Amós 5 - Bible in Tzotzil de Chenalhó with Deuterocanon

Iq'uel sutel tal ta stojol Dios

¹ Smomnich'nab Israel, a'yo ava'yic, li' ta xcal sq'ueojal oq'uel ta aventaic:

² Li Israel ti toj c'upil sba, ti toj lec to'ox jech chac c'u cha'al jun tojol tsebe iyal xa o ta lum, mu xa xu' tstots o. Stuc xa te telel ta yosilal; mu'yuc boch'o chtal toyunuc liquel.

³ Yu'un li Cajvaltic Diose jech chal ta sventa li israeletique: “Me oy chloc' batel ta paspleito jmil (1,000) viniquetic ta jun lume, vo'vinic (100) xa no'ox ta sut tal; me oy chloc' batel vo'vinique (100), lajuneb (10) xa no'ox ta sut tal”, xi.

⁴ Jech chal noxtoc li Muc'ul Diose: “La'ic me ta jtojol, jech chacuxiic.

⁵ Mu ja'uc te xabatic ta Betel; mu xbat ochanic te ta Gilgal, xchi'uc mu me xajelovic te ta Beerseba. Yu'un li Gilgale chucbil chbat ta yan banamil; li Betele ta xich' yavnaijesel o”, xi.

⁶ Ja' sa'ic li Muc'ul Diose, jech chacuxiic. Yu'un naca me stac tal c'oc' ta stojol li smomnich'nab Josee, jech xu' ta xc'aq'uic o; mu'yuc boch'o te ta Betel ti xu' tstu'p li c'oq'ue.

⁷ Toj abul abaic ti chac'atajesic ta tsots vocol li tuq'uil chapanele, xchi'uc ti ja' chajipic ta banamil li c'usitic tuc' ta pasele.

⁸ Ja' sa'ic li Boch'o spasoj Xonob c'analetique xchi'uc li Orión c'analetique, xchi'uc ti ja' xu' yu'un tsc'atajes ta sac osil li ic' osile, ti ja' xu' yu'un tsc'atajes ta ac'ubaltic li c'ac'altique, ti xu' yu'un chic' muyel li vo'etic ta nab sventa tsmal yalel tal li' ta banamile.

⁹ Ja' li Boch'o xu' yu'un tsjines jun lum ti lec tsotse, ti xu' yu'un tsjines li tsatsal coraltone, ja' li Muc'ul Dios sbie.

¹⁰ Toj abul abaic ti chopol chavilic li boch'o tsc'an ac'o oyuc tuq'uil chapanele, xchi'uc ti bats'i mu'yuc lec chavilic li boch'o chal c'usi tuq'ue.

¹¹ Ta sventa ti apech'ojic ta teq'uel li me'onetique xchi'uc ti chac'anic voc'bel li c'usi chloc' yu'unique, jech mu'yuc chanainic li anaic ti pasbil ta ton avu'unique, xchi'uc mu'yuc chavuch'beic ya'lel li ts'usubtic ats'unojique.

¹² Yu'un li vu'une jna'oj ti toj ep atoyobbailique, xchi'uc ti toj ep amulique. Jna'oj ti chavac'beic svocol li boch'o tuc' yo'ntone, ti achonoj abaic ta taq'uine, xchi'uc ti chamacbeic sbe ta stojol jchapanvanejetic li me'onetique.

¹³ Ja' yu'un li boch'o bije ac'o spajes sba, yu'un tsoc xa li banamile.

¹⁴ Mu me ja'uc xasa'ic li c'usi chopole; ja' xasa'ic li c'usitic leque, jech chacuxiic. Xchi'uc jech chc'ot ta pasel ti chavalic te oy ta atojolic li Muc'ul Dios ti tspas ta mantal scotol te ta vinajele.

¹⁵ ¡Contrainic li c'usitic chopole! ¡Ja' c'anic li c'usi leque! Tuc' me xachapanvanic. Oy yic'al jech xu' chlic to xc'uxubin scomelal smomnich'nab José li Muc'ul Dios ti tspas ta mantal scotol te ta vinajele.

¹⁶ Ja' yu'un jech chal li Cajvaltique, ja' li Muc'ul Dios ti tspas ta mantal scotol te ta vinajele: “Ta scotol ch'ivit ta to xlic oq'uel; ta scotol xoraltic oy avanel. Li boch'o ch-abtejic ta te'tique ta x'ic'atic tal yu'un ac'o oq'uicuc ta scoj vocol ec; li boch'o ja' yabtelic ch-oc' ch-avanic ta sventa animaetique ch-ic'atic yu'un ac'o tal oq'uicuc.

¹⁷ Jech noxtoc li boch'o te oyic ta ts'usubtique ta x'oq'uic ec ti c'alal ta sta yorail chtal cac'boxuc atoj amulique”, xi li Diose.

¹⁸ Ay, toj abul sbaic li boch'otic tsc'anic ac'o c'otuc sc'ac'alil li Muc'ul Diose. ¿C'u yu'un ti chac'anic ac'o c'otuc li sc'ac'alil le'e? Yu'un ja' sc'ac'alil ch-ic'ub osil, mu ja'uc yorail sac osil.

¹⁹ Ja' jech chac c'u cha'al boch'o chjatov ta anil yu'un león ti te tsnup ta be jcot osoe; xchi'uc ja' jech chac c'u cha'al boch'o ch-och ta yut sna ti tsquican sc'ob ta c'alnae, pero te chti'at tal ta chon noxtoc.

²⁰ Li sc'ac'alil Muc'ul Diose ja' sventa ch-ic'ub osil, mu ja'uc sventa sac osil; solel ch-ic'ub ta jyalel, me jutuc mu'yuc sac chcom.

²¹ “Toj chopol chquil, contra chquil li q'uinetic chapasique; mu'yuc xcuxet co'nton yu'un li muc'ta tsobajel chapasique.

²² Li chic'bil matanal chavac'bicune mu jc'an; li yantic matanal chavaq'uique mu'yuc ta jtsacboxuc. Mu jc'an jq'uel noxtoc li juben vacaxetic chavac'bicun jmotonin ta sventa co'ol co'ntontique.

²³ ¡Loq'uesic ta jtojol li epal q'ueoj xavochetic ta sq'uejintaele! ¡Mu xa jc'an xca'ay ti xnic no'ox sonetic avu'unique!

²⁴ Ja' ta jc'an jech chloc' ta atojolic c'usi tuc' jech chac c'u cha'al chloc' tsots vo'e, xchi'uc ja' ta jc'an jech chloc' jech chac c'u cha'al nio' li tuq'uil chapanel avu'unique.

²⁵ “Israeletic, muc ta sujeluc lavac'bicun milbil matanal xchi'uc yantic matanal ti c'alal te oyoxuc ta xocol banamil cha'vinic (40) jabile.

²⁶ Pero tana xcuchet avu'unic li Moloc, ja' li banquilal dios avu'unique, xchi'uc li Quiún, ja' li dios yu'un c'analetic ti apasojan atuquique.

²⁷ Ja' yu'un ta jnutsoxuc batel ta sjelovel to Damasco”, xi li Muc'ul Diose, ja' li Dios ti tspas ta mantal scotol te ta vinajel, xi sbie.