Daniel 10 - Bible in Tzotzil de Chenalhó with Deuterocanon

Oy c'usi laj yil ta xch'ulel te ta ti' uc'um Tigris li Daniele

¹ “Ta yoxibal jabil yochel ta ajvalilal ta Persia li Ciroe, ja'o oy c'usi li'ac'bat quil ta jch'ulel, vu'un li Danielun ti Beltsasar yan jbie. Ja' melel li c'usi li'ac'bat quile. Toj tsots ta a'ibel smelol, pero laj ono'ox ca'ibe smelol li c'ope xchi'uc li c'usi laj quil ta jch'ulele.

² “C'alal ja'o jech ic'ot ta pasele, ja'o oyun ta at-o'nton oxib xemuna.

³ Mu'yuc la jve' ve'lil ti lec mue, mu'yuc la jti' ti'bol, mu'yuc laj cuch' ya'lel ts'usub, xchi'uc mu'yuc la jcac' jmuil poxil, ja' to ti c'alal its'aqui li oxib xemunae.

⁴ Ta chanib xcha'vinic (24) c'ac'al yochel li sba ue, ja'o te oyun ta ti' uc'um Tigris.

⁵ C'alal la jtoy jsate, ja' to laj quil te oy jun vinic, slapoj saquil c'u'il pasbil ta lequil lino no. Li xchuc xchuquinoje pasbil ta bats'i lequil c'anal taq'uin.

⁶ Li sbec'tale sts'ayayet jech chac c'u cha'al topacio ton. Li sate xojoban jech chac c'u cha'al sacsevul. Li sbec' sate xpulpun jech chac c'u cha'al toj. Li yoc' sc'obe sts'ayayet jech chac c'u cha'al bronce ti lecubtasbil xa ta c'oq'ue. Li sc'opojele ja' jech chac c'u cha'al yech'al ye epal cristiano.

⁷ “Vu'un no'ox jtuc laj quil; yan li boch'otic te jchi'uque muc xilic. Ja' no'ox ixi'ic, ijatovic; la snac' sbaic ta anil.

⁸ Jtuc xa te oyun ti c'alal laj quil scotole, pero solel aluben licom o. Lisaclich'taj ta jyalel; mu'yuc xa jtsatsal laj ca'ay.

⁹ C'alal laj ca'ay ic'opoje, toj batel jch'ulel lic'ot; liyal ta lum, patal ta banamil lic'ot.

¹⁰ Oy jun c'abal la snitun liquel; cotol ta banamil licom yu'un, pero chinic ta jyalel.

¹¹ Jech laj yalbun: ‘Daniel, toj lec c'anbilot, a'yo lec ava'ay li c'usi chacalbote; lican, va'lan, yu'un tacbilun tal ta aventa’, xiyutun. “C'alal jech laj yalbune, liva'i, pero jeche' xit'elt'un.

¹² Jech laj yalbun: ‘Daniel, mu xaxi', yu'un ta sba no'ox c'ac'al c'alal solel jech avo'nton chac'an chava'ibe smelol li c'usi laj avile, xchi'uc c'alal lic abic'tajes aba ta stojol li Dios avu'une, laj ya'ibot li ac'ope. Ja' yu'un ja' ta sventa ac'op ti litale.

¹³ Li its'inal pucuj ti ja' banquilal te ta Persiae tsots la scontrainun jun xcha'vinic (21) c'ac'al. Pero li Miguel, ja' li banquilal yaj'almantal Diose, ja' tal scoltaun, yu'un jtuc te oyun ta stojol li its'inal pucuj ta Persiae.

¹⁴ Jech lital, yu'un tal calbot ava'ay c'usi ta xc'ot ta pasel ta ts'acal ta stojol li achi'iltaque, yu'un li c'usi chavile ts'acal to ta xc'ot ta pasel’, xiyutun.

¹⁵ “C'alal jech chiyalbune, la jnijan jba, me jbeluc mu'yuc c'usi laj cal.

¹⁶ Pero li boch'o xco'laj xchi'uc cristiano yilele la spicbun li quee, jech te lic c'opojcun, jech laj calbe li boch'o te oy ta jts'ele: ‘Cajval, li c'usi laj avac'bun quile chiyac'bun ep jvocol; solel la slajesbun jtsatsal chca'ay.

¹⁷ ¿Vo'ot li Cajvalote, c'uxi xu' cu'un ta jchi'inot ta lo'il ti toj alubenun xchi'uc ti mu xa xu' chquich' ic', vu'un li avajtunelune?’, xcut.

¹⁸ “Li boch'o xco'laj xchi'uc cristiano laj quile la spicun yan velta, jech i'ayin jtsatsal.

¹⁹ Jech laj yalbun: ‘Vo'ot ti lec c'anbilote mu xaxi', junuc avo'nton, ich'o lec atsatsal, cuxo lec avo'nton’, xiyutun. “C'alal jech laj yalbune, te lic ayinuc jtsatsal, jech laj calbe: ‘Cajval, c'opanun, yu'un laj xa avac'bun jtsatsal’, xcut.

²⁰ Jech laj yalbun: ‘¿Me xana' c'u yu'un ti lital ta atojole? Li' ta orae tsc'an chbat jpas pleito jchi'uc yan velta li its'inal pucuj, ja' li banquilal ta Persiae. C'alal me ilaj co'nton jchi'uc le'e, ja'o chtal noxtoc li its'inal pucuj banquilal ta Greciae.

²¹ Pero ta xcalbot ava'ay li c'usi ts'ibabil ta svunal c'usi melele: Me junuc mu'yuc boch'o chiscoltaun ti c'alal ta jtsal jbacutic jchi'uc li its'inal pucujetique. Ja' no'ox chiscoltaun li Miguele, ja' li banquilal yaj'almantal Dios chaxchabioxuque.