Cantares 7 - Bible in Tzotzil de Chenalhó with Deuterocanon

Vinic

¹ Toj c'upil sba c'otemic avacan yu'un li axonobe, stseb ajvalil; li sca'ca'il sjol acube xco'laj xchi'uc c'usi lec loc'tabil ta c'anal taq'uin ti spasoj boch'o lec chanem ta spasele.

² Li amixaq'ue ja' jech chac c'u cha'al bis ti oy sbele; Li xchucbenal ach'ute ja' jech chac c'u cha'al jchuc trigo ti joybil ta lirio nichime.

³ Li xchibal achu'e xco'laj xchi'uc loin; ja' jech chac c'u cha'al sloin-ol te'tical me' chij.

⁴ Li anuq'ue ja' jech chac c'u cha'al q'uelub osil pasbil ta sts'uts'up tsemen; li asate ja' jech chac c'u cha'al stanqueal vo' ta Hesbón te ta nopol ti'coralton Bat-rabim; li ani'e ja' jech chac c'u cha'al q'uelub osil ta Líbano ti lec sq'ueloj batel lum Damascoe.

⁵ Li ajole lec tuc' va'al jech chac c'u cha'al vits Carmelo; li stsotsil ajole lec q'uiil, xco'laj xchi'uc yax x'elan c'u'il. Li ajvalile lo'labil yo'nton yu'un.

⁶ Toj ven c'ac'al tsebot, toj ven alac' aba cunin elub; spajebal xa no'ox jech alequil.

⁷ Ti c'u x'elan va'alote ja' jech chac c'u cha'al teq'uel jpets xan; li achu'e ja' jech chac c'u chal jchoj sat xan.

⁸ Jech laj cal: “Ta ximuy ta xan ta xcu'uninbe li sate”, xichi. Li achu'e ac'o c'otuc jech chac c'u cha'al jujuchoj sat ts'usub; li yic' avee ja' jech chac c'u cha'al smuil yic' mantsano.

⁹ Li ya'lel avee ja' jech chac c'u cha'al lequil ya'lel ts'usub chbelij yalel ta sti' ave, ach'emic yu'un li stanal avee.

Ants

¹⁰ Yu'unun xa li jc'upil vinique, vu'un no'ox li' oy yo'nton ta jtojol.

¹¹ La' me jc'upil vinic, batic ta paxal; te xijvayutic ta tsobtsobnaetic.

¹² Ta sob yoc'omal xijbat ta ts'usubtic; te chquiltic me chch'ian xa tal li ts'usube, xchi'uc me ta xa xnichinan li caranatoetique, jech te xa chcac' jba o ta ac'ob.

¹³ Li sat mandrágora te'etique ta xloc' smuil; oy xa ep ta chop sat te'etic te ta ti'na ti toj chi'ic ta lo'ele. Oy vo'one xa la jtsob, oy ach' to la jtsob li sat te'etic ti jq'uejojbot alo'e, jc'upil vinic.