2 Samuel 23 - Bible in Tzotzil de Chenalhó with Deuterocanon

Slajeb xa c'usi laj yal comel li Davide

¹ Li'i ja' slajeb xa ya'yej laj yal comel li Davide, jech laj yal: “Li David xnich'on Isaie, ja' li vinic ti i'ac'bat tsots yabtel yu'un Diose, ja' li ajvalil ti t'ujbil yu'un li Dios yu'un Jacobe, ja' li jq'uejimol vinic te ta Israele, jech laj yal:

² “Li espíritu yu'un Muc'ul Diose ic'opoj ta jventa; ivul ta que li sc'ope.

³ Li Dios yu'un Israele ic'opoj; li Jchabivanej yu'un Israele jech laj yalbun: ‘Li boch'o tuc' chchapan cristianoetique, li boch'o ta sventa Dios chventainvane,

⁴ ja' jech chac c'u cha'al saquil osil ta sob, jech chac c'u cha'al xojobal c'ac'al ta sob c'alal lec q'uepel ti chac' ch'iuc ts'i'laletic c'alal ech' xa'ox q'uinubale’, xi.

⁵ Ja' yu'un li jmomnich'nabtaque j'ech'el te oyic o ta stojol Dios, yu'un oy c'usi lec yalojbun ti mu xlaj sc'oplal sbatel osile. Li c'usi yaloje lec chapal o, xchi'uc jbel sc'oplal. Ja' chac' tsalvancun ta pleito; ja' chac' ti ac'o c'otuc ta pasel li c'usi oy ta co'ntone.

⁶ Pero li boch'otic chopolique ja' jechic jech chac c'u cha'al bulbil ch'ixetic ti mu'yuc boch'o xu' tstsac ta sc'obe.

⁷ Li boch'o tsc'an tstsaque ja' no'ox xu' chluch ta jch'ix taq'uin, o ta lanza, ja'o chich' chiq'uel ta c'oc', yu'un jech ac'o c'ac'uc o ta j'ech'el”, xi li sq'ueoje.

Sc'oplal svinictac David lec xaq'uic paspleito

⁸ Li svinictac David ti lec tsots yo'ntonic ta paspleitoe ja' li'i: Joseb-basebet tacmonita vinic; ja' banquilal yu'un li banquilal soldadoetique. Ja' ti oy jun velta la smil ta slanza vaxquib ciento (800) viniquetique.

⁹ Li yane ja' Eleazar xnich'on Dodo, ahohíta vinic; ja' jun li oxibic ti lec xu' yu'unic pleitoe. Ja' te xchi'inoj David ti c'alal icontrainatic yu'un filistaetic li israeletique, ja'o ti c'alal ijatovic batel li israeletique.

¹⁰ Pero li stuque te icom; te laj yac'be sba xchi'uc li filistaetique, ja' to ti c'alal imich'luj li sc'obe, jech te pac'al icom ta sc'ob li yespadae. Li jun c'ac'al le'e ja' yorail ti i'ac'bat spas lec canal yu'un Muc'ul Diose. Li israeletique isutic yo' bu oy li Eleazare. Ja' xa no'ox bat stsobbeic tal c'usi oy yu'un li anima filistaetique.

¹¹ Li yane ja' Sama xnich'on Ag, hara vinic. C'alal te la stsob sbaic li filistaetic ta Lehi te ta jun biq'uit banamil noj ta lenteja cheneq'uetique, li israeletique ijatovic batel yu'un li filistaetique.

¹² Pero li Samae te iva'i ta o'lol li banamile; la spoj sba. Ep la smil li filistaetique, jech i'ac'bat spas lec canal yu'un li Muc'ul Diose.

¹³ C'alal yorail tuch' trigoaltique, oy oxib yu'unic li lajuneb xcha'vinic (30) banquilaletique ital xchi'inic li David te ta Adulam nail ch'ene. Li filistaetique te spasoj scarpanaic ta stenlejaltic Refaim.

¹⁴ Li Davide te oy ta tsatsal nailch'en. Ja'o yorail te oy jtsob filista soldadoetic ta Belén.

¹⁵ Li Davide lic yal li c'usi tsc'ane: “Oyuc boch'o xtal yac'bun cuch' li vo' ta joc' te oy ta nopol sti' Belene”, xi.

¹⁶ Ja' yu'un li oxib ti lec tsots yo'ntonique i'ochic batel yo' bu scarpanaic li filistaetique, bat slupic tal li ya'lel joc' te ta nopol sti' Belene. Laj yich'beic batel li Davide, pero muc sc'an xuch'. La smal ta banamil sventa smoton Muc'ul Dios, jech laj yal:

¹⁷ “Ac'o scoltaun li Muc'ul Diose, mu'yuc ta xcuch' li vo'e. Yu'un me chcuch'e, xco'laj xchi'uc ja' chcuch'be xch'ich'alic li viniquetic ti la sjip sbec'talic ta yich'el tal li vo'e”, xi. Jech mu'yuc laj yuch' o. Le'e ja' la spasic li oxib viniquetic ti lec tsots yo'ntonique.

¹⁸ Li Abisai yits'in Joab, yalab Sarviae, ja' banquilal yu'unic li lajuneb xcha'vinic (30) ti lec xu' yu'unique. Oy jun velta bat smil ta slanza vo'lajunvinic (300) viniquetic, pero ivu' yu'un. Jech toj muc' ic'ot yu'unic li lajuneb xcha'vinique (30).

¹⁹ Lec laj yich'ic ta muc'; ja' banquilal ic'ot yu'unic. Pero muc ono'ox xco'laj xchi'uc li oxibic ta ba'yuque.

²⁰ Li Benaía xnich'on Joiada liquem ta lum Cabseele, lec tsots yo'nton noxtoc; ep c'usitic ivu' yu'un. La smilbe chib xnich'nab Ariel te ta Moab, xchi'uc iyal batel ta yut ch'en ti c'alal ja'o chac' ep tayoe; te la smil jcot león.

²¹ Xchi'uc la smil jun natil egipto vinic yich'oj lec slanza. Te' no'ox laj yac'be; ts'acal la spojbe li slanzae, ja' la smil o comel.

²² C'alal jech la spas li Benaía xnich'on Joiadae, toj lec sc'oplal yu'unic li lajuneb xcha'vinic (30) ti lec xu' yu'unique.

²³ Ja' no'ox stuc lec ich'bil ta muc' yu'unic, pero muc xco'laj xchi'uc li yan oxibic ta ba'yuque. Jech li Davide ja' la stic' ta banquilal yu'unic li jtsob jchabivanejetic yu'un stuque.

²⁴ Li lajuneb xcha'vinic (30) lec xu' yu'unique, ja' te oy li Asael yits'in Joab; Elhanán xnich'on Dodo ta Belén;

²⁵ Sama xchi'uc Elica te nacalic ta Harod;

²⁶ Heles paltita vinic; Ira xnich'on Iques ta Tecoa;

²⁷ Abiezer ta Anatot; Mebunai ta Husat;

²⁸ Salmón ahohíta vinic; Maharai ta Netofa;

²⁹ Heleb xnich'on Baana liquem ta Netofa noxtoc; Itai xnich'on Ribai te ta Gabaa ta yosilal Benjamín.

³⁰ Xchi'uc te oy li Benaía liquem ta Piratone; Hidai liquem ta uc'um Gaas;

³¹ Abi-albón arba vinic; Azmavet te ta Bahurim;

³² Eliaba ta Saalbón; le'e ja' xnich'nab Jasén. Xchi'uc te oy li Jonatán xnich'on

³³ Sama ta Harar; Ahíam xnich'on Sarar te ta Harar noxtoc;

³⁴ Elifelet xnich'on Ahasbai, ja' li xnich'on Maacae; Eliam xnich'on Ahitofel ta Gilo.

³⁵ Hezrai ta Carmel; Paarai ta Arab;

³⁶ Igal xnich'on Natán ta Soba; Bani ta Gad;

³⁷ Selec ta Amnón; Naharai ta Beerot, ja' li jcuch-abtejebal yu'un Joab yol Sarviae;

³⁸ Ira xchi'uc Gareb te nacalic ta Jatir;

³⁹ xchi'uc Urías, ja' li heteo vinique. Ja' vuclajuneb xcha'vinic (37) ta scotol.