Cantares 2 - Bible in Tzotzil de Chenalhó with Deuterocanon

Ants

¹ Vu'un rosa nichimun te ta Sarón; vu'un lirio nichimun te ta stenlejaltic.

Vinic

² Li jc'upil tsebe ja' jech c'otem ta stojol yantic antsetic jech chac c'u cha'al jpets lirio nichim ch'iem ta o'lol ch'ixtic.

Ants

³ Li jc'upil vinique ja' jech c'otem ta stojol yantic viniquetic jech chac c'u cha'al jpets mantsano ch'iem ta o'lol te'tic. Toj jun no'ox yutsil chca'ay ti c'alal te chichoti ta xyaxinale; li sate toj chi' ta lo'el chca'ay.

⁴ Laj yic'un batel ti bu pasub q'uin yu'une; lec xvinaj ta sat ti chisc'anune.

⁵ Ac'bun jve' taqui ts'usubetic sventa oy lec jtsatsal, ac'bun jlo' mantsanoetic, yu'un xlaj xtu'p xa co'nton yu'un li ac'anele.

⁶ Ac'o xq'uechbun jol li ats'etc'obe; ac'o smeyun li abats'ic'obe.

⁷ Tsebetic ta Jerusalén, albicun ca'ay ta jamal ti chaloq'uic batel ta anil jech chac c'u cha'al te'tical tsebal chijetic, ti mu xatuch'bicun ta be c'alal ta jc'opan jba jchi'uc li jc'upil vinique, ja' to me jech la sc'an stuque.

Xcha'cojal q'ueoj Ants

⁸ Li jc'upil vinique tal xa; chc'opoj xa tal. Te xa ch-anilaj tal ta vitsetic; te xa xbitbun tal ta tseltseltic.

⁹ Li jc'upil vinique ja' jech chac c'u cha'al vaxacq'uelum; ja' jech chac c'u cha'al tsajal chij. Li' xa oy ta patnae; te xa chq'uelvan ochel tal ta ventana; te xa nach'al ta xchajchajtaq'uinal ventana.

¹⁰ Li jc'upil vinique jech laj yalbun: “Lican me cunin c'upil tseb, cunin c'ac'al tseb, la' chi'inun.

¹¹ Q'uelavil, ijelov xa yorail sictic, xchi'uc ijelov xa yorail vo'olaltic.

¹² Ch'iemic xa tal nichimetic ta banamil; ja' xa yorail q'ueoj; li' ta jlumaltique chvinaj xa ch-oc' puruvoc stsuetic.

¹³ Laj xa yac' sat li higoe; li ts'usubtique puquem xa batel smuil yic' li xnichtaque. Lican me cunin c'upil tseb, cunin c'ac'al tseb, la' chi'inun”, xiyutun.

Vinic

¹⁴ Cunin stsumut, vo'ot ti te oyot ta ch'entique, ti te oy anac'ubbail ta japjap ch'entique, ac'bun jq'uel li asate; c'opojan ca'tic yu'un toj alac' sba ta q'uelel li asate, yu'un toj c'upil sba ta a'yel li ac'ope.

¹⁵ La' jtsactic li me'vetetic xchi'uc li bic'tal me'vetetique, yu'un ja' ta soquesic li ts'usubtique, yu'un ja' to yolel ta nich li jts'usubtique.

Ants

¹⁶ Ja' xa cu'un li jc'upil vinique, xchi'uc ja' xa yu'unun ec; ja' te chac' ve'uc xchijtac ta yut lirio nichimaltic.

¹⁷ C'alal me isacub osile, me ich'ay batel li ac'ubaltique, jc'upil vinic, sutan tal ta anil te ta toyol vitsetic jech chac c'u cha'al vaxacq'uelum, jech chac c'u cha'al tsajal chij.