Daniel 11 - Bible in Tzotzil de Chenalhó with Deuterocanon

¹ Jech noxtoc vu'un la jcolta, vu'un la jtsatsubtasbe yo'nton li ajvalil Darío ta Media ti c'alal sba jabil to'ox yochel ta ajvalilale.

Sc'oplal ajvaliletic ta norte xchi'uc ta sur

² ‘Li' ta orae ta xcac'bot ana' li c'usi melele: Oy oxib ajvaliletic ta xlic spasic mantal ta Persia. Ts'acal chlic yan xchanibal ajvalil, ja' no'ox stuc toj jc'ulej ta scotol li oxibique. C'alal me laj yich' lec stsatsal ta sventa li sc'ulejale, ta xlic stic' sba batel ta scotol ti c'u smuc'ul sventainoj li Greciae.

³ Ts'acal ta xlic yan ajvalil noxtoc toj ech'em sna' paspleito, chlic smuq'uibtas batel ti bu c'alal tsc'an tsventaine; ta spas scotol li c'usi tsc'an yo'ntone.

⁴ C'alal sventainoj xa'ox leque, ta xlic yich' soquesbel ti c'u smuc'ul sventainoje. Ta xich' voq'uel ta chanvoc'. Pero ma'uc sventa chich' smomnich'nabtac, xchi'uc mu xa jechuc smuc'ul tsventain jech chac c'u cha'al sventainoj ono'oxe. Yu'un li yabtele j'ech'el chich' pojbel o; yantic xa boch'o ta x'och sventainan.

⁵ ‘Li ajvalil ta sure ta xich' lec stsatsal, pero oy jun banquilal jpasmantal yu'un ti ja' x'ech' to stsatsal ta xc'ot jech chac c'u cha'al stuque. Bats'i tsots xu' yu'un; ta smuq'uibtas batel ti bu c'alal tsventaine.

⁶ C'alal me i'ech' jayibuc jabile, ta xlic spas ta co'ol yo'ntonic li chib ajvaliletique. Li ajvalil ta sure ta xac'be yic' stseb li ajvalil ta nortee, yu'un jech mu'yuc c'op yu'unic. Pero ta xlic socuc li c'usi chchapanique, yu'un li antse ta xlic yich'ic aq'uel ta milel xchi'uc smalal xchi'uc yalabtac xchi'uc li boch'otic te oyic ta snae.

⁷ Pero ta xlic jun yuts' yalal; ja' ta xchoti ta spasubmantal. Ta xbat xchi'uc yajsoldadotac; ta xbat scontrain li ajvalil ta nortee. Ta x'ochic batel ta tsatsal coralton; ja' ta spasic o canal.

⁸ Jech noxtoc li diosetic, li loc'ometic yu'unique xchi'uc li c'usitic pasbilic ta unijesbil taq'uin, ta saquil taq'uin, ta c'anal taq'uine ta x'ich'bat batel ta Egipto. C'alal ch-ech' jayibuc jabil mu'yuc tscontrain sbaic li chib ajvalile,

⁹ li ajvalil ta nortee tsc'an chbat spas pleito te ta sur, pero nutsbil ta sut batel ta yosilal.

¹⁰ ‘Pero li xnich'nabtaque ta xlic ilinicuc, ta xlic stsob ep yajsoldadotaquic. Ta anil no'ox chbat sbut'iic jech chac c'u cha'al nojelal uc'um li cristianoetic te ta sure. Ta xjelovic batel c'alal to ta lum ti setbil lec ta tsatsal coralton yu'un li ajvalil ta sure.

¹¹ Tsots ta xlic ilinuc ec li ajvalil ta sure. Ta xbat stsac ta c'op li ajvalil ta nortee; ta x'och ta sc'ob scotol li epal soldadoetique.

¹² Ta xlic stoy sba ta sventa ti itsalvane, jech ep cristianoetic ta smil, pero mu xa jaluc xu' yu'un.

¹³ Li ajvalil ta nortee ta xlic xchapan lec yajsoldadotac yan velta, ja' xjelov to yepal chchapan jech chac c'u cha'al li yajsoldadotac ta ba'yuque. C'alal me i'ech' jayibuc jabile, ta xbat stsac ta c'op li ajvalil ta sure. Bats'i ep yajsoldadotac chic' batel; bats'i lec chapal chbatic.

¹⁴ ‘C'alal ja'o jech yorail chc'ot ta pasele, ta xlic ep yajcontra li ajvalil ta sure. Oy jayibuc achi'iltac ven jsa'c'opetic, ta stic' sbaic ec, yu'un jech ac'o c'otuc li c'usi laj avil ta ach'ulele, pero ta xich'ic tsalel.

¹⁵ Li ajvalil ta nortee ta xbat spas stec'ubic ta spat xocon lum ti lec setbil ta coraltone, jech ta x'och o ta sc'ob. Li soldadoetic ta sure mu xu' yu'un tspoj sbaic, me ja'uc li boch'otic lec tsots xu' yu'unique mu xu' yu'un tscolta sbaic ta sc'ob li yajcontraique.

¹⁶ Li boch'o ta stsalvane ta spas c'usi tsc'an yo'nton, me jutuc mu'yuc boch'o xu' yu'un tspoj sbaic o. Te ta xlic comuc o ta lequil banamil yu'un Israel, yu'un xu' yu'un stsalel scotol.

¹⁷ Jech noxtoc ta xlic yac' batel sat ta scotol yosilal li sure, yu'un tsc'an tsventainbe scotol. Jech ta xlic spas ta co'ol yo'ntonic xchi'uc li ajvalile. Ta xac'be yic' stseb, yu'un jech xu' yu'un chlic stsal. Pero mu lecuc chloc' yu'un.

¹⁸ Jech chlic yac' batel sat ta lumetic ta ti'ti' nab; ep ta x'och ta sc'ob. Pero oy jun banquilal soldado ta xlic spajesbe li na'leel chaq'ue; ta sutesbe ta sba stuc.

¹⁹ Ts'acal ta sut batel ta tsatsal coralton yu'un ta yosilal, pero te tsbosi yacan, ta xyal ta lum. Te ta xlaj o sc'oplal.

²⁰ ‘Yan xa boch'o ch-och ta xq'uexol. Li q'uexolile chlic sva'an jtsobpatanetic sventa ac'o oyuc sc'ulejal li slumale. C'alal me i'ech' jayibuc c'ac'ale, ta xich' milel, pero muc ta satilaluc, muc ta pleitouc.

²¹ ‘Ts'acal ta xlic ochuc ta ajvalilal jun vinic noxtoc ti mu'yuc lec ilbile, ti mu x'ich'at ta muc' jech chac c'u cha'al ajvalile. Pero ta xlo'lavan, jech xu' yu'un ta x'och ta yabtel.

²² Li stsatsal yajcontrataque mu'yuc stu ta sat. Ta xules scotol; ta smil noxtoc li banquilal pale ti sventainoj li c'usi chapanbil yu'un Diose.

²³ Ta sventa ti lec sna' xlo'lavane jech chlic spas ta co'ol yo'nton xchi'uc li yantic banamile. Jech ta sta lec stsatsal, ac'o me biq'uit lum no'ox.

²⁴ Ta x'och batel ta jujun banamil ti bu toj c'ulejique, ti mu sna'ic me oy boch'o chc'ot ta stojolique. Ja' ta spas li c'usi mu'yuc jech spasic li smoltotac ijelovique. Ta spucbe yajsoldadotac scotol li c'usi toj lequique xchi'uc li c'ulejalil ta staic ta pasc'ope. Ta xchapan lec c'u x'elan xu' yu'un tstsal li lumetic ti lec setbilic ta coraltone, pero mu'yuc ep c'ac'al jech tspas.

²⁵ ‘Ta spas ta tsots yo'nton ta sventa ti lec xu' yu'une, jech ta xbat stsac ta c'op li ajvalil ta sure; ta xchi'in batel epal soldadoetic yu'un. Jech ec li ajvalil ta sure ta xbat stsac ta pleito xchi'uc epal soldadoetic yu'un. Ja' toj tsotsic li yajsoldadotaque, pero mu xu' yu'un stsalel li yajcontrae yu'un macbil sat yu'un xchi'iltac; chapal sc'oplal lec c'u x'elan chich' aq'uel ta c'abal ta mucul.

²⁶ Ja' no'ox te chchapanbat sc'oplal yu'un li boch'otic co'ol chve'ic xchi'uque, jech tsalbil chcom o li yajsoldadotaque; ep ta xchamic.

²⁷ Li chib ajvaliletic le'e ja' no'ox puru chopol c'usi tsc'an tspasic. Chotolic ta jun mexa chchapanic puru epalc'op, pero mu'yuc c'usi stu o, yu'un muc to ja'uc yorail jech chc'ot ta pasel.

²⁸ C'alal tsut ta yosilal li ajvalil ta nortee, toj ep sc'ulejal tsta batel. Ta xlic scontrain li c'usi xchapanoj Diose; ja' no'ox tspas li c'usi tsc'an yo'ntone, jech tsut o batel ta slumal.

²⁹ C'alal me la sta yorail c'usi ora albile, ta xbat yan velta ta pasc'op ta sur, pero mu xa lecuc ta xloc' yu'un jech chac c'u cha'al ta sba veltae.

³⁰ Yu'un ta xtal contrainatuc yu'un yan soldadoetic te chliquic tal ta Quitim; ta barco chtalic. Jech chlic xi'uc sutel. Ts'acal ta xlic sc'ac'al yo'nton yu'un li c'usi chapal yu'un Dios ta sventa yu'untaque. Ta spas li c'usi tsc'an yo'ntone, xchi'uc chlic spas ta co'ol yo'nton xchi'uc li boch'otic scomtsanojic c'usi xchapanoj Diose.

³¹ ‘Ta xlic yajsoldadotac ti lec tsotsique; ta sbolibtasic li ch'ulnae xchi'uc li coraltone, xchi'uc ta slajesbeic sc'oplal li milbil matanal chich' aq'uel ta stojol Dios scotol c'ac'ale. Ja' te ta xaq'uic ta ch'ulna li c'usi toj chopol chil Diose.

³² Toj lec sna' c'u x'elan tslo'la ta sc'op li boch'otic mu sc'an xch'unic c'usi chapal ono'ox yu'un Diose. Yan li boch'otic xotquinic lec ta melel li Dios yu'unique lec tsots yo'ntonic; chaq'uic persa, jech mu xlajic ta lo'lael.

³³ Li jchanubtasvanejetic te ta lume ep boch'otic ta sbijubtasic, pero c'alal ch-ech' jayibuc c'ac'ale, ta xich'ic milel, ta xich'ic chiq'uel ta c'oc', ta xich'ic chuquel batel ta yan banamil, xchi'uc chich'ic pojbel c'usitic oy yu'unic.

³⁴ C'alal ja'o jech oy svocolique, ta staic coltael jutuc, jech ep boch'otic ta snaban sbaic ta stojolic ta scoj ti staic coltael chilique.

³⁵ Ja' no'ox jech ec li jchanubtasvanejetique oy jayibuc ta xich'ic uts'intael ec, pero ja' sventa slecubtaselic, stuq'uibtaselic, ja' to me its'aqui li yorail c'usi ora albil yu'un Diose.

³⁶ ‘Li ajvalil ta nortee ta spas scotol li c'usi tsc'ane. Ep ta stoy sba; muc' chac' sba ta stojol scotol li diosetique, xchi'uc bats'i chopol c'usi chal ta stojol li bats'i Diose. Lec chbat yu'un scotol, ja' to me la sta yorail ch-ac'bat stoj smul yu'un Diose, yu'un li c'usi chapanbil yu'un Diose ta persa ta spas.

³⁷ Mu xich' ta muc' li diosetic yu'un smoltotaque xchi'uc li diosetic yich'ojic ta muc' antsetique. Me junuc dios mu'yuc stu ta yo'nton, yu'un ja' no'ox stuc muc' cha'ay sba.

³⁸ Ja' no'ox chich' ta muc' li dios yu'un tsatsal coraltonetique, ja' li dios ti muc xotquin li smoltotac ta vo'onee. Chac'be smotonin c'anal taq'uin, saquil taq'uin, lequil tonetic, xchi'uc li c'usitic toj toyolic stojole.

³⁹ Ta sventa dios yu'un yan lum ta stsal li lumetic ti lec setbilic ta coraltone. Li boch'otic ta x'ich'at ta muc' yu'une toj muc' yabtel chac'be; chac' lec ta ich'el ta muc', xchi'uc chac'be smotonin jsep banamil.

⁴⁰ ‘C'alal chc'ot yoraile, li ajvalil ta sure chlic stsac ta pleito li ajvalil ta nortee, pero li ajvalil ta nortee ta xbat yac' jech chac c'u cha'al tsatsal ic'al vo'; chbat xchi'uc epal caretaetic, epal soldadoetic cajajtic ta ca' xchi'uc epal barcoetic. Ta x'och batel ta yosilal; ta xc'ot sbut'iic, ta xjelovic batel.

⁴¹ Ta xc'ot ochuc ta lequil banamil yu'un Israel noxtoc. Ep cristianoetic ta smil; ja' xa no'ox ta xcolic comel li Edom, li Moab, xchi'uc ep to chcolic comel te ta Amón.

⁴² Ta x'och batel ta sc'ob epal banamil, xchi'uc ch-och ta sc'ob c'alal ta Egipto.

⁴³ Ta xu'unin scotol li c'anal taq'uin, li saquil taq'uin, xchi'uc li c'usitic toyolic stojol, li c'usitic c'upilic sba te ta Egiptoe. Li Libia xchi'uc Etiopiae te ta snaban sbaic ta stojol.

⁴⁴ Pero c'alal cha'ay a'yej chlic tal ta sloq'uem c'ac'al xchi'uc ta nortee, ta x'och xi'el ta yo'nton. Jech toj tsots chlic sc'ac'al yo'nton; bats'i ep boch'o chbat smil.

⁴⁵ Ta sva'an naetic te ta o'lol yu'unic li nab xchi'uc li ch'ul vits te ta lequil banamile. Pero te no'ox tsta yorail ta xcham; mu'yuc boch'o chtal coltaatuc yu'un.