2 Samuel 8 - Bible in Tzotzil de Chenalhó with Deuterocanon

Li Davide laj to spoj batel ep lumetic

¹ Ts'acal to lic stsal filistaetic noxtoc li Davide; j'ech'el la spojbe o li Meteg-amae.

² Jech noxtoc la stsal li moabetique, lic sbisan ta jich'il ch'ojon. Laj yalbe ti ac'o slaman sbaic ta lumtic scotolique. Oy la sbis batel chib ch'ojon. Oy jun ch'ojon no'ox la sbis batel. Li boch'o icomic ta yut li chib ch'ojone ja' laj yich'ic milel. Li boch'otic icomic ta yut li jun ch'ojone ja' cuxul icomic. Ja' jech icomic o ta sc'ob David li moabetique; te la stoj spatanic.

³ Jech noxtoc li Davide la stsal li Hadad-ezere, ja' li ajvalil ta Soba, xnich'on Rehobe. Ja'o bat stsal ti c'alal ta ox xbat sventain li osil te ta uc'um Eufratese.

⁴ Li Davide la xchuc jmil xchi'uc vucub ciento (1,700) soldadoetic cajajtic ta ca', xchi'uc jtob ta mil (20,000) chanov ta yacanic. Jech noxtoc la sc'asbeic yacan scotol li ca'etic ti tsnit li caretaetic sventa pleitoe. Ja' xa no'ox jech yepal ca'etic muc sc'asbeic jech chac c'u cha'al yepal tsc'an sventa vo'vinic (100) caretaetique.

⁵ Pero te italic li siriaetic ti iliquic tal ta Damascoe, yu'un ja' tal scoltaic li Hadad-ezer, ajvalil ta Sobae. Pero li Davide la stsal noxtoc. La smil chib xcha'vinic ta mil (22,000) li siriaetique.

⁶ Li Davide lic yac'an soldadoetic noxtoc ta Siria banamil, ja' ti bu oy li lum Damascoe. Li siriaetique icomic o ta sc'ob li Davide; te lic stoj spatanic. Buyuc no'ox ibat li Davide i'ac'bat stsal yajcontra yu'un li Muc'ul Diose.

⁷ Li Davide laj yich' noxtoc li smacubbailic pasbil ta c'anal taq'uin ti tstunesic li j'abteletic yu'un Hadad-ezere; te laj yich' batel ta Jerusalén.

⁸ Jech noxtoc bats'i ep bronce taq'uin laj yich'be li Beta xchi'uc Berotaie, ja' li lumetic ti sventainoj li Hadad-ezere.

⁹ C'alal laj ya'ay ajvalil Toi ta Hamat ti la stsalbe xa scotol yajsoldadotac Hadad-ezer li Davide,

¹⁰ la stac tal xnich'on ta stojol li Davide; Joram sbi. Yich'oj tal saquil taq'uinetic, c'anal taq'uinetic, xchi'uc bronce, yu'un tal sc'opanic li Davide, tal spatbeic yo'nton ta sventa ti la stsal li Hadad-ezere. Yu'un li ajvalil Toie laj ono'ox spasic pleito xchi'uc ec.

¹¹ Li Davide laj yac' ta stojol Muc'ul Dios scotol li c'usi i'ac'bate; te capal laj yac' xchi'uc li c'anal taq'uin, saquil taq'uin ti svoc'oj xa'ox sventa Dios ti laj yich'be li lumetic bu la spoje.

¹² Ja' li siriaetique, li moabetique, li amonetique, li filistaetique, xchi'uc li amalequetique, xchi'uc li lumetic la spoj c'alal la spasic pleito xchi'uc li Hadad-ezer ajvalil ta Sobae, ja' li xnich'on Rehobe.

¹³ Li Davide ipuc lec sc'oplal. C'alal isut tal ta stsalel li siriaetique, te ech' smil noxtoc vaxaclajunmil (18,000) edometic ta Stenlejaltic yu'un Ats'am.

¹⁴ Ts'acal lic yac'an soldadoetic ta scotol Edom, jech icom o ta sc'ob scotol li edometique. Li Davide i'ac'bat spas canal yu'un Muc'ul Dios ti buyuc no'ox ibate.

Sc'oplal j'abteletic yu'un David

¹⁵ Li Davide ja' lic sventain scotol li israeletique. Lec tuc' ichapanvan; lec ibat scotol yabtel ta stojol li israeletique.

¹⁶ Li banquilal yu'un yajsoldadotaque, ja' li Joab yol Sarviae xchi'uc li Josafat xnich'on Ahilude, ja' to'ox tsts'iba scotol li c'usi chc'ot ta pasele.

¹⁷ Li Sadoc xnich'on Ahitob, xchi'uc Ahimelec xnich'on Abiatare ja' paleetic. Li Seraiase ja' jts'ibajom.

¹⁸ Li Benaía xnich'on Joiadae ja' tspas ta mantal li ceretetic xchi'uc peletetique. Li xnich'nabtac Davide ja' banquilaletic.