Apocalipsis 2 - Bible in Tzotzil de Chenalhó with Deuterocanon

Itacbatic batel scarta jtsob jch'unolajeletic ta lum Éfeso

¹ Jech laj yalbun noxtoc li Cajvaltique: “Jech xats'ibabe batel li j'almantal yu'un jtsob jch'unolajeletic ta lum Efesoe: ‘Li Boch'o stsacoj ta sbats'ic'ob vucub c'anale xchi'uc ti te chanov ta o'lol li vucub candeleroe, jech chayalboxuc:

² Vu'une xcotquin li avabtelique; jna'oj ti tsots cha'abtejic ta jtojole, xchi'uc ti tsts'ic avu'unic vocole, xchi'uc ti mu xac'an xachi'inic li boch'otic chopolique. Jech noxtoc laj xa aq'uelbeic lec yabtelic li boch'otic jcholc'opetic scuyoj sbaique; laj avilic ti ja' no'ox ch-epalc'opojique.

³ Laj ats'iquic vocol; tsots la'abtejic ta jventa; muc xchibaj avo'ntonic.

⁴ Pero oy to c'usi mu lecuc chquil, yu'un mu xa xac'anicun lec jech chac c'u cha'al ta sliqueb.

⁵ Vuleso ta avo'ntonic ti bu lic chibajanic tale. Suteso avo'ntonic. Taic ti c'u ono'ox xa'elanic ta sliquebale. Me mu xapasic jeche, chital ta ora, chtal jloq'ues li candelero ta atojolique. Jech ta jpas ti me mu xasutes avo'ntonique.

⁶ Pero oy to c'usi lec chapasic chquil. Yu'un chacontrainic c'usi tspasic li nicolaetique. Jech contra chquil ec.

⁷ Li boch'o oy xchiquine, ac'o ya'ibe smelol c'usi ch-albat yu'un Ch'ul Espíritu li jujutsob jch'unolajeletique. Li boch'o tstsal yu'un scotole ta xcac'be slo'ic li sat te' sventa cuxlejal sbatel osile, ja' ti te oy ta o'lol ts'unubaltic yu'un Diose, xayutoxuc li Cajvaltique’, uto”, xiyutun.

Scarta jtsob jch'unolajeletic ta lum Esmirna

⁸ Jech laj yalbun noxtoc li Cajvaltique: “Jech xats'ibabe batel li j'almantal yu'un jtsob jch'unolajeletic ta lum Esmirnae: ‘Li Boch'o te oy ta sliqueb xchi'uc ta slajebe, ja' ti icham xchi'uc ti icha'cuxie, jech chayalboxuc:

⁹ Vu'une xcotquin li avocolique xchi'uc li ame'onalic ta scoj vocole, pero jc'ulejoxuc chquil. Xchi'uc jna'oj noxtoc ti chchopolc'opoj ta atojolic li mero judioetic scuyoj sbaique. Pero ta melel mu ja'icuc. Ja' sna banquilal pucuj c'otemic.

¹⁰ Mu me xaxi'ic yu'un li vocol chtal ta atojolique. A'yo ava'yic, li pucuje ta stic'oxuc jayibuc ta chuquel, yu'un ta sq'uelboxuc avo'ntonic. Chavich'ic tsots vocol lajunebuc c'ac'al. Junuc me avo'ntonic ta jtojol ac'o me te chachamic o, jech chacac'boxuc acoronaic sventa cuxlejal sbatel osil.

¹¹ Li boch'o oy xchiquine ac'o ya'ibe smelol c'usi ch-albat yu'un Ch'ul Espíritu li jujutsob jch'unolajeletique. Li boch'o tstsal yu'un scotole mu xbat yich' vocol ta xchibal velta lajel, xayutoxuc li Cajvaltique’, uto”, xiyutun.

Scarta jtsob jch'unolajeletic ta lum Pérgamo

¹² Jech laj yalbun noxtoc li Cajvaltique: “Jech xats'ibabe batel li j'almantal yu'un jtsob jch'unolajeletic ta lum Pergamoe: ‘Li boch'o yich'oj espada ti lec ts'ubts'ub sni', xchi'uc ti lec juxbil xcha'jotal yee, jech chayalboxuc:

¹³ Vu'une xcotquin ti bu nacaloxuque; jna'oj ti te nacaloxuc yo' bu yac'oj xchotleb li banquilal pucuje. Pero te to acuchojbicun o li jbie; mu'yuc bu xamuc ta avo'ntonic ti ach'unojique. Muc xaxi'ic o c'alal imilat te yo' bu oyoxuc li cajtunel Antipas ti jun yo'nton itun te yo' bu yac'oj xchotleb li banquilal pucuje.

¹⁴ Pero oy to jutuc c'usi chopol chapasic chquil. Yu'un te achi'uquic li boch'otic jech chchanubtasvanic jech chac c'u cha'al li Balaame. Ja' ti la xchanubtas ajvalil Balac ta vo'one c'u x'elan xu' chyalic ta lum li israeletique, yu'un jech xu' chlic sti'ic li milbil matanal ta sventa c'usitic cuybilic ta Diose, xchi'uc jech xu' chlic mulivajicuc.

¹⁵ Jech noxtoc lec chavilic li boch'otic jech ta xchanubtasvanic jech chac c'u cha'al li nicolaetic ti vu'un chopol chquile.

¹⁶ Ja' yu'un suteso me avo'ntonic. Me mu xasutes avo'ntonique, chital ta ora ta atojolic; vu'un jtuc chtal jcontrain xchi'uc li espada chloc' ta quee.

¹⁷ Li boch'o oy xchiquine, ac'o ya'ibe smelol c'usi ch-albat yu'un Ch'ul Espíritu li jujutsob jch'unolajeletique. Li boch'o tstsal yu'un scotole ja' chcac'be sve'ic li manavaj ti mu'yuc boch'o sna' c'u x'elane, xchi'uc ta xcac'beic jbej unin saquil ton yo' bu ts'ibabil ach' sbi stuc ti mu'yuc boch'o yan xotquine. Ja' no'ox stuc xotquin li boch'otic chich'e, xayutoxuc li Cajvaltique’, uto”, xiyutun.

Scarta jtsob jch'unolajeletic ta lum Tiatira

¹⁸ Jech laj yalbun noxtoc li Cajvaltique: “Jech xats'ibabe batel li j'almantal yu'un jtsob jch'unolajeletic ta lum Tiatirae: ‘Li Xnich'on Dios ti xpulpun no'ox jujubej sat jech chac c'u cha'al yat c'oq'ue, xchi'uc ti sts'ayayet yacan jech chac c'u cha'al bronce taq'uin c'alal me ch'ulbil xa leque, jech chayalboxuc:

¹⁹ Vu'une xcotquin li avabtelique xchi'uc ti ac'anojicune. Xcotquin noxtoc ti oy xch'unojel avo'ntonique, ti lec cha'abtejic cu'une, xchi'uc ti lec tsts'ic avu'unic scotole. Jna'oj ti ech'em to cha'abtejic cu'un jech chac c'u cha'al la'abtejic ta sliquebe.

²⁰ Pero oy to jutuc c'usi chopol chapasic chquil. Yu'un te no'ox aq'uelojic li Jezabel ti tscuy sba ta j'alc'op cu'une. Te chchanubtas, te tslo'la cajtuneltac ti xu' tsti'ic li milbil matanal ta sventa c'usitic cuybilic ta Diose, xchi'uc ti xu' chmulivajique.

²¹ Laj xa jmala jal ti ac'o sutes yo'ntone, pero mu sc'an sutes yo'nton ta sventa li mulivajele.

²² Ja' yu'un a'yo ava'yic, vu'un ta jip yalel ta svayab. Jech noxtoc li boch'otic ja' la xch'unic lo'lael yu'un li antse, ta xcac'be tsots svocolic ec me mu sutes yo'ntonic yu'un smulique.

²³ Yan li mero yalabtac stuc li antse, ta jmilic o. Yu'un jech tsna'ic o scotol cu'untac ta jujutsob ti vu'un jna'ojbe, ti vu'un xcotquinbe yo'nton li cristianoetique, xchi'uc ti vu'un ta xcac'be stojol ti c'u x'elan yabtelique.

²⁴ Vo'oxuc ti te oyoxuc ta Tiatira ti mu'yuc ach'unojic li chopol chanubtasel le'e, xchi'uc ti mu'yuc ach'unojic noxtoc ti chalic tsc'an ta jna'betic c'u x'elan yo'nton li Satanase, mu'yuc yan icatsil chacac'boxuc.

²⁵ Ja' no'ox chacalboxuc, li c'usi ach'unojique ja' me ch'unic o c'alal to chital.

^26-27 Li boch'otic tstsal yu'un scotole, ti jun yo'nton tspasic o c'usi ta jc'an c'alal to ta slajebe, ja' chcac'be tsots yabtelic ta sventa scotol cristianoetic ta jujun banamil jech chac c'u cha'al yac'ojbun cabtel li Jtote. Biq'uitic tslilinic ta vaston ti pasbil ta taq'uine, jech j'ech'el chvoq'uic o jech chac c'u cha'al bin.

²⁸ Jech noxtoc ta xcac'beic li muc'ta c'anal chloc' ta jujun sobe.

²⁹ Li boch'o oy xchiquine, ac'o ya'ibe smelol c'usi ch-albat yu'un Ch'ul Espíritu li jujutsob jch'unolajeletique, xayutoxuc li Cajvaltique’, uto”, xiyutun.