Amós 2 - Bible in Tzotzil de Chenalhó with Deuterocanon

¹ Jech chal noxtoc li Muc'ul Diose: “Ta sventa ti solel i'ech' ta bis smul li Moabe, jech persa ta xcac'be stoj, yu'un la xchic'be sbaquiltac li ajvalil ta Edome; solel tan icom yu'un.

² Ja' yu'un ta xcac'be sc'ac'al li Moabe; ta xc'ac' o li pasubmantaletic ta Queriote. Li Moabe ta xcham ta yorail tsots pleito, ta yorail avanel, xchi'uc c'alal chich' jupanel oq'uesetic.

³ Ta jip loq'uel li ajvalil yu'une, co'ol ta jmil xchi'uc yaj'abteltac”, xi li Muc'ul Diose.

⁴ Jech chal noxtoc li Muc'ul Diose: “Ta sventa ti solel i'ech' ta bis smul li Judae, jech persa ta xcac'be stoj. Yu'un mu'yuc stu laj yilic li mantaletic cu'une; muc xch'unic li c'usitic caloje. La syanijesic ta scoj ti ja' laj yich'ic ta muc' li c'usitic cuybil ta diose; ja' la xchanic ec jech chac c'u cha'al la spasic li smoltot syame'ic ta vo'onee.

⁵ Ja' yu'un ta xcac'be sc'ac'al li Judae, jech ta xc'ac' o li pasubmantaletic ta Jerusalene”, xi li Diose.

Chapanel ta sventa Israel

⁶ Jech chal noxtoc li Muc'ul Diose: “Ta sventa ti solel i'ech' ta bis smul li Israele, jech persa ta xcac'be stoj, yu'un la xchonic ta taq'uin li boch'o tuc' yo'ntonique; ta xonobil no'ox la sjelic li me'onetique.

⁷ Solel la xpech'ic ta teq'uel ta pucuctic li boch'otic mu'yuc stu ch-ilatique; mu'yuc tuc' la xchapanic li boch'o abul sbaique. Li querem xchi'uc stote la scoman chi'inic ta vayel li jun tsebe; ja' jech la soquesbicun o jc'oplal.

⁸ Ja' la sq'ui svayabinic ta sts'el scajleb smoton sdiosic ta buyuc no'ox li c'u'il la spojic ta sventa prentaile. Li multa la sc'anic ta jech no'oxe ja' la smanic o pasem ya'lel ts'usub; te laj yuch'ic ta snail diosetic yu'unic.

⁹ Ac'o me vu'un la jtsalboxuc li amorretic ta vo'one, ti toj natic jech chac c'u cha'al stayalil ch'ut te'etique, ti toj tsotsic jech chac c'u cha'al tsatsal tulanetique; la jlilinbe yalel li sat ta toyole xchi'uc li yibel ta yut banamile.

¹⁰ Vu'un la jloq'uesoxuc tal ta Egipto banamil noxtoc. Vu'un la jbeiltasoxuc tal ta xocol banamil cha'vinic (40) jabil, yu'un jech ac'o avich'beic li yosil amorretique.

¹¹ Jech noxtoc laj cac' ochuc ta j'alc'op li anich'nabique, xchi'uc laj cac' ochuc ta nazareo, noxtoc li aqueremetique. ¿Me mu jechuc la jpas ta atojolic, israeletic?”, xi li Muc'ul Diose.

¹² “Pero vo'oxuc laj asujic ta yuch'el pasem ya'lel ts'usub li boch'o voc'bilic o cu'une, xchi'uc laj apajesic ta yalel c'usitic chc'ot ta pasel li j'alc'opetique.

¹³ Ja' yu'un a'yo ava'yic, vu'un ta jnet'uoxuc ta banamil jech chac c'u cha'al ta xnet'van careta ti c'alal noj ta trigoe.

¹⁴ Li boch'o toj tsots x'anilaje mu xu' yu'un ta xjatov; li boch'o toj ech'em slomoe mu xu' yu'un ta spoj sba ta sventa ti tsots slomoe; li boch'o lec tsatsal vinique mu xu' yu'un ta scolta sba ti jech mu xchame.

¹⁵ Li j'ac'flechae mu xu' yu'un ta spoj sba; li boch'o toj lec sabaj yacan ta anile mu xu' yu'un tsnac' sba ta anil, xchi'uc mu xu' yu'un ta scolta sba li boch'o cajal ta ca'e.

¹⁶ C'alal me la sta sc'ac'alil le'e, t'anal ta xjatov batel li boch'o ven tsots yo'ntonic ta paspleitoe”, xi li Muc'ul Diose.