2 Samuel 6 - Bible in Tzotzil de Chenalhó with Deuterocanon

Li Davide ta ox xich' batel ta Jerusalén li xcaxail smantal Diose

¹ Li Davide la stsob yan velta scotol li soldadoetic t'ujbilic loq'uel ta stojol israeletique, ja' li lajuneb xcha'vinic ta mile (30,000).

² Ibatic ta lum Baala te ta Judá xchi'uc scotol li xchi'iltaque, yu'un bat yich'ic jelovel tal li xcaxail smantal Dios yo' bu chich' c'opanel Muc'ul Dios te ta o'lol li chib sloc'obal querubinetique.,

^3-4 Te la scajanic tal ta sba ach' careta; laj yich'ic loq'uel tal ta sna li Abinadab te nacal ta unin jol vitse. Li Uza xchi'uc Ahío, ja' li xnich'nab Abinadabe, ja' la sbeiltasic batel li ach' caretae. Li Ahioe ja' ba'yucbe batel yu'un li xcaxail smantal Diose.

⁵ Li David xchi'uc scotol israeletique te chq'uejinic, ch-ac'otajic batel ta stojol Muc'ul Dios ta arpa, ta sepsep taq'uinetic, ta ama, xchi'uc ta yantic sonetic.

⁶ C'alal ic'otic ta yav smajubil strigo Nacone, li Uzae laj yico jutuc ta sc'ob li xcaxail smantal Diose, yu'un ta xa sts'ebuj yu'unic li vacaxetique.

⁷ Pero li Muc'ul Diose i'ilin ta stojol Uza ta sventa ti jech la spase, jech te no'ox la smil ta ora ta sts'el li xcaxail smantal Diose.

⁸ Li Davide tsots i'ilin ti c'alal imilat yu'un Muc'ul Dios li Uzae. Ja' yu'un Pérez-uza ic'ot sbi li banamile; ja' jech sbi o c'alal to tana.

⁹ Li jun c'ac'al le'e ep ixi' yu'un Muc'ul Dios li Davide, jech laj yal: “C'uxi jech ic'ot ti vu'un la jventainbe li xcaxail smantal Muc'ul Diose”, xi.

¹⁰ Jech muc xa sc'an xich' batel ta Lum yu'un David li xcaxail smantal Diose; laj yal mantal ti te ac'o yich'ic batel ta sna jun vinic Obed-edom ta lum Gate.

¹¹ Oxib u te icom ta sna Obed-edom li xcaxail smantal Muc'ul Diose. Li Muc'ul Diose laj yac'be ep bendición xchi'uc yalab xnich'nab li vinique.

Li Davide laj ono'ox yich' jelovel ta Jerusalén li xcaxail smantal Diose

¹² Li Davide jech i'albat: “Li Obed-edome i'ac'bat ep bendición yu'un Muc'ul Dios sjunulic ta na xchi'uc scotol c'usitic oy yu'un ta sventa ti te icom ta sna li xcaxail smantal Diose”, x'utat. C'alal laj ya'ay li Davide, xcuxet no'ox yo'nton laj yich' jelovel te ta Lum yu'un David li xcaxail smantal Diose.

¹³ C'alal itotsic xa'ox batel vacjet ta acanil xchi'uquic li xcaxail smantal Muc'ul Diose, li Davide lic smil jcot tot vacax xchi'uc jcot juben tot chij sventa smoton Dios.

¹⁴ Li Davide scotol yo'nton i'ac'otaj ta stojol Muc'ul Dios; te slapoj jlic comcom c'u'il pasbil ta lino.

¹⁵ Xcuxet no'ox yo'nton xchi'uc scotol li israeletic ti te yich'ojic batel li caxae. X'avetic xtutetute no'ox batel yoq'uesic.

¹⁶ C'alal ic'ot ta Lum yu'un David li caxae, li Mical stseb Saule la sq'uel batel ta ventana. C'alal laj yil ti te xbitbun ch-ac'otaj tal ta stojol Muc'ul Dios li Davide, toj yanijel ic'ot yo'nton ta stojol li Davide.

¹⁷ Li xcaxail smantal Muc'ul Diose te laj yaq'uic ta yavil ta o'lol yut carpana ti cac xa ono'ox smeltsanoj li Davide. Li Davide ta ora la xchic'be, la smilbe smoton Muc'ul Dios sventa co'ol yo'ntonic xchi'uc.

¹⁸ C'alal ilaj yo'nton ta yac'bel smoton Dios li Davide, lic yac'be bendición scotol israeletic ta sbi li Muc'ul Dios ti ech'em stsatsale.

¹⁹ Scotol li israel vinic antsetic te oyique lic yac'anbe jujun pan, jujulec' ti'bol, xchi'uc yan jujun pan pasbil ta taqui sat ts'usub. Ts'acal isutic batel ta snaic scotolic.

²⁰ Li Davide isut batel ta sna ec yu'un bat yac'be bendición li yajnil xnich'nabe. Pero li Mical stseb Saule iloc' snup ta be, jech laj yalbe: —Toj ven lequil ajvalilot chacom yu'un li israeletique, yu'un toj lec c'usi laj avac' ta ilel ta stojol amozotac aquiaratac, jech chac c'u cha'al li boch'o mu sna' xq'uexove —xut.

²¹ Itac'ov li Davide: —Ta melel li'ac'otaj, pero ta stojol Muc'ul Dios, yu'un ja' la st'ujun ta xq'uexol li atote xchi'uc ta xq'uexol avuts' avalaltac, jech vu'un licom ta banquilal yu'un scotol li steclumale, ja' li israeletique.

²² Xaq'uelavil, ech'em to ta jbic'tajes jba, ta jyales jba o ta j'ech'el jech chac c'u cha'al laj avale, pero ja' chlic yich'icun ta muc' li quiaraetic laj avale —xut.

²³ Li Micale muc xa x'alaj o ti jayib c'ac'al cuxule.