Cantares 6 - Bible in Tzotzil de Chenalhó with Deuterocanon

Tsebetic

¹ ¿Bu ibat li ac'upil vinic, vo'ot ti atuc no'ox c'ac'al tsebot ta scotol yantic antsetique? ¿Bu xloc' x'ech' batel xana', yu'un jech xu' chbat jchi'in jbatic ta st'unel?

Ants

² Li jc'upil vinique li' talem ta ts'unubaltic yu'un, ja' li ts'unubaltic yu'un ti toj lec mu yiq'ue, tal yac' ve'uc xchijtac, xchi'uc tal xtuch' lirio nichim.

³ Yu'unun xa li jc'upil vinique, xchi'uc ja' xa cu'un ec; ja' te chac' ve'uc xchijtac ta o'lol lirio nichimaltic.

Yo'cojal q'ueoj Vinic

⁴ Cunin elub tseb, toj c'upil aba jech chac c'u cha'al lum Tirsa; toj c'upil aba jech chac c'u cha'al lum Jerusalén. Chch'ay co'nton avu'un jech chac c'u cha'al soldadoetic ti c'alal lec jmoj chchan yacanique.

⁵ Mu xa xaq'uelun, yu'un laj xa slo'laun li asate. Li stsotsil ajole xco'laj xchi'uc me'tentsunetic ti lec jmoj stsaletic yalel tal ta vitsetic te ta Galaade.

⁶ Li stanal avee ja' jech chac c'u cha'al saquil chijetic ti ja' to ilaj tal yo'ntonic ta atimole, ti lec jmoj ta chab-chab chanovique, ti mu jcotuc chanov stuque.

⁷ Li xocon asate ja' jech chac c'u cha'al javbil caranato ti macal ta aveloe.

⁸ Ac'o me oy oxvinic (60) me' ajvaliletic cu'un, ac'o me oy chanvinic (80) yantic antsetic cu'un, xchi'uc ac'o me mu xlaj ta atel li yantic tsebetique,

⁹ pero jun no'ox li cunin tsebal stsumute, li cunin tuq'uil tsebe; c'ajumal jun ivoq'uesat yu'un li sme'e, lec c'anbil yu'un li boch'o i'ayintasat yu'une. C'alal laj yilic li tsebetique, laj yalic ti staoj lec bendicione; li me' ajvaliletic xchi'uc yantic antsetique lec laj yalbeic sc'oplal.

Tsebetic

¹⁰ Boch'o le'e ti xco'laj xchi'uc yibel vinajel c'alal chacpojan xae, ti lec c'upil sba jech chac c'u cha'al u, ti xojoban no'ox jech chac c'u cha'al c'ac'ale, xchi'uc ti chch'ay co'ntontic yu'un jech chac c'u cha'al soldadoetic ti c'alal lec jmoj chchan yacanique.

Ants

¹¹ Te libat ta nogaltic, bat jq'uel c'usitic lec ch'iem te ta stenlejaltic; bat jq'uel me ta xch'ian tal ts'usubetic, xchi'uc me ta xa xnichinan caranatoetic.

¹² Ta jliquel muc xca'ay c'uxi ic'ot ta pasel, ja' to ca'ay ti te xa'ox tiq'uilun ta scareta jchi'uc li ajvalil cu'une.

Tsebetic

¹³ Sutan tal, sulam ants, sutan tal; sutan tal, sutan tal, yu'un ta jc'an ta jq'uelotcutic. ¿C'u yu'un ti chac'an chaq'uelic li sulam ants ti te ch-ac'otaj ta carpanaetique?