2 Samuel 4 - Bible in Tzotzil de Chenalhó with Deuterocanon

Imilat li Is-bosete

¹ C'alal laj ya'ay Is-boset xnich'on Saúl ti icham te ta Hebrón li Abnere, solel ilaj stsatsal yo'nton o. Jech scotol li boch'otic te oyic ta Israele i'och xi'el ta yo'ntonic.

² Li Is-bosete oy chib viniquetic te ch-abtejic yu'un; ja' banquilaletic yu'un jtsob j'eleq'uetic. Li june ja' Baana sbi. Li yane Recab sbi. Ja' xnich'nab Rimón te ta Beerot; ja' smomnich'nab Benjamín c'otemic, yu'un li lum Beerote ja' to comen ta sventaic li jchop liquemic ta Benjamine.

³ Yu'un li beerotetique ijatovic batel ta Gitaim; te nacalic o c'alal to tana. Ja' jech c'otemic jech chac c'u cha'al yanlum.

⁴ Li Jonatán xnich'on Saule oy jun xnich'on, Mefi-boset sbi; mu'yuc lec xchibal yacan. Yu'un c'alal yich'oj vo'ob jabil li Mefi-bosete, ja'o ic'ot a'yej ta Jezreel ti icham xa li Saúl xchi'uc Jonatane. Ja' yu'un li boch'o oy ta sventa tsts'itese laj yic' batel ta anil, yu'un chjatovic batel. Ta sventa ti toj anil ibatique, ijach'. Jech coxo icom o.

⁵ Li Recab xchi'uc Baanae, ja' li xnich'nab Rimón ta Beerote, ibatic ta sna li Is-bosete; ja'o xc'uxul c'ac'al ti c'alal ic'otique. Li Is-bosete ja'o te chvay ta o'lol c'ac'al ta sna.

⁶ Li ants ti chchabi ti'nae te chic'a trigo, pero ts'acal ivay ec. Jech muc xil i'ochic batel ta yut na li Recab xchi'uc yits'in Baanae.

⁷ C'alal i'ochique, li Is-bosete te vayem ta svayab ta scuarto, te la smilic; la sc'ocbeic batel sjol. Laj yich'ic batel; sbejel ac'ubal ixanovic batel ta sbelal Arabá.

⁸ Li sjol Is-bosete te laj yich'beic tal li ajvalil David ta Hebrone, jech vul yalbeic: —Ajvalil, li' oy li sjol Is-bosete, ja' li xnich'on Saúl ti scontraot ono'oxe, ti tsc'an ox chasmilote. Pero li Muc'ul Diose laj xa yac'bot atsal li Saule xchi'uc li smomnich'nabtaque —xutic.

⁹ Itac'ov li Davide: —Chacalboxuc ta stojol Muc'ul Dios, ja' Dios ti la scoltaun ta sventa jvocole,

¹⁰ c'alal oy jun boch'o ay yalbun ti icham xa li Saule, la snop ti ja' jun lequil a'yej tal yalbune. Pero li c'usi laj yalbune, ja' no'ox itun ta sventa la jtsac, la jmil o te ta Siclag.

¹¹ Chacalboxuc ta jamal ti ja' no'ox jech ta jpasboxuc ec vo'oxuc ti chopol vinicoxuque ti laj amilic li boch'o mu'yuc smule, ti jun yo'nton chvay ta svayab ay ataic ta snae. Ja' yu'un li' ta orae chcac' atoj ta ach'ich'alic ti laj amilique. Chaculesoxuc o li' ta banamil —xut.

¹² Li Davide la spas ta mantal yaj'abteltac ti ac'o smilique, jech la smilic. La sc'ocbeic yoc sc'ob; la sjoc'anic ta te' te ta nopol stanqueal vo' ta Hebrón. Ts'acal laj yich'beic batel sjol li Is-bosete; bat smuquic ta smuquinal Abner te ta Hebrón.