Cantares 5 - Bible in Tzotzil de Chenalhó with Deuterocanon

Vinic

¹ Cunin ixlal, cunin elub, li' xa oyun ta ts'unubaltic cu'une. I'och xa ta jc'ob li mirra xchi'uc muil poxiletic cu'une; laj xa jlo' li spom muc'ta pom cu'une; laj xa cuch' li ya'lel ts'usub xchi'uc li ya'lel xchu' vacaxe. Vo'oxuc ti lec jc'anojoxuque, ve'an uch'anic vo'; loq'ueso avo'ntonic ti c'u yepal chac'anique.

Tsebetic Xchancojal q'ueoj Ants

² Mocholun xa chivay, pero li co'ntone mu xvay o, yu'un ja' jc'upil vinic ti chc'opoje, ti tstij ti'nae, jech chal: “Jambun li ti'nae, cunin ixlal, cunin c'upil tseb, cunin stsumut, cunin tuq'uil tseb, yu'un i'ach' xa ta job osil li jole, solel sts'ujlajet xa ya'lel li stsotsil jole”, xiyutun.

³ Jech la jtac'be: “Jloc'oj xa jc'u', ¿me yu'un tsc'an ta jlap yan velta? Jpocoj xa lec cacan, ¿me yu'un chcac'be yatin ic'ubal noxtoc?”, xichi.

⁴ Li jc'upil vinique la stic' ochel sc'ob ta unin ventana, jech te la stijbun co'nton.

⁵ Lilic, bat jambe ti'na li jc'upil vinique; li jc'obe xco'laj iyatin mirra ya'yel, sts'ujlajet yalel ta sbic'tal jc'ob; iyatin li sjamubil ti'nae.

⁶ La jam li ti'nae, pero li jc'upil vinique mu'yuc xa te oy, ijelov xa'ox batel. C'alal la sc'opanune, ic'ot ta co'nton. La jt'un, pero mu'yuc jta; laj to capta, pero muc xa stac'bun.

⁷ Te la staicun li jchabilumetic ti ja' ta xanic scotol li lume; la smajicun, la syayijesicun; li jchabi ti'coraltonetique la spojbicun jmochib.

⁸ Tsebetic ta Jerusalén, ta jc'anboxuc vocol, ti me oy bu laj avilic li jc'upil vinique, albeic ya'ay ti solel chicham ta sna'ele.

Tsebetic

⁹ ¿Me yu'un mu'yuc xa yan vinic chavil jech chac c'u cha'al ac'upil vinic, vo'ot ti xjelov to ac'ac'al ta scotol yantic antsetique? ¿Me yu'un mu'yuc xa yan vinic chavil jech chac c'u cha'al ac'upil vinic ti persa chbat calcutique?

Ants

¹⁰ Li jc'upil vinique lec saquil vinic, lec chacvoxan vinic; ac'o me capal ta epal mil viniquetic, pero mu xcapij o.

¹¹ Li sjole ja' jech chac c'u cha'al c'anal taq'uin ti toj ven leque; li stsotsil sjole lec muruxtic sba, xchi'uc lec ic'ts'ujan jech chac c'u cha'al sc'uc'umal joj.

¹² Li sbec' sate ja' jech chac c'u cha'al cha'cot stsumut ti pocbil ta ya'lel xchu' vacax, te chcux yo'ntonic ta sti' yavil vo'e.

¹³ Li xocon sate lec jamal jech chac c'u cha'al yav nichimaltic ti lec muic yic' xniche, li yanal yee ja' jech chac c'u cha'al lirio nichim ti chloc' ya'lel, ti lec mu yic' jech chac c'u cha'al mirrae.

¹⁴ Li sc'obe ja' jech chac c'u cha'al xoj ste'el c'obil pasbil ta c'anal taq'uin; li sbec'tale ja' jech chac c'u cha'al saquil sts'uts'up tsemen ti yich'oj zafiro tonetique.

¹⁵ Li yacane ja' jech chac c'u cha'al oyetic pasbil ta mármol ton ti nacanbil lec ta bats'i c'anal taq'uine; ti c'u x'elan yutsil ta q'uelele ja' jech chac c'u cha'al ch'ut te'etic ta Líbano ti lec t'ujbile.

¹⁶ Li yee noj ta c'usitic lec chi'; ta scotlijil toj c'upil sba ta q'uelel. Tsebetic ta Jerusalén, ja' jech x'elan li jc'upil vinique; ja' jech x'elan li boch'o lec jc'anoje.