2 Samuel 7 - Bible in Tzotzil de Chenalhó with Deuterocanon

Li Diose laj yalbe ti chac'be bendición li Davide

¹ C'alal nacal xa'ox ta spasubmantal li ajvalil Davide, xchi'uc c'alal i'ac'bat xa'ox xcux yu'un Muc'ul Dios ta stsalel li yajcontra ta spat xocone,

² jech lic yalbe li j'alc'op Natane: —Q'uelavil, li vu'une nacalun xa ta jpasubmantal ti pasbil lec ta ch'ut te'e. Pero li xcaxail smantal Diose ja' no'ox macbil ta jlic poc' —xut.

³ Itac'ov li Natane: —Pero xu' chapas li c'usi lec anopoje yu'un li Muc'ul Diose te xchi'inojot —xut.

⁴ Te no'ox ta yac'ubalil ital c'opanatuc yu'un Muc'ul Dios li Natane, jech i'albat:

⁵ “Batan, jech xbat avalbe li cajtunel Davide: ‘Jech chayalbot li Muc'ul Diose: Muc vo'cot oy ta aventa chapasbun jna ti bu xu' chinaquie.

⁶ Yu'un c'alal la jloq'uesic tal ta Egipto li achi'iltac ta israelale, mu'yuc ono'ox bu xinaqui ta ch'ulna c'alal to tana. Ta unin carpanaetic no'ox linaqui batel buyuc no'ox lixanov.

⁷ Ti jayib c'ac'al la jchi'inic tal ta xanubale, mu'yuc boch'o laj calbe ti ac'o spasbicun jun ch'ulna ta ch'ut te'e. Mu'yuc laj calbe me junuc li banquilal yu'un jaychop israeletic ti cac'ojbe yabtel tsventainic achi'iltaquique’, xi.

⁸ Ja' yu'un jech chayalbot li Muc'ul Dios ti tspas ta mantal scotol ta vinajele: ‘Vu'un laj quic'ot loq'uel tal ta scoralil achij, xchi'uc ti c'alal te chaxanov ta spat achijtaque, yu'un vo'ot chacom ta banquilal yu'un scotol li jteclumale.

⁹ La jchi'inot ti buyuc no'ox labate; la jtsalbot scotol li avajcontra c'alal la scontrainicote, xchi'uc laj cac' pucuc lec ac'oplal jech chac c'u cha'al li boch'otic ven tsots yabtelic li' ta banamile.

¹⁰ Jech noxtoc la jchapanbe lec jun yavil stuquic li jteclum cu'une. Jech te laj quiq'uic jelovel yu'un ac'o naquiicuc ta yosil stuquic. Jech mu xa xich'ic uts'intael; mu xa x'ac'bat svocolic yu'un li chopol cristianoetic jech chac c'u cha'al ta sliqueb

¹¹ ti c'alal lic jt'ujbe jchapanvanejetic yu'unique. Jech ec li vo'ote laj cac' colan ta sventa scotol li avajcontrae. Jech noxtoc chcac' ana' ti chacac'bot amomnich'nabtaque.

¹² Jech c'alal tsta yorail chacham chbat achi'in atot ame'e, vu'un ta xlic jva'an junuc anich'on; ta jtic' ta ajvalilal.

¹³ Ja' chlic spasbun jbej ch'ulna cu'un. Mu xcac' lajuc o sc'oplal li yabtel ta ajvalilale.

¹⁴ Vu'un stotun chic'ot; ja' jnich'on ta xc'ot ec. Pero me chlic spas c'usi chopole, vu'un ta xcac'be stoj, ta xcac'be nucul jech chac c'u cha'al tspasbe xnich'nab li totiletique.

¹⁵ Pero mu'yuc ta jcomtsan o jech chac c'u cha'al la jcomtsan li Saule, ti la jloq'ues o ta yabtel sventa ja' la jtic'ot ta xq'uexole.

¹⁶ Li amomnich'nabtaque xchi'uc ti bu c'alal aventainoje j'ech'el jech chcom o. Xchi'uc li avabtel ta ajvalilale te chcom o ta atojolic’, xi li Diose, uto li Davide”, x'utat yu'un Muc'ul Dios li Natane.

¹⁷ Ti c'u x'elan i'albat ya'ay, i'ac'bat yil li Natane, lec xquechet laj yalbe scotol li Davide.

¹⁸ Li ajvalil Davide i'och batel, bat sc'opan li Muc'ul Diose, jech laj yalbe: “Cajval Dios, ¿c'usi xa'ox jvu'el? ¿C'usi xa'ox svu'el li cuts' calaltac ti laj avic'uncutic tal li' to c'alale?

¹⁹ Pero mu'yuc to muc' chava'ay li c'usi apasojbune, ja' yu'un laj avalbun noxtoc ti ta to xtal jmomnich'nabtac, vu'un li avajtunelune. Cajval, Muc'ul Dios, me junuc vinic mu'yuc boch'o yan jech tspas jech chac c'u cha'al li vo'ote.

²⁰ Mu'yuc xa c'usi yan chacalbot, yu'un vo'ot li Muc'ul Diosote, xavotquin li avajtunele.

²¹ Scotol li c'usitic tsotsic laj apas ta sventa ti yu'un jech avaloj, xchi'uc ti jech la sc'an avo'ntone ja' sventa chavac'bun lec quil avabtel, vu'un li avajtunelune.

²² Ja' yu'un toj ech'em amuc'ul Muc'ul Dios cu'un. Mu'yuc boch'o yan jech chac c'u cha'al vo'ot. Mu'yuc yan Dios jech chac c'u cha'al ca'yojcutic ono'ox ta jchiquincutique.

²³ Li israeletic, ja' li jteclum avu'une, ja' no'ox stuc jech jun muc'ta lum li' ta banamil. Vo'ot laj acolta, jech ja' ateclumal ic'otic o. Vo'ot laj avac' pucuc batel sc'oplalic, yu'un ep laj avac' ta ilel amuc'ul atsatsal ta stojolic. Ta sventa ti lec ac'anoj li jteclum avu'une, jech laj acolta loq'uel tal ta Egipto, xchi'uc ta stojol yantic lumetic, xchi'uc ta stojol diosetic yu'unic li yantic lumetique.

²⁴ Yu'un j'ech'el laj aval ti ja' ateclumal chcom o li israeletique, xchi'uc ti vo'ot Muc'ul Diosot yu'unic oe.

²⁵ “Ja' yu'un Muc'ul Dios, j'ech'el me jech c'otuc o li c'usi laj avalbun, vu'un li avajtunelune, xchi'uc c'usi laj aval ta sventa li jmomnich'nabtaque. Ac'o me c'otuc o ta pasel li c'usi laj avale.

²⁶ J'ech'el ac'o ich'biluc o ta muc' li abie, xchi'uc jech ac'o yich' alel o: ‘Li Muc'ul Dios ti tspas ta mantal scotole ja' Dios yu'un israeletic’, ac'o xiicuc. Xchi'uc j'ech'el ac'o comicuc o ta atojol jmomnich'nabtac, vu'un li avajtunelune.

²⁷ Muc'ul Dios, vo'ot ti chapas ta mantal scotole, laj xa avalbun ti chat'ujbun o li jmomnich'nabe. Ja' yu'un ta jc'anbot vocol ti jech ac'o apasbun o, vu'un li avajtunelune.

²⁸ Vo'ote Muc'ul Dios, vo'ot Diosot ta melel. Li c'usi laj avale ja' melel o. Laj xa aval ti chac'uxubinun, vu'un li avajtunelune.

²⁹ Ja' yu'un li' ta orae ta jc'an ac'o avac'be bendición li jmomnich'nabtaque, yu'un jech j'ech'el te ac'o comicuc o ta atojol. Muc'ul Dios, vo'ote laj aval ti ta sventa abendición j'ech'el lec chbat jmomnich'nabtac, vu'un li avajtunelune”, xut.