Amós 1 - Bible in Tzotzil de Chenalhó with Deuterocanon

Tstoj smul lum Israel xchi'uc lumetic te ta spat xocon

¹ C'alal ja'o ochem ta ajvalilal ta Judá li Uziase, xchi'uc c'alal ja'o ochem ta ajvalilal ta Israel li Jeroboam xnich'on Joase, oy jun jchabichij ta Tecoa, Amós sbi. Ja' laj yal c'usi i'ac'bat yil yu'un Dios chc'ot ta pasel ta Israel banamil ti c'alal chib to'ox jabil sc'an xtal niquele.

² Jech laj yal: Li Muc'ul Diose tsots chlic avanuc tal ta Sión; tsots chc'opoj tal ta Jerusalén. Ta xlic taquijanuc li jobeltic ta sve'ub xchij jchabichijetique, xchi'uc ta xtaquij noxtoc li jol vits Carmeloe.

³ Jech chal li Muc'ul Diose: “Ta sventa ti solel i'ech' ta bis smul li Damascoe, jech persa ta xcac'be stoj, yu'un la xvoch'ilanic o li Galaade.

⁴ Ja' yu'un ta xcac'be sc'ac'al li sna Hazaele; jech ta xc'ac' o spasubmantaltac li Ben-adade.

⁵ Ta jc'asbe li sbajubiltac ti'coralton yu'un Damascoe. Ta xcules li ajvalil te ta Damasco, ja' li spasubil c'usi chopole; ta xcules li boch'o tspas mantal te ta Damascoe ja' li snail sc'upinel muliletique. Jech noxtoc li Siriae ta xcac' chucaticuc batel ta Kir”, xi li Muc'ul Diose.

⁶ Jech chal noxtoc li Muc'ul Diose: “Ta sventa ti solel i'ech' ta bis smul li lum Gazae, jech persa ta xcac'be stoj, yu'un la xchuquic batel jun ta lum cristianoetic, ay xchonic comel ta Edom.

⁷ Ja' yu'un ta xcac'be sc'ac'al li coralton ta Gazae, jech ta xc'ac' o li spasubmantaltac ajvalile.

⁸ Ta xcules li ajvalil ta Asdode; ta xcules noxtoc li boch'o tspas mantal ta Ascalone. Ta jyales jc'ob ta stojol li Ecrone; c'alal ta scomelal filistaetic ta xcules o”, xi li Cajvaltique, ja' li Muc'ul Diose.

⁹ Jech chal noxtoc li Muc'ul Diose: “Ta sventa ti solel i'ech' ta bis smul li lum Tiroe, jech persa ta xcac'be stoj, yu'un la xchuquic batel ta Edom jun ta lum cristianoetic; mu tsotsuc sc'oplal laj ya'ay li c'usi chapanbil yu'un xchi'iltaquique.

¹⁰ Ja' yu'un ta xcac'be sc'ac'al li coralton yu'un lum Tiroe, jech ta xc'ac' o li spasubmantaltac ajvalile”, xi li Diose.

¹¹ Jech chal noxtoc li Muc'ul Diose: “Ta sventa ti solel i'ech' ta bis smul li Edome, jech persa ta xcac'be stoj, yu'un la snuts batel ta espada li yuts' yalaltaque, ja' li israeletique. Solel mu'yuc abul sba laj yil; solel tsots ch-ilin o ta stojol; scotol c'ac'al contra chil o.

¹² Ja' yu'un ta xcac'be sc'ac'al li Temane, jech ta xc'ac' o li pasubmantaletic ta lum Bosrae”, xi li Diose.

¹³ Jech chal noxtoc li Muc'ul Diose: “Ta sventa ti solel i'ech' ta bis smul li Amone, jech persa ta xcac'be stoj; ta sventa ti tsc'an tsmuq'uibtas li yosilale, jech la sjatbe xch'ut li antsetic te ta Galaad ti oy xch'utique.

¹⁴ Ja' yu'un ta xcac'be sc'ac'al li coralton ta Rabae, jech ta xc'ac' o li spasubmantaltac ajvalile. Solel viquil ch'avalic ta jyalel ti c'alal chtal yorail pleitoe; li pleitoe xvo'et no'ox jech chac c'u cha'al chtal tsatsal ic'al vo'.

¹⁵ Li ajvalil xchi'uc scotol li jpasmantaletic yu'une ta xich'ic chuquel batel ta yan banamil”, xi li Muc'ul Diose.