Amós 9 - Bible in Tzotzil de Chenalhó with Deuterocanon

Mu'yuc boch'o chcol c'alal chac' stojol mulil li Diose

¹ Li Muc'ul Diose laj quil te va'al ta sts'el scajleb matanal, jech laj yalbun: “Bat lilino ta voq'uel li xlechlechil sjol oye; ac'o nicuc c'alal ta snacleb, ac'o lilijuc yalel ta sjolic li achi'iltaque. Li boch'otic cuxul to chcomique ta jmilic ta espada. Me junuc mu'yuc boch'o ta xcol; mu'yuc boch'o ta xjatov.

² Ac'o me ch-och snac' sbaic c'alal to ta yutil banamil, te chbat jquilic loq'uel tal; ac'o me chmuyic c'alal to ta vinajel, te chbat jipic yalel tal.

³ Me chbat snac' sbaic ta sjol li vits Carmeloe, te chbat jt'unic tal; ac'o me tsnac' sbaic ta jtojol ta yutil nab, te ta jtac batel jti'val chon yu'un ac'o ti'aticuc.

⁴ Me chucbil chbatic yu'un li yajcontraique, te ta jtac batel milel ta espada ta stojolic noxtoc. Yu'un ta jq'uelbe o slajebic, mu'yuc ta jcoltaic”, xi li Diose.

⁵ Li Cajvaltic, ja' li Muc'ul Dios ti tspas ta mantal scotol te ta vinajele, c'alal ta stij li banamile, ta xnic yu'un, ta syuq'uilan sba, xyal xmuy no'ox jech chac c'u cha'al li uc'um ta Egiptoe, jech ta xlic oq'uicuc li jnaclumetique.

⁶ Li Muc'ul Diose la spas snacleb te ta vinajel, ja' la xlich'an li vinajel ta yac'ol banamile; ja' ta xic' muyel li vo' ta nabe, ja' ta smal yalel tal ta banamil. Ja' Muc'ul Dios xi sbi.

⁷ Jech chal li Muc'ul Diose: “Israeletic, co'oloxuc xa no'ox achi'uquic chquil li etiopiaetique. Li vo'oxuque laj quic'oxuc loq'uel tal ta Egipto banamil. Ja' no'ox jech laj quiq'uic loq'uel tal ta Creta ec li filistaetique; jech noxtoc li arametique laj quiq'uic loq'uel tal ta Kir”, xi.

⁸ Q'uelo me abaic, yu'un vu'un li Muc'ul Diosun ti avajvalicune, ta me jq'ueloxuc tal, jpasmulil israeletic jech chcal ta aventaic: “Ta jyavnaijesoxuc li' ta sba banamil, pero mu'yuc ta xcules o scotol li smomnich'nab Jacobe.

⁹ Ta xcal mantal ti ac'o yich' chichinel li smomnich'nab Israel jech chac c'u cha'al chich' chichinel yi'e. Li slequile chich' puquel batel ta yantic banamil; yan li xchopolile chich' ch'ayel o.

¹⁰ Li jpasmuliletic te ta stojol jteclumale ta xlajic ta milel ta espada, ja' li boch'otic jech chalique: ‘Mu'yuc c'usi ta jpastic, mu'yuc chtal ta jtojoltic li vocole’, ti xiique.

Ta to xlic yich' c'uxubinel ta ts'acal li Israele

¹¹ “Me la sta sc'ac'alile, ta xlic jcha'meltsanbe li sna David ti bu soquemique. Ta jmacan ti bu jamajtique, ta jcha'pac'an ti bu t'olemique. Ja' jech ta jpas jech chac c'u cha'al pasbil ono'ox ta vo'onee.

¹² Yu'un jech li boch'otic yich'ojicun ono'ox ta muq'ue, xu' chlic sventainic yan velta li edometic ti c'u to yepal cuxul comenique xchi'uc li yantic banamile. Vu'un jtuc ta xcac' c'otuc ta pasel jech”, xi li Muc'ul Diose.

¹³ “Ta to sta sc'ac'alil ti te xa nabalic batel jloc-banamiletic ti c'alal ja' to chich' tuch'el trigoe. Xchi'uc te xa nabalic batel jts'un ts'usubetic ti c'alal mu'yuc to chlaj yich' pits'bel ya'lel li ts'usube. Li vitsetique tsloq'uesic ep ya'lel ts'usub; li tseltseltique tsloq'uesic ya'lel ts'usub jech chac c'u cha'al chloc' vo'.

¹⁴ Li jteclumal Israele, ta xlic quiq'uic sutel tal ti bu chucbilic batel ta yan banamile. Ta xlic xcha'va'anic li lumetic ti jinesbilique; ja' te ta xlic naquiicuc. Ta xlic sts'unic ts'usubtic, chlic yuch' stuquic li ya'lel sts'usubique. Ta xlic sts'unic jsatinom te'etic, te ta slo'beic lec sat.

¹⁵ Ta xlic jcha'ts'unic lec ta yosilalic; mu'yuc xa ta xich'ic bulel o loq'uel yan velta, yu'un vu'un jtuc chcac'beic yan velta”, xi li Muc'ul Diose, ja' li Dios cu'untique.