2 Samuel 5 - Bible in Tzotzil de Chenalhó with Deuterocanon

I'och ta ajvalilal ta Israel xchi'uc Judá li Davide

¹ Ts'acal to ibatic ta Hebrón scotol li jaychop israeletique, bat sc'opanic li Davide, jech c'ot yalbeic: “Li vu'uncutique jchi'il jbatic, jun jch'ich'altic, jun jbec'taltic.

² Ta melel ja' to'ox ajvalil cu'uncutic li Saule, pero vo'ot ono'ox laj acolta loq'uel ta pleito li israeletique; vo'ot laj avic' sutel tal. Jech noxtoc li Muc'ul Diose yalojbot xa ti vo'ot chlic aventain scotol li israeletique, ti vo'ot chlic ochan ta banquilal yu'unique”, xutic.

³ Te italic scotolic ec li banquilaletic yu'un Israele, tal sc'opanic li ajvalil David te ta Hebrone. Li Davide la xchapan lec sc'opic ta stojol Muc'ul Dios. Li banquilaletique te la stiq'uic o ta ajvalilal sventa Israel li Davide.

⁴ Li Davide yich'oj xa'ox lajuneb xcha'vinic (30) jabil ti c'alal i'och ta ajvalile. Cha'vinic (40) jabil i'abtej.

⁵ Ja' o'lol xvaxquibal jabil i'abtej ta Hebrón ta stojol li Judae. Yan ta Jerusalén ta stojol Israel xchi'uc ta Judá noxtoque, ja' i'abtej oxlajuneb xcha'vinic (33) jabil.

Li Davide la spoj li tsatsal coralton yu'un lum Sione

⁶ Li ajvalil Davide ibatic xchi'uc svinictac ta Jerusalén, yu'un bat snutsic loq'uel li jebusetic te nacajtique. Li jebusetique jech laj yalbeic li Davide: “Vo'ote mu xu' cha'och batel li'i. Ma'satetic, coxoetic no'ox xu' yu'unic mu xac' ochan batel”, xutic. La snopic ti mu x'och o batel ti jech laj yalbeique.

⁷ Pero li Davide laj ono'ox spoj li tsatsal coralton yu'un lum Sione, ja' ti Lum yu'un David xi sbi ic'ote.

⁸ Li Davide jech laj yal: “Scotol boch'o tsc'an chbat smil li jebusetique, ac'o ochuc batel ta sbe ya'alic. Te ac'o smil o li ma'satetic, li coxoetic ti chopol chquiltique”, xi. Ja' te iloc' o li lo'il jech chac li'i: “Li ma'sat, li coxoe mu xu' ch-och ta ch'ulna yu'un Dios”, xi chich' alel.

⁹ Li Davide te inaqui o ta tsatsal coralton. Lum yu'un David, xi sbi laj yac'be. La set lec ta coralton ti bu nojesbil ta lum yu'une.

La stac batel yaj'abteltac ta stojol David li ajvalil Hirame

¹⁰ Li Davide itsatsub lec yo'nton; i'ich'at lec ta muc', yu'un chi'inbil o yu'un li Muc'ul Dios ti tspas ta mantal scotole.

¹¹ Ja' yu'un li Hiram, ajvalil ta Tiroe, la stac tal yaj'abteltac ta stojol li Davide, xchi'uc lequil ch'ut te'etic, xchi'uc carpinteroetic, xchi'uc j'anaejtonetic sventa coraltonetic. Ja' ivul spasbeic sna li Davide.

¹² Li Davide te lic sna' o ti ja' itic'at ta ajvalilal yu'un Muc'ul Dios ta sventa li Israele, xchi'uc ti ja' ta sventa lec chbat li yabtele yu'un tsc'an tscolta li jteclum yu'une, ja' li israeletique.

Sc'oplal xnich'nabtac David ivoq'uic ta Jerusalén

¹³ C'alal iloc' batel ta Hebrón li Davide, te ic'ot nacluc ta Jerusalén; te la sa' ep yajnil xchi'uc yan antsetic yu'un. Te ivoc' ep squeremetic stsebetic.

¹⁴ Ja' jech sbi li xnich'nab ti ivoc' te ta Jerusalene: Samúa, Sobab, Natán, Salomón,

¹⁵ Ibhar, Elisúa, Nefeg, Jafía,

¹⁶ Elisama, Eliada, xchi'uc Elifelet.

La stsal filistaetic li Davide

¹⁷ C'alal laj ya'yic filistaetic ti i'och xa ta ajvalilal sventa Israel li Davide, ital scotolic, tal sa'ic li Davide. C'alal laj ya'ay li Davide, iyal batel ta snac'ubbail.

¹⁸ Li filistaetique laj yaq'uic tal persa te vul spuc sbaic ta stenlejaltic Refaim.

¹⁹ Li Davide jech lic sjac'be li Muc'ul Diose: —¿Me xu' chbat cac'be ya'ay li filistaetique? ¿Me chavac'bun ta jc'ob? —xut. Itac'ov li Muc'ul Diose: —Xu' chbat avac'be; vu'un chacac'bot ta ac'ob —xut.

²⁰ Li Davide ibat te ta Baal-perazim; te la stsal scotolic. Li Davide jech laj yal: “Li Muc'ul Diose la sjambun jbe ta o'lol cajcontra jech chac c'u cha'al balac'vo' ti chch'acbun sbee”, xi. Ja' yu'un Baal-perazim laj yac'be sbi li banamile.

²¹ Li filistaetique te icom yu'unic li sloc'obaltac sdiosique. Li David xchi'uc xchi'iltaque la xchiq'uic.

²² Li filistaetique italic yan velta noxtoc; te vul spuc sbaic ta stenlejaltic Refaim noxtoc.

²³ Li Davide te lic sjac'be yan velta li Muc'ul Diose. Jech itac'bat: —Mu xbat avac'be lec ta satic. Setuic no'ox; bat ac'beic tal ta mucul ta spatic ti c'alal chvulic ta bálsamo te'etique.

²⁴ C'alal chava'ay oy boch'o xchajlajet ta yanal bálsamo te'etique, batan ta ora, yu'un ja' senyail ti vu'un ba'yucbe chibat avu'un sventa ac'o bat amil li filista soldadoetique —xut.

²⁵ Li Davide la spas li c'usi i'albat yu'un Muc'ul Diose. La smil li filistaetique; te ilic smilic ta Geba c'alal to ta Gezer.