Amós 6 - Bible in Tzotzil de Chenalhó with Deuterocanon

Chich' jinesel Israel

¹ Ay, toj abul sbaic li boch'otic jeche' no'ox chcux yo'ntonic te ta Sione, xchi'uc li boch'otic mu c'u xtal ta yo'ntonic te nacalic ta Samariae, ja' li banquilaletic te ta jun banamil ti muc' sc'oplal ta scotol yantic banamile, ti ja' te yac'oj sbaic scotol li israeletique.

² Batanic ta Calne, q'uelo lec avilic. Ts'acal xabatic ta Hamat, ja' li muc'ta lume; ts'acal xayalic batel ta Gat, ja' li yosilal filistaetique. Q'uelavilic me vo'oxuc toj ech'em xu' avu'unic jech chac c'u cha'al li yantic banamile, xchi'uc me ja' xjelov smuc'ul avosilalic jech chac c'u cha'al li yosilalique.

³ Li vo'oxuque mu xac'anic xtal li chopol orae, pero avac'ojbeic yipal spasel noxtoc li tsatsal uts'intaele.

⁴ Jun avo'nton chavayic ta lequil vaybal t'ujumtasbil ta sts'uts'up tsemen; puru cux o'nton chapasic ta lequil chotlebaletic noxtoc. Chapasic q'uin achi'uquic ch'ium chijetic xchi'uc ch'ium vacaxetic ti lec jubenique.

⁵ Yalel muyel xa snuc' avu'unic li avamaic c'alal chajupanique; chac'an chanopic c'u x'elan chapasic ep sonetic jech chac c'u cha'al la spas li Davide.

⁶ Lec ta muc'tic vasoetic chavuch'ic li pasem ya'lel ts'usube; ta puru lequil muil poxiletic chamuibtas abaic noxtoc. Mu'yuc ta avo'ntonic c'u x'elan tsots svocol li jlumaltique.

⁷ Ja' yu'un vo'oxuc ba'yucbe chabatic yu'un li boch'o chucbil chbatic ta yan banamile, jech ta xlaj sc'oplal ti xnic no'ox q'uinetic avu'unique.

⁸ Li Muc'ul Dios, ja' li Cajvaltique, oy c'usi laj yal ta jamal ta sbi stuc. Li Muc'ul Dios ti tspas ta mantal scotol te ta vinajele, jech laj yal: “Chopol chquil li stoyobbail smomnich'nab Jacobe; chopol chquil li pasubmantaletic yu'une, ja' yu'un li lume ta xcac' ta sc'ob yajcontra xchi'uc scotol li c'usitic te oye”, xi.

⁹ Me oy to ta xcom lajuneb yajval jbej nae ta xcham scotolic.

¹⁰ Jun xa no'ox bats'i yuts' yalalic chtal sloq'uesbe sbec'talic te ta na. Jech tsjac'be li boch'o cuxul to chcome: “¿Me oy to yan achi'il cuxul?”, xut. “Mu'yuc”, xi chtac'ov. Jech chal ta ora noxtoc li uts'-alalile: “¡Ch'an xa chian, mu me xat'abbe sbi li Muc'ul Diose!”, xut.

¹¹ Yu'un li Muc'ul Diose yaloj xa mantal ti ta xich' yavnaijesel, ti ta xich' lilinel scotol li muc'tic naetic xchi'uc li bic'tal naetique.

¹² ¿Me xu' ch-anilajic ta ch'entic li ca'etique? ¿Me xu' tsloquic banamil ta ch'entic li vacaxetique? Pero ¿c'u yu'un laj ac'atajesic ta veneno li tuq'uil chapanele? ¿C'u yu'un laj ac'atajesic ta ch'ail vomol li c'usi tuc' ta pasele?

¹³ Yu'un altic no'ox ti xcuxet avo'ntonique xchi'uc ti jech chavalique: “Ta jtsatsal jtuctic ti lec xu' cu'untique”, xachiic.

¹⁴ Ja' yu'un israeletic, a'yo ava'yic c'usi chcal, vu'un li Muc'ul Diosun ti ta jpas ta mantal scotol te ta vinajele: “Ta xcac' ti chtal yuts'intaoxuc jun ta lum cristianoetique; te chlic yac'boxuc tal ta yochebal Hamat c'alal to ta bevo'tic Arabá”, xi li Muc'ul Diose.