Cantares 1 - Bible in Tzotzil de Chenalhó with Deuterocanon

¹ Q'ueoj yu'un Salomón, ja' no'ox stuc toj lec ta scotol yantic q'ueojetic.

Sba scojal q'ueoj Ants

² Ac'o sts'uts'un li avee, yu'un toj lec mu jech chac c'u cha'al ya'lel ts'usub li c'upinel avu'une.

³ Toj mu yic' li muil poxiletic avu'une; li abie toj lec jech chac c'u cha'al yic' muil poxil ti c'alal chich' malele, ja' yu'un lec sc'anojicot li tsebetique.

⁴ Ic'un batel ta ora; ajvalil, ic'un batel ta ana. Toj xcuxet no'ox co'ntoncutic avu'un, yu'un toj jun yutsil li c'upinel avu'une, ja' jech chac c'u cha'al ya'lel ts'usub, ja' yu'un toj lec sc'anojicot li antsetique.

Tsebetic Ants

⁵ Antsetic ta Jerusalén, tsajal antsun no'ox, pero lec c'upil jba, jech chac c'u cha'al carpanaetic ta Cedar, jech chac c'u cha'al poq'uetic smac sventana Salomón.

⁶ Mu ja'uc xaq'uelic ti tsojun no'oxe, ti c'aq'uemun no'ox ta c'ac'ale. Yu'un li jchi'iltac ta voq'uele i'ilinic ta jtojol; la staquicun batel ta xchabiel ts'usubtic, jech mu'yuc la jtuc'ulan jba jtuc li vu'une.

⁷ Jc'upil vinic, albun ca'ay ¿bu chbat avac'be sa' sve'elic li achijtaque? ¿Bu chbat avac'be xcux yo'ntonic ta o'lol c'ac'ale? ¿Me lec ti xco'laj xchi'uc jmulavil antsun te ta jsa'ilanot ta stojol li yan jchabichijetique?

Tsebetic

⁸ ¿Me mu xana' bu vo'ot ti atuc no'ox toj lec alac' aba ta scotol yantic antsetique? Ja' t'unbo batel yav yacan li chijetique; te xavac' ve'uc avunin tentsuntac ta nopol snail xcuxub-o'ntonic li jchabichijetique.

Vinic

⁹ Cunin c'upil tseb, toj lecot; co'olot jech chac c'u cha'al slequil sme' sca' faraón ti chnitbat scaretae.

¹⁰ Lec xa c'upil sba asat c'otem yu'un li staq'uinal achiquine; toj alac' xa sba anuc' c'otem yu'un li anats'e.

¹¹ Li staq'uinal achiquine ta jpastic yan ta c'anal taq'uin; lec butumtic sba capbil ta saquil taq'uin ta jpastic.

Ants

¹² C'alal te chotol ta sti' xmexa li ajvalile, li muil poxil quich'oje la spuc sba yic'.

¹³ Li jc'upil vinique ja' jech chac c'u cha'al jchup muil poxil cac'oj ta sna co'nton.

¹⁴ Li jc'upil vinique ja' jech c'otem cu'un jech chac c'u cha'al jchoj xnich alhenya ti xch'i ta ts'usubaltic te ta En-gadie.

Vinic

¹⁵ Cunin c'upil tseb, toj alac' aba, toj ven c'oc'ot; li xchibal sbec' asate xco'laj xa xchi'uc cha'cot stsumut yilel ti toj alac' sbae.

Ants

¹⁶ Jc'upil vinic, toj lec c'ac'al vinicot, toj c'upil aba; li jvayabtique ja' jech chac c'u cha'al nichimaltic.

¹⁷ Li sts'amte'altac jnatique puru ch'ut te'etic; li smac sjole puru nuculpat tojetic.