Apocalipsis 16 - Bible in Tzotzil de Chenalhó with Deuterocanon

La smalic ta banamil sbel stazaic li vucub j'almantaletique

¹ Laj ca'ay oy boch'o tsots chc'opoj tal ta ch'ulna ta vinajel, jech laj yalbe li vucub j'almantaletique: “Bat malic ta banamil sbel li vucub taza avich'ojique, ja' li sc'ac'al yo'nton Diose”, x'utatic.

² Jech iloc' batel li sba j'almantale, bat smal ta banamil li sbel stazae. Jech ilic ep c'a'al chin ta sbec'talic scotol li boch'otic yich'ojbeic smarcail li jti'vanej bolome, xchi'uc ti yich'ojbeic ta muc' li sloc'obale. Li chine toj chopol, xchi'uc toj c'ux.

³ Li xchibal j'almantale bat smal ta nab li sbel stazae. Jech ic'ataj ta ch'ich' scotol li nabetique, xco'laj xchi'uc xch'ich'al anima ic'ot. Icham scotol li c'usitic cuxajtic ta nabe.

⁴ Li yoxibal j'almantale bat smal ta scotol uc'umetic xchi'uc ta scotol nio'etic li sbel stazae. Jech ic'ataj ta ch'ich' scotol.

⁵ Laj ca'ay ic'opoj li j'almantal ti sventainoj vo'etique, jech laj yal: “Li vo'ote toj tuc' c'usi chapas, vo'ot ti cuxulot oe, ti te ono'ox oyot o ta vo'onee, vo'ot Ch'ul Diosot. Tuc' lachapanvan, laj xa avac'be stojol li mulile.

⁶ Yu'un li boch'otic la smalbeic xch'ich'al avu'untaque xchi'uc li avaj'alc'optaque laj xa avac'beic ch'ich' yuch'ic ec. Ja' jech stojol tsc'anic”, xi.

⁷ Laj ca'ay oy boch'o chc'opoj noxtoc te ta scajleb smoton li Diose, jech laj yal: “Cajval Dios, vo'ot ti ech'em avu'ele, tuc' chachapanvan, melel scotol li c'usitic chavale”, xi.

⁸ Li xchanibal j'almantale bat smal ta c'ac'al li sbel stazae. Jech ic'aq'uic li cristianoetique.

⁹ C'alal chc'ac' cha'yic li cristianoetique, yo'to ichopolc'opojic ta stojol li Dios ti ja' sventainoj scotol li tsatsal vocole. Muc sutes yo'ntonic o; muc xich'ic ta muc' li Diose.

¹⁰ Li yo'bal j'almantale bat smal yo' bu xchotleb jti'vanej bolom li sbel stazae, jech i'ic'ub osil ta scotol ti bu tspas mantale. Li cristianoetique te tsti'ilan yoq'uic ta scoj xc'uxul li chin ch'iem ta sbec'talique.

¹¹ Pero te ono'ox chchopolc'opojic o ta stojol Dios ta vinajel ta scoj xc'uxul li c'a'al chinetique. Muc ono'ox sutes yo'ntonic o.

¹² Li svaquibal j'almantale bat smal ta muc'ta uc'um Éufrates li sbel stazae. Jech i'ul li uc'ume. Jech xu' xa chjelovic tal ta paspleito li ajvaliletic ta sloq'ueb c'ac'ale.

¹³ Ts'acal laj quil iloc' jujun chopol pucujetic ta yeic li dragone, xchi'uc li jti'vanej bolome, xchi'uc li jlo'lavanej j'alc'op yu'une. Xco'laj xchi'uc xpococ yilel ti iloc'an ta yeique.

¹⁴ Li pucujetic iloc'an ta yeique xu' yu'un tspasic sq'uelubil stsatsalic. Ja' chbat stsobic tal scotol ajvaliletic ta sbejel banamil sventa ac'o spasic muc'ta pleito ta sc'ac'alil yu'un li Dios ti ech'em svu'ele.

¹⁵ Pero li Cajvaltique jech chal: “A'yo ava'yic, li vu'une ja' jech chital jech chac c'u cha'al j'elec'. Xcuxet no'ox yo'nton li boch'o viq'uil sate, ti sq'ueloj, ti stuc'ulanoj lec li sc'u'e, ti muc t'analuc chanove, ti mu xac' sba ta q'uexlale”, xi.

¹⁶ Ja' te la stsobic tal ta jun banamil ti Armagedón sbi ta hebreo c'ope.

¹⁷ Li svucubal j'almantale la smal ta ic' li sbel stazae, jech oy boch'o tsots ic'opoj ta ch'ulna ta vinajel, jech laj yal: “Pasbil xa scotol”, xi.

¹⁸ Jech iloc' ep sacsevul, xchi'uc oy c'usi tsots ibac', xchi'uc ibac' ep chauc, xchi'uc tsots inic sbejel banamil. Mu'yuc ono'ox baq'uin jech stsatsal xnic banamil ti c'alal lic ayinuc li cristianoetique.

¹⁹ Li muc'ta lume ijav ta oxvoc'. Li muc'tic lumetic ta jujun banamile iloman noxtoc. Li Diose muc xch'ay ta yo'nton li muc'ta lum Babilonia ti tsc'an chac'be yuch' li bis ti nojem ta sc'ac'al yo'ntone.

²⁰ Ja' yu'un li banamiletic cacajtic ta nabe ijatovan batel. Li vitsetique muc xvinaj c'uxi ibatan.

²¹ Xchi'uc ital muc'tic bot ta stojol li cristianoetique, ech'em ta cha'vinic (40) kilo yalal jujubej. Li cristianoetique ep ichopolc'opojic ta stojol Dios ta sventa ti ital li muc'tic bote. Yu'un toj ech'em tsots li stojol smul i'ac'batique.