Daniel 12 - Bible in Tzotzil de Chenalhó with Deuterocanon

Slajeb xa yorail

¹ ‘C'alal ja'o jech chc'ot ta pasele, ja'o chlic li banquilal j'almantal Miguele, ja' li boch'o tscolta achi'iltaque. ‘Ja' yorail chlic tsots vocol c'uuc sjalil. Li vocol chtale mu'yuc ono'ox bu jech c'otem ta pasel c'alal lic ayinuc li cristianoetique. Ja'o yorail chlic colicuc li achi'iltaque, ja' li boch'otic tsacajtic ta vun sbiique.

² Ta xich'ic tijel liquel li boch'otic vayemic ta yut banamile. Oy jayibuc sventa ta xcuxiic sbatel osil; li yantique ja' sventa chbat yich'ic q'uexlal xchi'uc vocol ta sbatel osil.

³ Li boch'otic bijique sacmesanic no'ox jech chac c'u cha'al vinajel; li boch'otic la xchanubtasic, la sbijubtasic ep cristianoetique sbatel osil ja' jechic o jech chac c'u cha'al c'analetic.

⁴ ‘Li vo'ote, Daniel, mu to me xavac' ta a'yel li c'usitic laj ava'ye. Ac'bo lec selloal noxtoc li vune, ja' to me la sta yorail slajebal c'ac'ale. Toj ep li boch'otic xtal xbatic no'ox ta sventa tsa'ic c'u x'elan ch-epaj sbijilique’, xiyutun.

⁵ “Vu'un li Danielune laj quil yan chib viniquetic va'ajtic ta jujujot ti' uc'um.

⁶ Li june jech la sjac'be li boch'o te va'al ta ba uc'ume; pasbil ta lino no li sc'u' slapoje: ‘¿Baq'uin to chc'ot ta pasel li c'usi toj tsotsic toj labalic sbae?’, xut.

⁷ Li boch'o te va'al ta ba uc'ume la stoy muyel xchibal sc'ob ta vinajel, jech laj yal ta jamal ta stojol li Dios ti cuxul o sbatel osile: ‘Ta o'lol xchanibal jabil, ja'o c'alal chlaj sc'oplalic ta tsatsal uts'intael li yu'untac Diose, ja'o ta xc'ot ta pasel scotol’, xi.

⁸ “Laj ca'ay li c'usi laj yale, pero muc xca'ibe smelol. Jech la jac'be: ‘Cajval, ¿c'usi chc'ot ta pasel ti me i'ech' scotol le'e?’, xcut.

⁹ Jech laj yalbun: ‘Daniel, ac'o persa batel, yu'un li c'usitic laj yich' alele mucul to, ja' to me la sta li slajebale.

¹⁰ Ep boch'otic lecubenic, sacubenic, jun yutsilic chcomic. Li boch'otic chopol yo'ntonique ja' tspasic o batel li xchopolilique. Li boch'otic chopolique me junuc mu xa'ibeic o smelol li c'usi chc'ot ta pasele. Yan li boch'otic bijique cha'ibeic smelol.

¹¹ C'alal chlic yich' pajesel li milbil smoton Dios chich' aq'uel scotol c'ac'ale, c'alal to chich' va'anel ta ch'ulna li c'usi toj chopol chil Diose, ja' jmil xchi'uc chib ciento xchi'uc lajuneb yo'vinic (1,290) c'ac'al chbat.

¹² Toj xcuxet no'ox yo'nton li boch'o jun yo'nton oe, ti smalaoj tsta jmil xchi'uc oxib ciento xchi'uc vo'lajuneb xcha'vinic (1,335) c'ac'ale.

¹³ Li vo'ote, Daniel, chac'ot c'alal to ta slajeb avorail, jun avo'nton chacux. Ts'acal chatots sventa chavich' li amoton ta slajebal c'ac'ale’, xiyutun li Gabriele”, xi li Daniele.