Amós 3 - Bible in Tzotzil de Chenalhó with Deuterocanon

Mu'yuc c'usi tspas Dios me mu'yuc tsc'opan li j'alc'opetic yu'une

¹ Smomnich'nab Israel, a'yo ava'yic c'u x'elan chc'opoj ta atojolic li Muc'ul Diose, vo'oxuc ti la sloq'uesoxuc tal ta Egiptoe:

² “Vo'oxuc no'ox atuquic la jt'ujoxuc ta scotol li yantic lum ta banamile. Ja' yu'un persa ta jchapanoxuc ta sventa li c'usitic chopol apasojique”, xi.

³ Me oy chib co'ol ta xchi'in sbaic ta xanubale, yu'un lec chil sbaic.

⁴ Me xlaquet ta toyolal te'tic li leone, yu'un oy c'usi stsacoj; me xlaquet ta xch'en li ch'ium leone, yu'un stsacoj sve'el.

⁵ Me oy ch-och ta yoquil jcot mute, yu'un oy boch'o la syac; me oy bu cht'il yoquile, yu'un oy c'usi la stsac.

⁶ Me oy chlic xchapan sbaic cristianoetic ta lume, yu'un ijupanat oq'ues sventa pleito; me oy chtal vocol ta lume, yu'un jech laj cal mantal vu'un li Muc'ul Diosune.

⁷ Vu'un li Muc'ul Diosune, mu'yuc c'usi ta jpas ti me mu xcac'be sna' ba'yuc c'usi oy ta co'nton li j'alc'opetic cu'une.

⁸ Me oy xlaquet jcot leone, toj xi'bal sba cha'yic. Me chic'opoj vu'un li Muc'ul Diosune, persa chalic li j'alc'opetique.

Ta xich' jinesel Samaria

⁹ Puquic batel mantal ta pasubmantaletic ta Asdod xchi'uc ta pasubmantaletic ta Egipto, jech xavalic: “La' tsobo abaic ta vitsetic ta Samaria. La' q'uelo avilic c'u x'elan li uts'intael tee; la' labano avilic li ilbajinel tspasbe sbaique”, chianic.

¹⁰ Jech chal li Muc'ul Diose: “Mu sna'ic spasel c'usi tuc'; te tsnaq'uic ta pasubmantaletic yu'unic li c'usitic tspojic c'alal ch-uts'intavanique”, xi.

¹¹ Ja' yu'un, ja' jech chal li Muc'ul Diose, ja' li Cajvaltique: “Ta xtal avajcontra, ta xtal setuic li avosilale; ta sjinesic li tsatsal coralton avu'une, xchi'uc ta xich'ic batel li c'usitic oy avu'un te ta apasubmantale”, xi.

¹² Jech chal noxtoc li Muc'ul Diose: “Jech chac c'u cha'al jun jchabichij ti oy to bu xu' yu'un tspojbe ta ye león chibuc yacan, o me jutebuc sni' xchiquin li xchije, ja' jech oy to chcolic loq'uel li israeletic te nacalic ta Samariae, jech chac c'u cha'al jutuc xa no'ox spac'benal, jutuc xa no'ox ste'eltac chcom c'alal chc'ac' jbej nae”, xi.

¹³ Li Muc'ul Dios ti tspas ta mantal scotol te ta vinajele, jech chal: “Bijubtasic me, albeic me ya'ay ti chcontrainatic li smomnich'nabtac Jacobe.

¹⁴ C'alal tsta sc'ac'alil ta xcac'be stoj li stoyobbail Israele, ta jines noxtoc li scajleb matanal te ta Betele; ta jc'asbe yalel ta banamil li xulubtac scajleb matanale.

¹⁵ Ta jlilin scotol li muc'tic naetic xchi'uc scotol li bic'tal naetique, xchi'uc li lequil naetic ti t'ujumtasbilic ta sts'uts'up tsemene. Jech scotol naetic yavnaijem chcom o”, xi li Muc'ul Diose.