil de Chenalhó with Deuterocanon

¹ “C'alal me oy chlic junuc j'alc'op te ta atojolique, o me chlic junuc boch'o sna' yalbel smelol vaychiletique, me chayac'boxuc avilic junuc senyail o sq'uelubil ti xu' yu'une,

² me oy chc'ot ta pasel yu'une, me jech chlic yalboxuc: ‘Batic ta stojol yan diosetic ti mu xavotquinique; bat quich'tic ta muc'’, me xayutoxuque,

³ mu me xach'unic. Yu'un li Muc'ul Dios cu'untique ja' no'ox tsc'an ta sq'uelboxuc avo'ntonic me ta melel avich'ojic ta muc' ta scotol ajol avo'ntonic.

⁴ Ja' no'ox me xats'aclinic o li Muc'ul Dios cu'untique. Ja' no'ox xavich'ic ta muc' stuc. Ch'unbeic me li smantaltaque. A'ibeic li sc'ope. Tsobo abaic ta yich'el ta muc'. Te me oyanic o ta stojol.

⁵ Li j'alc'ope o me ja' li boch'o sna' yalbel smelol vaychile, ac'o yich' milel, yu'un jech xu' chlaj o sc'oplal li c'usi chopol chlic te ta atojolique. Yu'un ja' ta xchanubtasoxuc ti ac'o abajbeic smantal li Muc'ul Dios cu'untic ti la sloq'uesoxuc tal ta mozoil ta Egiptoe. Xchi'uc ja' chayalboxuc ti ac'o acomtsanic li be yu'un Muc'ul Dios ti yalojboxuc tsc'an ja' chatamic batele.

⁶ “Me oy achi'ilic ta voq'uel, o me aquerem atsebic, me avajnilic ti lec ac'anojique, o me yan achi'ilic ti bats'i lec ac'anoj aba achi'uquique, me ta sujoxuc batel ta mucul yu'un ac'o bat avich'ic ta muc' li c'usitic cuybilic ta diosetic ti mu xavotquinique xchi'uc muc xotquinic ec li atot ame'ique, mu me xach'unic.

⁷ Yu'un ja' sdiosic li cristianoetic ta lumetic ta nom ta noch' ta sjoylijil ti bu nacaloxuque.

⁸ Mu me xbat apasic li c'usi tsc'anique. Me jutuc mu me xavich'ic ta muc'; mu me abuluc sba xavilic. Mu me xc'uxubaj ta avo'ntonic. Mu me teuc no'ox xamuc ta avo'ntonic.

⁹ Milic ta ora li boch'o jech chayalboxuque. Vo'oxuc ba'yuc xavac' ac'obic ta stojol. Ts'acal ac'o talicuc ec li yepal achi'iltaquique.

¹⁰ Ac'beic ton, ja' to me ichame. Yu'un tsc'an ac'o acomtsanic li Muc'ul Dios cu'untic ti la sloq'uesoxuc tal ta mozoil ta Egiptoe.

¹¹ Me jech chapasique, jech chlic sna'ic scotol li israeletique. Chlic ochuc xi'el ta yo'ntonic, jech mu'yuc boch'o chlic spas jech yan velta.

¹² “Me oy chava'ibeic sc'oplal ti oy viniquetic tsbajbeic smantal Dios ta junuc lum ti bu chayac'boxuc Muc'ul Dios sventa chanaquiique,

¹³ me chava'yic ti ja' ta chch'ayes ta be li xchi'iltaquique, me ta sujic ta yich'el ta muc' yantic diosetic ti mu xavotquinique,

¹⁴ li vo'oxuque tsc'an chajaq'uic lec me melel. Me laj ava'yic ti ja' melele, me jech spasoj te ta atojolic li c'usi toj chopole,

¹⁵ milic ta espada scotol li boch'otic te nacalic ta lume, milic c'alal ta sts'unub yovolic. Ulesic o scotol li c'usitic te oye.

¹⁶ Tsobbeic scotol li sc'ulejalique, bat aq'uic ta o'lol yut slumalic. Ac'beic sc'ac'al li lume. Chiq'uic scotol li c'usitic laj apojbeique. Ac'o lajuc ta c'oc' scotol, ja' co'ol jech chac c'u cha'al chic'bil matanal chc'ot ta stojol li Muc'ul Dios cu'untique. Li lum le'e ac'o comuc ta sbusleb tonetic. Mu'yuc xa bu chich' cha'va'anel o yan velta.

¹⁷ “Me jutuc mu me xavich'ic comel li c'usi albil sc'oplal chich' ulesel oe, yu'un jech mu x'ilin ta atojolic li Muc'ul Diose. Jech c'uxoxuc o ta yo'nton, xchi'uc jech chac' bolanic jech chac c'u cha'al yalojbe ono'ox li jmoltot jyame'tic ta vo'onee.

¹⁸ Ja' no'ox venta me chach'unbeic scotol li c'usi chayalboxuque, xchi'uc me chapasic scotol li mantaletic laj calboxuc ava'yic li' ta orae, xchi'uc me ja' chapasilanic li c'usitic lec chile.