Cantares 8 - Bible in Tzotzil de Chenalhó with Deuterocanon

¹ Ti bats'i jchi'iluc jbatic ta voq'uele, ti co'oluc lijchu'un ta xchu' jme'e, c'alal ta jnupot ta xoraltique, xu' ta jmey ta jts'uts'ot; mu'yuc boch'o xu' chislabanun ti jechuque.

² Xu' chaquic'ot batel ta sna jme'; te ta xcac' ochan, jech te chavalbun c'usi ta jpastic. Chacac'bot avuch' li lequil ya'lel ts'usube xchi'uc li ya'lel jcaranatoe.

³ Ta ats'etc'obe ja' chaq'uechbun o jol; ta abats'ic'obe ja' chameyun o.

⁴ Tsebetic ta Jerusalén, albicun ta jamal me mu xatuch'bicun ta be c'alal ta jc'opan jba jchi'uc li jc'upil vinique, ja' to me jech la sc'an stuque.

Svaccojal q'ueoj Tsebetic

⁵ ¿Boch'o ti le' xtal ta xocol banamil ti xpech'anoj tal sjol ta snecub sc'upil vinique? Ta yolon jpets mantsano la jtijbot avayel, vo'ot ti laj ya'ay svocol avu'un li ame'e, ti lavoc' la'ayin yu'une.

Vinic Ants

⁶ Te me comcun o ta avo'nton; te me oyuc o jsenyail ta ac'ob chava'ay. Mu stac' pajesel chca'ay ti chajc'anote jech chac c'u cha'al mu stac' pajesel me sta yorail chijchame. Yu'un jc'anojot o ta jyalel, mu stac' jsutes co'nton jech chac c'u cha'al muquinal ti mu xa xisutesutic tale; ja' jech stsatsal chca'ay jech chac c'u cha'al tsanal ac'al ti mu xtube.

⁷ Li epal vo' ta nabe mu xu' yu'un tstu'p ta co'nton ti chajc'anote; li uc'umetique mu xu' yu'unic spajesel. Me oy boch'o tsc'an ta xac' scotol c'usitic oy yu'un ta sventa tsman li c'anel oy cu'un ta atojole, ja' no'ox chich' labanel.

Tsebetic

⁸ Li jun cunin muctique biq'uit to, mu'yuc to xchu'. ¿C'usi ta jpastic c'alal yorail chich' q'uelel ta vinique?

⁹ Ti ja'uc coraltone jnacantic chib q'uelub osil ti pasbil ta saquil taq'uine; ti ja'uc ti'nae, jpixtic lec ta ch'ut te' ti jechuque.

Ants

¹⁰ Vu'un coraltonun, li jchu'e ja' jech chac c'u cha'al q'uelub osiletic; li jc'upil vinique toj jun yo'nton ti c'alal chiyilune.

¹¹ Li Salomone oy ts'usubtic yu'un ta Baal-hamón; pero laj yac'anan ta yan. Li jujunique tsc'an chich'ic tal jmil (1,000) ta sep saquil taq'uin ta sventa stojol li sate.

¹² Li vu'une ta jventain jtuc li ts'usub cu'une. Li jmil (1,000) ta sep saquil taq'uine ja' avu'un, vo'ot Salomón; chib ciento (200) ta sep xu' chich'ic li jchabits'usubetique.

Vinic

¹³ Vo'ot ti te nacalot ta ts'unubaltic achi'uc li tsebetique, c'opojan tal ca'tic, tsc'an cha'yic li jchi'iltaque.

Ants

¹⁴ Jc'anbil vinic, tsotsan me, anilajan tal jech chac c'u cha'al vaxacq'uelum, jech chac c'u cha'al yol me' te'tical chij te ta vitsetic ti bu chloc' tal c'usitic muic yiq'ue.