Amós 7 - Bible in Tzotzil de Chenalhó with Deuterocanon

Li Amose laj yil ta xch'ulel c'ulubetic

¹ A'yo ava'yic c'usi laj yac'bun quil ta jch'ulel li Cajvaltic, ja' li Muc'ul Diose: C'alal sbojoj xa'ox loq'uel sve'el xvacax li ajvalile ipul tal yan velta li ts'i'laltique, li Diose ja'o laj yac' ayinuc epal c'ulubetic.

² Ts'acal to, c'alal lajubal xa'ox ta lo'el ts'i'laltic yu'un li c'ulubetique, jech laj calbe: —Cajval, Muc'ul Dios, pasbuncutic perdón, mu xcuch yu'unic li smomnich'nabtac Jacobe, yu'un solel mu'yuc stsatsalic —xcut.

³ Li Muc'ul Diose muc to spas li c'usi snopoj tspase, jech laj yal: —Mu'yuc chc'ot ta pasel jech —xi.

Li Amose i'ac'bat yil jun muc'ta c'oc' ta xch'ulel

⁴ Jech laj yac'bun quil ta jch'ulel noxtoc li Muc'ul Diose: Laj quil la stac tal tsatsal c'oc' sventa stojol mulil. Laj yules scotol li muc'ta nabe xchi'uc ic'ac' c'uuc smuc'ul li banamile.

⁵ Jech laj calbe: —Cajval, Muc'ul Dios, pajeso li c'oq'ue. Mu xcuch yu'unic li smomnich'nab Jacobe, yu'un solel mu'yuc stsatsalic —xcut.

⁶ Li Muc'ul Diose muc to spas li c'usi snopoj tspase, jech laj yal: —Mu'yuc chc'ot ta pasel —xi li Cajvaltic Diose.

Li Amose i'ac'bat yil ta xch'ulel jun plomo sventa yabtejeb alvanil

⁷ Li Muc'ul Diose oy c'usi yan laj yac'bun quil noxtoc: Te va'al ta sts'el pac'benal na, yich'oj jun plomo sventa yabtejeb alvanil.

⁸ Jech la sjac'bun: —Amós, ¿c'usi chavil? —xiyutun. —Ta xquil jun plomo sventa yabtejeb alvanil —xcut. Jech laj yalbun: —A'yo ava'ay, vu'un ta xcac'be plomo li smomnich'nab Israele yu'un jech chvinaj ti mu'yuc xa tuc' jech chac c'u cha'al pac'bel na mu'yuc tuq'ue; mu xa xu' cu'un ta jts'icbeic.

⁹ Li toyol c'opojebaletic yu'un Isaaque ta xich' jinesel scotol; li snail sloc'obal diosetic yu'un Israele ta xich' yavnaijesel o, xchi'uc ta jcontrainic ta espada li smomnich'nabtac Jeroboame —xiyutun.

Li j'alc'op Amose la stsac sbaic ta c'op xchi'uc Amasías

¹⁰ Li pale Amasías te ta Betele jech laj yalbe batel li ajvalil Jeroboam ta Israele: “Ajvalil, li Amose ta xchapilan ac'oplal ta mucul ta stojol li jchi'iltactic ta israelale. Ta sjunul li cosilaltique mu xa sts'ic yu'unic li c'usi chalilane.

¹¹ Yu'un jech ta xal: ‘Li Jeroboame ta xich' milel ta espada, scotol li israeletique ta xich'ic chuquel batel ta yan banamil’, xi chal”, xut batel li ajvalile.

¹² Li Amasiase jech laj yalbe li Amose: —J'alc'op, batan, jatovan batel ta yosilal Judá. Ja' te xaval li c'usi chc'ot ta pasele; te ac'o yaq'uic ave'el.

¹³ Mu xa xavalilan li' ta Betele, yu'un ja' ch'ulna ti muc' sc'oplal ta scotol Israele, ja' ti bu chich' ta muc' Dios li ajvalile —xut.

¹⁴ Li Amose jech la stac'be: —Muc j'alc'opucun, muc xnich'onucun j'alc'opetic noxtoc. Li vu'une jchabichijun no'ox, xchi'uc ja' no'ox ta jq'uelilanbe sat te'tical higoetic.

¹⁵ Pero li Muc'ul Diose laj yic'un ti c'alal te nabalun ta spat jchijtaque, jech laj yalbun: ‘Batan, bat alo c'usi chc'ot ta pasel ta stojol li jteclumale, ja' li Israele’, xiyutun.

¹⁶ Ja' yu'un, a'yo ava'ay c'usi chal li Muc'ul Diose. Li vo'ote jech chaval: ‘Mu xaval c'usi chc'ot ta pasel li' ta Israele; mu c'usi xaval ta sventa li smomnich'nab Isaaque’, xachi.

¹⁷ Pero jech chayalbot li Muc'ul Diose: ‘Li avajnile ta spas ta jmulavil ants li' ta lum; li aquerem atsebetique ta xlajic ta milel ta espada. Li avosile yanlum cristianoetic ta xlic svoq'uilanbe sbaic; li vo'ote te chacham ta yosilal yanlum cristianoetic; li smomnich'nab Israele chucbil chbatic ta yan banamil’, xi li Diose —xut.