Deuteronomio 12 - Bible in Tzotzil de Chenalhó with Deuterocanon

Jun no'ox yav bu xu' chich'ic ta muc' li Diose

¹ “Li'i ja' li mantaletique xchi'uc scotol li c'usitic yan yaloj Muc'ul Dios tsc'an chapasilanic ti jayib c'ac'al cuxuloxuc te ta avosilalic ti yaloj ono'ox Muc'ul Dios chayac'boxuque, ja' li Dios yu'un jmoltot jyame'tic ta vo'one.

² “C'alal me laj avich'beic yosilal li lumetic ti sc'oplal chavich'ique, ulesic me scotol li c'usitic te yac'ojic ta yaviltac yo' bu chich'ic ta muc' sdiosique, buyuc no'ox, me ta vitsetic, me ta tseltseltic, me ta yolon te'etic.

³ Vuq'uesbeic noxtoc li scajleb smoton sdiosique. Biq'uitic xalilinic li tonetique. Chiq'uic li te'etic bu va'ajtic yu'unic chich'ic ta muq'ue, voc'beic scotol li sloc'obaltac sdiosique. Lajesbeic sc'oplal, jech mu'yuc xa boch'o tsna'ilan o.

⁴ “Li Muc'ul Dios cu'untique mu jechuc tsc'an chquich'tic ta muc'.

⁵ Ja' yu'un ta st'ujboxuc junuc yav te ta atojolic ti jaychopoxuque; ja' yav yich'ubil ta muc' ta xc'ot o. C'alal me la st'ujboxuque, ja' no'ox xu' te chbat avich'ic ta muc'.

⁶ Xu' te chbat amilic, chbat achiq'uic li achijic avacaxic sventa chavich'ic ta muq'ue. Te xavich'ic batel li jujun ta lajuneb chavaq'uique, xchi'uc li c'usitic chapal avu'unic chavaq'uique. Xchi'uc te xavich'ic batel noxtoc li smoton Dios ti slequil no'ox avo'nton chavaq'uique, xchi'uc li sba yol avacaxic, sba yol achijique.

⁷ Te xave'ic achi'uc avajnil anich'nabic ta stojol li Muc'ul Dios cu'untique. Jech xcuxet no'ox avo'ntonic ta sventa ti oy c'usi lec chloc' ta avabtelique yu'un yac'ojboxuc ep bendición li Muc'ul Dios cu'untique.

⁸ “Me lac'otic tee, mu xu' chc'ot apasic jech chac c'u cha'al ta jpastic li' ta ora, ti ta jpastic c'usi lec chca'itic jujunutique.

⁹ Yu'un mu'yuc to ataojic li jun avavilic bu chacux avo'ntonic ti yaloj ono'ox Muc'ul Dios chayac'boxuque.

¹⁰ Pero c'alal me lajelovic batel ta jot uc'um Jordane, me te xa'ox nacaloxuc ta banamil ti bu chayac'boxuque, chac' acux avo'ntonic yu'un mu'yuc xa chascontrainoxuc li avajcontraic ti te nacalic ta jujujot avosilalique. Jun xa avo'ntonic te nacaloxuc. Mu'yuc xa xi'el chava'yic.

¹¹ Ja' yu'un xu' xa te chbat avaq'uic scotol ta yavil bu chast'ujboxuc Muc'ul Dios li c'usitic calojboxuc ono'oxe: ja' li milbil matanal, xchi'uc li chic'bil matanal sventa chquich'tic ta muq'ue, xchi'uc li jujun ta lajunebe, xchi'uc scotol li c'usitic chapal sc'oplal avu'unic chavaq'uique, xchi'uc li c'usitic lequic at'ujojic ti avalojic ta stojol Muc'ul Dios chavaq'uique.

¹² Pasic lec q'uin te ta stojol Muc'ul Dios cu'untic achi'uc anich'nabic, amozoic, xchi'uc li levietic ti te co'ol nacaloxuc achi'uquique, yu'un li stuquique mu'yuc chich' yosilic te ta atojolic.

¹³ “Q'uelo me abaic. Mu me buyuc no'ox xachic'beic smoton li Muc'ul Dios cu'untique.

¹⁴ Ja' no'ox te xbat amilic ta yavil ti bu t'ujbil yu'un stuc ta stojol jchopuc jchi'iltactique. Ja' te xbat apasic scotol li c'usitic laj calboxuque.

¹⁵ “Pero me oy chac ati' ava'yic ti'bole, xu' chamilic c'usiuc no'ox ora tsc'an avo'ntonic te ta alumalic, ja' ti c'u yepal yac'ojboxuc bendición li Muc'ul Dios cu'untique. Boch'ouc no'ox xu' tsti', ac'o me yac'oj sba ta lecubtasel, o me mu'yuc. Ac'o jechuc no'ox chava'yic jech chac c'u cha'al chati'ic te'tical chij, o me vaxaq'uelum.

¹⁶ Yan li xch'ich'ale mu xu' chati'ic. Malic batel jech chac c'u cha'al vo'.

¹⁷ “Yan li jun ta lajuneb chavaq'uique, me trigo, me ya'lel ts'usub, me aceite, o me sba yol achijic, avacaxic, o me ja' li c'usi avalojic xa ta stojol Dios chavaq'uique, xchi'uc li smoton Dios ti ta yutsil avo'nton chavaq'uique, mu xu' te no'ox chati'ic, mu xu' te no'ox chave'ic ta alumalic.

¹⁸ Ja' tsc'an te chave'ic ta stojol Muc'ul Dios ta yavil ti t'ujbil yu'une. Te xave'ic achi'uc anich'nabic, amozoic, xchi'uc li levietic ti te co'ol nacaloxuc achi'uquique. Jech xcuxet avo'ntonic ta sventa ti oy c'usi lec chloc' ta avabtelique.

¹⁹ Ti jayib c'ac'al chacuxiic ta avosilalique, me jutuc mu me xch'ay ta avo'ntonic scoltael li levietique.

²⁰ “C'alal me laj xa smuq'uibtas batel avosilic Muc'ul Dios cu'untic jech chac c'u cha'al yaloj ono'oxe, me oy chac ati' ava'yic ti'bole, xu' chamil ati'ic c'usiuc ora tsc'an avo'ntonic.

²¹ Me nom to nacaloxuc bu ta st'ujboxuc yavil yich'ubil ta muc' li Muc'ul Diose, xu' chamil ati'ic avacaxic achijic ti yac'ojboxuc Diose. Xu' chati'ic te yo' bu nacaloxuc c'u yepal chac'anic jech chac c'u cha'al calojboxuc ono'oxe.

²² C'alal chati'ique, ac'o jechuc no'ox chava'yic jech chac c'u cha'al te'tical chij, o me vaxacq'uelum. Xu' tsti' boch'ouc no'ox, ac'o me yac'oj sba ta lecubtasel, o me mu'yuc.

²³ Yan li xch'ich'ale mu xu' chati'ic, yu'un ja' te cuxul o; jech mu xu' te capal chati'ic xchi'uc sbec'tal li xcuxlejale.

²⁴ Li c'usi tsc'an chapasique, malic batel jech chac c'u cha'al vo'.

²⁵ Mu me xati'ic, yu'un jech lec chabatic xchi'uc avalab anich'nabic ta sventa ti ja' chapasic c'usi tuc' ta stojol li Muc'ul Diose.

²⁶ Yan li c'usi avoc'ojic xa ta sventa smoton Muc'ul Dios cu'untique, xchi'uc li c'usi avalojic xa ta jamal chavac'beique, te xbat avaq'uic ta yavil ti bu t'ujbil yu'une.

²⁷ Te xachiq'uic ta sba scajleb smoton Dios li matanal avu'unique. Li xch'ich'ale te xamalic ta sba scajleb smoton li Muc'ul Dios cu'untique, yan li sbec'tale xu' chati'ic.

²⁸ “A'yo me ava'yic. Ch'unic me scotol li c'usitic laj calboxuque, yu'un jech lec chabatic achi'uc avalab anich'nabic me ja' chapasic c'usitic tuc' xchi'uc c'usi lec chil li Muc'ul Diose.

Pajesel ta sventa yich'el ta muc' sloc'obal c'usitic oy

^29-30 “C'alal me laj yules scotol muc'tic lum li Muc'ul Dios cu'untic bu chbat atsalique, me mu'yuc xa'ox yajval scotole, ich'beic scotol li yosilalique. Te naclanic o. Pero q'uelo me abaic, mu me ja'uc xachanbeic li stalelique, mu me xabatic yo' bu oy li sloc'obal sdiosique, mu me ja'uc xlic avich'ic ta muc' ec.

³¹ Mu me jechuc xapasic ta stojol li Muc'ul Dios cu'untique. Yu'un li c'usi toj chopol ta pasel chil Muc'ul Dios ti mu xa sts'ic yu'une, ja' ti c'u x'elan chich'ic ta muc' sdiosic li yantic banamil le'e. Yu'un toj ech'em xa no'ox ibat yu'unic, c'alal xa ta xnich'nabic tsmilic, chchiq'uic ta c'oc' ta sventa smoton li sdiosique.

³² “Pasilanic me scotol c'ac'al li c'usitic laj calboxuc ava'yique. Mu me xabolesic, mu me xach'ayesic.