Deuteronomio 10 - Bible in Tzotzil de Chenalhó with Deuterocanon

La xcha'ach'ubtas c'usi xchapanoj li Diose

¹ “Li Muc'ul Diose jech laj yalbun: ‘Ajano yan cha'pechuc ton, co'ol jech chac c'u cha'al ta ba'yuque, xchi'uc paso junuc caxa. Me imeltsaj avu'une, muyan tal li' ta vitse yu'un oy c'usi chacalbot.

² Yu'un li cha'pech ton chavich' tale, ja' te ta jts'iba yan velta li c'usitic ts'ibabil ono'ox cu'un ti laj avoq'ue. Me la jts'ibae, ja' te xatic' ta caxa ti laj calbot ac'o apase’, xiyutun.

³ “Jech la jpas li caxae, ta acasia te' la jpas, xchi'uc la jcaan li cha'pech tone. Laj quich' muyel ta jolvits.

⁴ Li Muc'ul Dios cu'untique lic sts'iba yan velta ta cha'pech ton li lajuneb mantaletic jech chac c'u cha'al laj ono'ox spas ta sba velta c'alal la sc'opanoxuc ta o'lol yat c'oc' te ta vits Sinaí c'alal te jmoj tsoboloxuc acotolique, te laj yac'bun ta jc'ob.

⁵ Jech liyal tal ta yoc vits. Vul jtic' ta xcaxail jech chac c'u cha'al yalojbun ono'ox li Muc'ul Diose. Jech te tiq'uil icom o.

⁶ (Li israeletique iloq'uic ta joq'uetic ta jaacán, ibatic ta Mosera. Te c'ot chamuc li Aarone, te la smuquic. Li jun xnich'on, Eleazar sbie, ja' la stsacbe yabtel li stote.

⁷ Ts'acal iloq'uic batel, ibatic ta Gudgoda. Ts'acal iloq'uic batel, ibatic ta Jotbata, ja' jun banamil ti bu ep ta xloc' vo'e.

⁸ Ja'o yorail lic t'ujaticuc yu'un Dios li smomnich'nabtac Levie, yu'un ja' chich'beic batel li xcaxail smantal Muc'ul Diose, xchi'uc ja' te chcomic o ta stojol, ja' te chtunic o, xchi'uc ja' yabtel chaq'uic bendición ta sventa Muc'ul Dios cu'untic jech chac c'u cha'al tspasic li' ta orae.

⁹ Yu'un li levietique mu'yuc chich' yosilic jech chac c'u cha'al chich'ic li yantique. Yu'un ja' yosilic c'otem ti chtunic yu'un Muc'ul Dios jech chac c'u cha'al yaloj ono'oxe.)

¹⁰ “Li vu'une cha'vinic (40) c'ac'al, cha'vinic (40) ac'ubal te oyun ta jot vits jech chac c'u cha'al ta sba veltae. Li Muc'ul Diose laj ya'ibun yan velta li jc'ope, jech muc xayulesoxuc li vo'oxuque.

¹¹ Jech laj yalbun: ‘Batan, bat chapano aba yu'un chavic' batel li achi'iltaque, yu'un chbat atsalic li lum ti bu caloj ono'ox chcac'beic li amoltot ayame'ic ta vo'onee’, xiyutun.

Laj yal Dios c'usi ac'o spasic li israeletique

¹² “Jchi'iltac israeletic, tana li'i, ¿c'usi tsc'an ac'o apasic li Muc'ul Dios cu'untique? Ja' no'ox tsc'an ti ac'o avich'ic ta muq'ue, xchi'uc ti ac'o atamic batel li lequil be yu'une. Jech c'anic me ta scotol ajol avo'ntonic.

¹³ Xchi'uc pasic me li mantaletic yu'une, yu'un jech lec chabatic.

¹⁴ Na'ic me, li Muc'ul Dios cu'untique ja' yu'un li vinajele, xchi'uc li c'usitic oy ta ven toyol ti mu xa xquiltique, xchi'uc li banamile, xchi'uc scotol li c'usitic te oye.

¹⁵ Pero li Muc'ul Diose ja' stuc la st'uj li amoltotic ta vo'onee, jech la xc'uxubin. Ts'acal la st'ujbe li smomnich'nabtaquique, ja' li vo'oxuque. La st'uj loq'uel ta scotol yantic lum jech chac c'u cha'al chavilic li' ta orae.

¹⁶ “Comtsano ta avo'ntonic c'usi yaloj li Muc'ul Diose, jech chac c'u cha'al circuncisión ti j'ech'el chcom senyail ta abec'talique. Mu me staojuc yav ti toj toybaoxuque.

¹⁷ Yu'un li Muc'ul Dios cu'untique ja' Dios yu'un scotol li yan diosetique, xchi'uc ja' Ajvalil yu'un scotol li ajvaliletique. Ja' no'ox stuc sventainoj scotol, ech'em tsatsal. Ja' no'ox stuc xi'bil. Muc t'ujbiluc no'ox tspas li boch'o chc'uxubine. Muc ta taq'uinuc chac' li c'uxubinele.

¹⁸ C'ux ta yo'nton li me'on ololetic xchi'uc li me'on antsetique. C'ux ta yo'nton, chac'be sve'el, chac'be sc'u' li yanlumetic te nacal ta alumalique.

¹⁹ Ja' no'ox jech ec li vo'oxuque c'anic me li yanlum te achi'uquique. Na'ic me ti ja' jech yanlumoxuc ec ti c'alal te to'ox oyoxuc ta Egiptoe.

²⁰ “Ich'ic me ta muc' li Muc'ul Diose cu'untique. Ja' no'ox me xaquejan abaic ta stojol. Junuc me avo'ntonic ta stojol. C'alal me oy c'usi chac'an chavalic ti chava'anic testigoe, ja' me xava'anic ta testigo stuc li Muc'ul Diose.

²¹ Yu'un ja' no'ox stuc xu' chich' albel slequilal, ja' no'ox stuc Dios cu'untic ti laj yac'butic quiltic muc'tic sq'uelubiltac stsatsal la spas ta jtojoltique.

²² C'alal ic'otic ta Egipto banamil li jmoltot jyame'tic ta vo'onee, ja' no'ox oy lajuneb xchanvinic (70) ta scotolic, pero li Muc'ul Dios cu'untique, laj xa yac' bolcutic jech chac c'u cha'al c'analetic ta vinajel.