2 Samuel 9 - Bible in Tzotzil de Chenalhó with Deuterocanon

La xc'uxubin Mefi-boset li Davide

¹ Li Davide jech laj yal: “¿Me oy to boch'o comen yu'un Saúl ti xu' ta jc'uxubin ta sventa ti ep la xc'uxubinun ec li Jonatane?”, xi.

² Oy jun smozoic icom li Saule, Siba sbi. Laj yalbeic ti ac'o batuc ta stojol li Davide. Li Davide jech laj yalbe: —¿Me vo'ot li Sibaote? —xut. —Vu'un —xi itac'ov.

³ Li ajvalile jech la sjac'be: —¿Me oy to boch'o comen yu'un li Saule? yu'un oy c'usi ta jc'an ta jpasbe ta sventa li Diose —xut. Itac'ov li Sibae: —Oy to jun xnich'on li Jonatán ti soquem xchibal yacane —xi.

⁴ —¿Bu oy? —xi li Davide. —Te oy ta Lodebar ta sna Maquir xnich'on Amiel —xi.

⁵ Li Davide laj yal mantal ti ac'o bat yiq'uic tale.

⁶ C'alal ic'ot ta stojol David li Mefi-boset xnich'on Jonatane, ja' li smomnich'on Saule, la snijan sba ta stojol li Davide yu'un chich' ta muc'. Li Davide jech laj yalbe: —Mefi-boset —xut. —¿C'usi chaval?, ajvalil —xi.

⁷ Li Davide jech laj yalbe: —Mu xaxi'. Vu'un ta jc'uxubinot ta sventa ti toj lec la sc'anun li atot Jonatane. Ta jsutesbot scotol li yosil amoltot Saule. Xchi'uc scotol c'ac'al ta jchi'in jbatic ta ve'el ta jmexa —xut.

⁸ Li Mefi-bosete la snijan sba, jech laj yal: —¿C'u x'elan laj ana'un, vu'un ti xico'laj xchi'uc jcot chamen ts'i'e? —xut.

⁹ Li Davide laj yic' li Sibae, ja' li smozo Saúl ta vo'onee, jech laj yalbe: —Laj xa cac'be ta sc'ob smomnich'on anima avajval scotol li c'usitic oy to'ox yu'un xchi'uc xnich'nabtaque.

¹⁰ Ja' yu'un li vo'ot achi'uc anich'nab xchi'uc amozotaque, locbeic li yosile; jmoj xatsobic scotol li c'usi chloq'ue yu'un jech oy c'usi tsve' li xnich'on avajvale, ac'o me li' chve' ta jmexa li Mefi-bosete —xut. Li Sibae oy vo'lajuneb (15) xnich'nab xchi'uc jtob (20) smozotac.

¹¹ Itac'ov li Sibae: —Scotol li c'usi laj avalbune, ajvalil, ta jpas —xi. Li Mefi-bosete te ono'ox ive' o ta xmexa li ajvalile. Co'ol jech chac c'u cha'al xnich'on ajvalil ic'ot.

¹² Li Mefi-bosete oy jun biq'uit squerem, Micaía sbi. Scotol li boch'otic oy yu'un Sibae ja' svinictac Mefi-boset ic'otic o.

¹³ Li Mefi-bosete te inaqui o ta Jerusalén, yu'un scotol c'ac'al te chve' o ta sna li ajvalile. Ja' coxo vinic; xchibal yacan mu xu' chanov.