Amós 4 - Bible in Tzotzil de Chenalhó with Deuterocanon

¹ A'yo ava'yic antsetic, vo'oxuc ti te nacaloxuc ta Samariae, ti ja' jechoxuc jech chac c'u cha'al juben me' vacaxetic ta Basane, ti chavuts'intaic li me'onetique, ti chavac'beic svocol li boch'otic abul sbaique, ti jech chavalbeic mantal li amalalique: “Ich'o tal pasem ya'lel ts'usub cuch'tic”, ti xavutique.

² Li Muc'ul Dios, ja' li Cajvaltique jamal chal ta sventa xch'ul lequil: “Ta to sta sc'ac'alil nitbil chabatic ta xotxot taq'uin; li avalabique nitbil chbatic ta lucluc taq'uin sventa snitubil choy.

³ Te chavich'ic loq'uesel batel ti bu ch'acanbil li coraltone, yu'un chavich'ic nutsel batel ta vits Hermón”, xi li Muc'ul Diose.

Ac'o me tstoj smul li Israele, pero mu ono'ox xtuq'uib

⁴ “Batanic ta Betel, bat sa'o amulic. Epajesic li atoyobbailic te ta Gilgale. Ich'ic batel li milbil matanal avu'unic ta jujun sobe; ich'ic batel ta ox-ox c'ac'al li jun ta lajuneb c'usitic chloc' avu'unique.

⁵ Aq'uic milbil matanal ta sventa li c'usi chatojic ta vocole; aq'uic li pan ti yich'oj svolesubil xch'ute. Alic batel, ja'uc xa ava'yejic ti chavaq'uic li matanal ta yutsil avo'ntonique, yu'un ja' jech oy ta avo'nton chatoy abaic”, xi li Muc'ul Diose.

⁶ “Li vu'une laj cac' taquilevtajuc aveic ta scotol lumetic avu'unic; laj cac' ti ac'o mu'yucuc ave'elic ta scotol ti butic nacaloxuque, pero muc ono'ox xasutic o tal ta jtojol”, xi li Muc'ul Diose.

⁷ “Jech noxtoc oxib xa'ox u la jmac li vo' ti c'alal la sta yorail iyijub atrigoique. Yaloj no'ox sba bu lumal laj cac' batel li vo'e. Oy bu lumal laj cac' batel vo', oy bu lumal ti mu'yuc laj cac' batele. Svoc'olvoc'ol no'ox oy bu lec laj yac' vo', oy bu mu'yuc laj yac' o vo', jech itaquij o.

⁸ Jech li cristianoetique ibatic ta jujun lum ta sa'el vo' yuch'ic, pero muc staic ti c'u yepal ch-ech' o taqui-o'nal yu'unique. Li vo'oxuque mu'yuc ono'ox xasutic o tal ta jtojol”, xi li Muc'ul Diose.

⁹ “Jech noxtoc laj cac' tsots avocolic ta scoj muc'ta q'uixin ic' ital ta sloq'ueb c'ac'al, xchi'uc ta scoj ti ital xchanul li c'usitic ats'unojique. Jech ilaj ta c'ulubetic scotol li ts'unubaltic avu'unique, ja' li ts'usubtique, li higotique, li olivatique. Pero muc ono'ox xasutic o tal ta jtojol”, xi li Muc'ul Diose.

¹⁰ “La jtacboxuc tal tsatsal chamel ta atojolic jech chac c'u cha'al la jpas ta stojol li Egiptoe. Laj cac' chamuc ta pleito li queremetic avu'unique, xchi'uc laj cac' batel ta pojel li ca'etic avu'unique. Laj cac' ava'ibeic stuil te ta acarpanaic li boch'otic chamen avu'unique; laj cac' ochuc batel c'alal to ta yut avo'ntonic li stuile, pero muc ono'ox xasutic o tal ta jtojol”, xi li Muc'ul Diose.

¹¹ “Laj cac'boxuc tsots vocol jech chac c'u cha'al la jpasbe li lum Sodoma xchi'uc Gomorrae. Ja' xa jech lacomic jech chac c'u cha'al xupetc'oc' ti loq'uesbil ta c'oq'ue, pero muc ono'ox xasutic o tal ta jtojol”, xi li Muc'ul Diose.

¹² “Ja' yu'un Israel, ja' jech ta jpasbot o, yu'un jech jnopoj o. Chapano me aba sventa chtal ava'an aba li' ta jtojole”, xi li Diose.

¹³ Yu'un li Boch'o la sva'an li vitsetic xchi'uc ti laj yac' li iq'ue, xchi'uc ti chac'be sna' cristianoetic li c'usi snopoj ta sjol ta yo'ntone, ti xu' yu'un ta sc'atajes ta ic' osil li sac osile, ti oy ta sc'ob scotol li c'usitic oy ta banamile, ja' Muc'ul Dios sbi ti tspas ta mantal scotol te ta vinajele.