Amós 8 - Bible in Tzotzil de Chenalhó with Deuterocanon

Sc'oplal jun moch noj ta sat te'etic lec yijic

¹ Li Cajvaltic, ja' li Muc'ul Diose, oy c'usi laj yac'bun quil noxtoc: Laj quil jun moch noj ta sat te'etic, lec xa yijic.

² Jech laj yalbun: —Amós, ¿c'usi chavil? —xiyutun. —Ta xquil jun moch noj ta sat te'etic, lec xa yijic —xcut. Jech laj yalbun: —Ja' jechic li israeletique, iyijubic xa. Ic'ot xa sc'ac'alilic; mu xa xu' cu'un ta jts'icbeic.

³ Li jq'uejimoletic ta ch'ulnae ta to x'oq'uic me la sta sc'ac'alile. Ep boch'o ta xcham; puru anima te mochajtic, me jutuc mu'yuc xa boch'o ta xbac' —xi li Cajvaltic Diose.

Nopol xa sc'ac'alil chich' ac'bel stoj smul li Israele

⁴ A'yo ava'yic, vo'oxuc ti chavuts'intaic li boch'otic abul sbae, ti chavulesic o li me'onetic te ta avosilalique,

⁵ jech chavalic: “Ech'uc ta ora ca'tic li sq'uinal unin ue, xchi'uc ech'uc ta ora ca'tic li sc'ac'alil cuxub o'ntonale, yu'un jech xu' ta jchon jtrigotic, xchi'uc xu' oy c'usi ta jchontic ta toyol stojol. Xu' ta jbic'tajesbetic li sbisubile; xu' mu'yuc ts'acal ta xcac'tic.

⁶ Xu' ta jchontic c'alal ta spat li jtrigotique. Jech xu' chlic xchon sbaic ta mozoil ta jtojoltic li me'onetique; xu' chlic sjel sbaic ta xonobil li boch'o abul sbaique”, xachiic.

⁷ Li Muc'ul Diose, ja' li stsatsal yo'nton Jacobe, jech chal ta jamal: “Me jutuc mu xch'ay ta co'nton o li c'usi tspasique”, xi.

⁸ ¿Me mu'yuc ta xlic nicuc banamil ta sventa le'e? ¿Me mu'yuc chlic oc'uc li jnaclumetic te ta yosilalique? Li banamile ta xlic syuq'uilan sba; xyal xmuy no'ox jech chac c'u cha'al uc'um Nilo ta Egipto.

⁹ Jech chal li Cajvaltic Diose: “C'alal me la sta sc'ac'alil le'e, ta xcac' ic'ubuc osil ta o'lol c'ac'al no'ox; c'alal lec to sac li osile, ta xlic ic'ubuc li banamile.

¹⁰ Li q'uinetic avu'unique ta jc'atajes ta at-o'nton; li q'ueojetic avu'unique ta jc'atajes ta oq'uel. Ta xcac' alapic c'u'il sventa at-o'nton, xchi'uc chlic ajux ajolic ta sventa at-o'nton. Ta xcac' oc'anic jech chac c'u cha'al ch-oc' boch'o chcham xnich'on ti c'ajumal jun oy yu'une; chalajic ta ven tsatsal vocol”, xi.

¹¹ Jech chal noxtoc li Muc'ul Diose: “Ta to sta sc'ac'alil ta jtac tal tsots vi'nal li' ta banamil, pero mu ja'uc vi'nal ta sventa mu'yuc ave'elic, mu ja'uc ta sventa mu'yuc c'usi chavuch'ic, o mu'yuc ava'alic; ja' vi'nal ta sventa ti mu'yuc xa bu chava'yic o jc'op, vu'un li Muc'ul Diosune.

¹² Jech chaliquic ta vovil xanubal, chabatic c'alal to ta sti' muc'ta nab xchi'uc c'alal to ta sti' li Nab Muerto sbie, c'alal ta vitsetic ta Líbano xchi'uc c'alal to ta ti' uc'um Jordán; chasa'ilanic li jc'ope, pero mu xataic o.

¹³ Me la sta sc'ac'alil le'e, ta xlic alubicuc ta taqui-o'nal li tsebetic avu'unic ti toj c'upilic sbae xchi'uc li queremetic ti lec tsotsique.

¹⁴ Li boch'otic tsva'anic ta testigo li sloc'obal diosetic ta Samariae, li boch'o tsva'anic ta testigo li sloc'obal dios ta Dane, li boch'o tsva'anic ta testigo li sloc'obal dios ta Beersebae, j'ech'el chyalic o ta lum, mu xa stotsic o”, xi li Muc'ul Diose.